ورتالىقتا 18 جاستان اسقان, پسيحونەۆرولوگيالىق اۋرۋلارى بار, I, II توپتاعى مۇگەدەكتىگى بار قىزمەت الۋشىلارعا ستاتسيونارلىق جاعدايدا ارناۋلى الەۋمەتتىك قىزمەت كورسەتىلەدى. بۇعان دەيىن مەكەمە اۋماعىندا 1964, 1970 جىلدارى سالىنعان ەكى كورپۋس جۇمىس ىستەپ تۇرعان ەدى. ەندى, مىنە, زامان تالابىنا ساي جاڭا عيمارات ىسكە قوسىلىپ وتىر.
قوسىمشا كورپۋستىڭ جالپى اۋماعى 6 281,8 شارشى مەتردى قۇرايدى. نىسان حالىقتى الەۋمەتتىك قورعاۋ سالاسىنداعى ارناۋلى الەۋمەتتىك قىزمەتتەر كورسەتۋ ستاندارتتارىنا تولىق سايكەس كەلەدى. عيماراتتا ارنايى ەڭبەك شەبەرحاناسى, مەديتسينالىق كابينەتتەر, زاماناۋي اسحانا, شاشتاراز بولمەسى, كىتاپحانا, جاتىن بولمەلەرى قاراستىرىلعان.
عيماراتتىڭ اشىلۋ سالتاناتىنا وبلىس اكىمى بەرىك ءۋالي مەن وبلىس پروكۋرورى ەرلان اباەۆ قاتىستى. ءوڭىر باسشىسى جاڭا نىساننىڭ الەۋمەتتىك ماڭىزىنا توقتالىپ, مەكەمە ەرەكشە كۇتىمدى قاجەت ەتەتىن ازاماتتارعا قولايلى ءارى قاۋىپسىز ورتا قالىپتاستىرۋعا باعىتتالعانىن اتاپ ءوتتى.
– مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا: «مەملەكەت ءار ازاماتتىڭ لايىقتى تابىس تاۋىپ, ساپالى الەۋمەتتىك قىزمەت الىپ, ەرتەڭگى كۇنىنە سەنىمدى بولۋى ءۇشىن بارىنشا جاعداي جاساي بەرەدى», دەپ الەۋمەتتىك سالانىڭ ماڭىزىن ايرىقشا اتاپ ءوتتى. جاڭا عيماراتتى پايدالانۋعا بەرۋ – حالىقتى الەۋمەتتىك قورعاۋ سالاسىندا ارناۋلى الەۋمەتتىك قىزمەتتەر كورسەتۋ ستاندارتتارىنا ساي, قىزمەت الۋشىلاردى ءبىر ادامعا 5 شارشى مەترگە دەيىنگى تۇرعىن ءۇي الاڭىمەن قامتاماسىز ەتۋگە مۇمكىندىك بەرەدى. سونىمەن قاتار قوسىمشا كورپۋس سانيتارلىق-گيگيەنالىق, ەپيدەمياعا قارسى تالاپتاردىڭ ساقتالۋىن قامتاماسىز ەتەدى. سونداي-اق قىزمەت الۋشىلارعا دا, ورتالىق پەرسونالىنىڭ جۇمىسىنا دا نەعۇرلىم قولايلى جاعدايلار جاساپ, مەديتسينالىق, الەۋمەتتىك قىزمەت كورسەتۋ ساپاسىن ارتتىرادى. وبلىسىمىزدا زاڭسىز شىعارىلعان اكتيۆتەردى قايتارۋ ەسەبىنەن 25 نىساننىڭ قۇرىلىسى باستالعان. بۇگىندە ۇشەۋىنىڭ قۇرىلىسى اياقتالدى. 22 نىساننىڭ قۇرىلىسى جۇرگىزىلىپ جاتىر. جالپى, بۇل ماقساتقا 22 ملرد تەڭگە قارجى قاراستىرىلدى. وسى يگى ىسپەن اينالىسقان پروكۋراتۋرا, قۇقىق قورعاۋ ورگاندارى قىزمەتكەرلەرىنە اباي وبلىسى جۇرتشىلىعى اتىنان العىسىمىزدى بىلدىرەمىز, – دەدى وبلىس اكىمى.
اكىمدىكتىڭ دەرەگىنشە, نىسان ىسكە قوسىلعاننان كەيىن جاڭا جۇمىس ورىندارى اشىلىپ, وڭىردەگى الەۋمەتتىك قولداۋعا مۇقتاج ازاماتتارعا ساپالى قىزمەت كورسەتىلەدى. جالپى, وڭىردە 23 800 مۇگەدەكتىگى بار ادام تىركەلگەن. وسى جىلى ايماقتاعى 15 مىڭنان استام مۇگەدەكتىگى بار جاندى تەحنيكالىق وڭالتۋ قۇرالدارىمەن, وڭالتۋ قىزمەتتەرىمەن قامتاماسىز ەتۋ ماقساتىندا 3,3 ملرد تەڭگە ءبولىندى. سونىمەن قاتار الەۋمەتتىك, كولىك ينفراقۇرىلىمى نىساندارىنىڭ قولجەتىمدىلىگىن قامتاماسىز ەتۋ ماقساتىندا بيىل 200 نىساندى بەيىمدەۋدەن وتكىزۋ جوسپارلانىپ وتىر. وبلىستا ارناۋلى الەۋمەتتىك قىزمەتتەرمەن 6 مىڭعا جۋىق ادام قامتىلعان.
وبلىس اكىمى ءباسپاسوز قىزمەتىنىڭ حابارلاۋىنشا, مەملەكەت باسشىسىنىڭ تاپسىرماسىن ورىنداۋ ماقساتىندا ءۇرجاردا بالالارعا ارنالعان ارناۋلى الەۋمەتتىك قىزمەت كورسەتۋ ورتالىعىنىڭ جانىندا سالىنعان قوسىمشا عيماراتتىڭ قۇرىلىسى اياقتالىپ, بيىل پايدالانۋعا بەرىلەدى. سونداي-اق بورودۋليحا اۋدانىندا, سەمەي قالاسىندا ورنالاسقان قارتتار ۇيىنە اعىمداعى جوندەۋ جۇمىستارى جۇرگىزىلەدى. الەۋمەتتىك مەكەمەلەردىڭ قىزمەتىن ارتتىرۋ ماقساتىندا 20 اۆتوكولىكتى (ونىڭ ىشىندە 7 ينۆاتاكسي) ليزينگ ارقىلى ساتىپ الۋ جوسپارلانعان.
اباي وبلىسى
