رەسپۋبليكا كولەمىندە تۋ كورسەتكىشى بويىنشا كوش باسىندا كەلە جاتقان تۇركىستان وبلىسىندا 2025 جىلى 43 327 ءسابي دۇنيە ەسىگىن اشقان. ونىڭ 22 247-ءسى ۇل, 21 080-ءى قىز بالا. جالپى وبلىس حالقىنىڭ سانى 2 148 168 ادامعا جەتكەن. سونىڭ ىشىندە, قالا حالقى – 545 012, اۋىل تۇرعىندارىنىڭ سانى – 1 603 156 ادام.
بىلتىر وڭىردە 10 112 نەكە تىركەلگەن. ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ تۇركىستان وبلىسى بويىنشا دەپارتامەنت باسشىسىنىڭ ورىنباسارى نۇرقوجا بەكجانوۆتىڭ مالىمدەۋىنشە, قونىس اۋدارۋشىلار سانى دا وسكەن. ماسەلەن, وتكەن جىلى ەلىمىزدىڭ باسقا وبلىستارىنان 62 885 ازامات قونىس اۋدارسا, 410 ازامات دوستاستىق ەلدەرىنەن, 6 ادام الىس شەتەلدەردەن تۇركىستان وبلىسىنا كوشىپ كەلگەن.
وتكەن جىلى پايدالانۋعا بەرىلگەن تۇرعىن ۇيلەردىڭ جالپى كولەمى دە ارتىپ, 1 ملن 235,9 مىڭ شارشى مەترگە جەتكەن. ياعني الدىڭعى جىلمەن سالىستىرعاندا كورسەتكىش 6,6%-عا ارتىپ وتىر. جالپى وتكەن جىلى تۇرعىن ءۇي قۇرىلىسىنا 201 ملرد 829 ملن تەڭگە ينۆەستيتسيا سالىنعان.
