كەشەن تاريحي تۇلعانىڭ ءومىرى مەن ەرلىگىن زاماناۋي فورماتتا كورسەتۋگە ارنالعان مۋزەيلەندىرىلگەن كەڭىستىك رەتىندە جوبالانعان.
رايىمبەك باتىرعا ارنالعان ەسكەرتكىش تاريحي تۇلعانىڭ بەينەسىن زاماناۋي ساۋلەت ستيلىندە كورسەتىپ,ونىڭ ەرلىگىن جانە باتىرلىق ءداستۇرىن دارىپتەيدى.
ال ونداعى ەكسپوزيتسيالىق زالداردان باتىردىڭ ءومىر جولى, جاۋىنگەرلىك ەرلىكتەرى جانە تاريحي ءداۋىرىن سيپاتتايتىن ينتەراكتيۆتى كورمەلەر ورىن الماق. قوناقتار مۋلتيمەديالىق بەينەلەر, 3D-مودەلدەر جانە تاريحي رەكونسترۋكتسيا ارقىلى باتىردىڭ ومىرىنە كوز جەتكىزە الادى.
تاعى ءبىر ءبولىم ءبىلىم بەرۋ مەن مادەني كەڭىستىك رەتىندە ويلاستىرىلعان.
سونداي-اق ۆيرتۋالدى جانە مۋلتيمەديالىق جوبالاردا كەلۋشىلەر VR-تۋرلار ارقىلى تاريحي شايقاستارعا قاتىسا الادى, ۆيرتۋالدى كورمەلەر جانە ينتەراكتيۆتى پرەزەنتاتسيا ارقىلى قازاقستاننىڭ مادەني مۇراسىن زەرتتەي الادى.
مەموريالدىق كەشەننىڭ نەگىزگى ماقساتى – ءوڭىر تاريحىن, قازاق حالقىنىڭ مادەني جانە رۋحاني مۇراسىن حالىققا قولجەتىمدى, قىزىقتى جانە ءبىلىمدى فورماتتا ۇسىنۋ. كەشەن تۋريستەر مەن قالا تۇرعىندارىنا رۋحاني تاعىلىم بەرىپ, الماتىنى ەلىمىزدىڭ مادەني جانە تاريحي ءتۋريزمىنىڭ ورتالىعىنا اينالدىرۋعا اتسالىسادى.
سونىمەن قاتار, الماتى قالاسىندا «Observatorium» مۋزەيى اشىلادى. اۋماعى 130 شارشى مەتر بولاتىن بۇل مۋزەي عىلىمدى, استرونوميانى جانە زاماناۋي تەحنولوگيانى ناسيحاتتاۋعا باعىتتالعان. مۇندا كەلۋشىلەر عارىش پەن استرونوميالىق قۇبىلىستاردى زەرتتەۋگە ارنالعان ينتەراكتيۆتى ەكسپوزيتسيالارمەن تانىسۋ مۇمكىندىگىنە يە بولماق.
بۇل ەكى جاڭا مادەني جانە عىلىمي ورىن الماتى قالاسىن تۋريستىك ەمەس, سونىمەن قاتار ءبىلىم مەن عىلىم ورتالىعى رەتىندە تانىمال ەتۋگە زور مۇمكىندىك بەرەدى. مۋزەيدىڭ قورىتىندى بولىگى دەپ تەلەسكوپ ارقىلى جۇلدىزدى اسپان مەن عالامشارلاردى تىكەلەي باقىلاۋعا بولاتىن ءتىرى باقىلاۋ كەڭىستىگىن ايتۋعا بولادى. بۇل ايماق ادام مەن شەكسىز عالام اراسىنداعى فيلوسوفيالىق بايلانىستى سەزىنۋگە مۇمكىندىك بەرمەك.
«Observatorium» مۋزەيىندە جاساندى ينتەللەكت تەحنولوگياسىن ەنگىزۋ, سونىڭ ىشىندە «عالام بويىنشا VR-ساياحات» ينتەراكتيۆتى جوباسىن ىسكە قوسۋ جانە روبوت-ەكسكۋرسوۆودتى ەنگىزۋ جوسپارلانعان.
«رايىمبەك باتىر كەسەنەسى مەن Observatorium مۋزەيى – بۇل تۋريستىك نىساندار عانا ەمەس, ولار ءتول تاريحىمىزدى, مادەنيەتىمىزدى جانە عىلىمداعى جەتىستىكتەرىمىزدى كەلەشەك ۇرپاققا جەتكىزۋدىڭ جاڭا ءتاسىلى. كەلۋشىلەر وسى جەردەن رۋحاني جانە ينتەللەكتۋالدى تاجىريبە الادى», دەيدى الماتى قالاسى مادەنيەت باسقارماسىنىڭ باسشىسى دانيار اليەۆ.
