كورمەدە كەلۋشىلەر ەستون مادەنيەتىنىڭ ەڭ تانىمال ءارى پوەتيكالىق قىرلارىنىڭ ءبىرى – قولعاپ توقۋ داستۇرىمەن تانىستى. ۇيىمداستىرۋشىلاردىڭ ايتۋىنشا, ەستونيادا قولعاپتار عاسىرلار بويى سولتۇستىك كليمات جاعدايىندا كۇندەلىكتى تۇرمىس قاجەتىنە عانا ەمەس, سونىمەن قاتار سۇلۋلىققا, شەبەرلىككە جانە حالىق جادىنداعى رۋحاني داستۇرلەرگە دەگەن قۇرمەتتىڭ سيمۆولىنا اينالعان.
كورمەنىڭ تۇجىرىمداماسى «تىلەك اعاشى» يدەياسىنان الىنعان, وندا قولعاپتار اعاشتىڭ «جەمىستەرى» ىسپەتتى – يەسىنىڭ جان دۇنيەسىمەن قولىنىڭ جىلۋىن ساقتايدى دەگەن ءتامسىل بار.
ەكسپوزيتسيادا ورتا عاسىرلاردان بۇگىنگى كۇنگە دەيىنگى ۇلگىلەردەن شابىت الاتىن بۇيىمدار ۇسىنىلدى. ولارداعى ءاربىر ورنەك پەن قولدانىلعان ءتۇس ءوز ءداۋىرى مەن ايماقتىق ەرەكشەلىكتەرىنەن سىر شەرتەتىن شەبەردىڭ جەكە تۋىندىسى.
كورمەدە قويىلعان جۇمىستار ەستون ۇلتتىق مۋزەيىنىڭ تۇپنۇسقا كوللەكتسيالارىنا سۇيەنە وتىرىپ, تارتۋ ۋنيۆەرسيتەتىنىڭ ۆيلياندي مادەنيەت اكادەمياسىمەن بىرلەسىپ جاسالعان ارتەفاكتىلەردىڭ كوشىرمەلەرى.
«جوبانىڭ ماقساتى – حالىق قولونەرىن ساقتاۋ مەن ناسيحاتتاۋ, ءداستۇرلى ادىستەردى زەرتتەۋ جانە كاسىبي شەبەرلىكتى دامىتۋ. «قولمەن ورىلگەن قولعاپ سىرى» جىلجىمالى كورمەسى بۇعان دەيىن ۆەنگريا, نيدەرلاند, فرانتسيا, بەلگيا, بولگاريا, گرەكيا, ەستونيا ەلدەرىندە كورسەتىلىپ, ەندى قازاقستان كورەرمەنىنە جول تارتىپ وتىر. ەكى ەل دە جىل مەزگىلىمەن, قولونەر شەبەرلىگى جانە مادەني مۇراعا دەگەن قۇرمەتىمەن ەرەكشەلەنەدى», دەيدى ۇلتتىق ورتالىق مۋزەيدىڭ ءباسپاسوز قىزمەتى.
