جۋرنال جىلىنا ءبىر رەت جارىق كورەدى
جىلىنا ءبىر رەت قازاق جانە ورىس تىلىندە جارىق كورەتىن Turning Points Qazaqstan باسىلىمىنىڭ بيىلعى – 2026 جىلعا ارنالعان سانىندا توماس فريدمان, دجوناتان حايدت, نيكولاس كريستوف, دجەك تورن سياقتى وي كوشباسشىلارىنىڭ 2026 جىلعا ارنالعان ەكسكليۋزيۆتى ەسسەلەرى جانە ماعزۇم مىرزاعاليەۆ, ساياسات نۇربەك, قۋات اكيجانوۆ, دوسىم ساتباەۆ, ارمان ەۆنيەۆ, جان مۇقانوۆ, الماز شارمان, رايسا سايران سىندى بىرقاتار وتاندىق اۆتورلاردىڭ پايىمدارى مەن بولجامدارى جاريالانعان.
تاقىرىپتار ءتۇرلى سالانى قامتيدى
اتالعان اۆتورلاردىڭ كوتەرگەن تاقىرىپتارى ساياسات پەن ەكونوميكادان باستاپ, ونەر مەن مادەنيەتكە, جاساندى ينتەلەكتىگە دەيىنگى سالالاردى قامتىعان. مىسالى, دجوناتان حايد گاجدەتتەر مەن ينتەرنەتتىڭ مەكتەپ جاسىنداعى بالالارعا زياندى اسەرى تۋرالى زەرتتەۋلەرگە توقتالسا, دجەك تورن جاسوسپىرىمدەر اراسىندا بەلەڭ العان ىزاقورلىق پەن قاتىگەزدىكتىڭ تۇپكى سەبەپتەرىنە ۇڭىلگەن. ال, قازاقستان اۆتورلارى ءوز سالالارىندا 2026 جىلى بولۋى مۇمكىن ترەندتەر مەن سىن-قاتەرلەرگە قاتىستى پايىمدارى مەن بولجامدارىن ۇسىنعان.
جۋرنالدىڭ تانىستىرىلۋى وتەدى
KAZMEDIA HOLDING كومپانياسىنىڭ حابارلاۋىنشا, جۋرنالدىڭ باس رەداكتورى – بەلگىلى جۋرناليست ايبىن شاعالاق.
«جۋرنالدىڭ العاشقى سانىن قاڭتاردىڭ 28-ءى كۇنى استاناداعى The St. Regis Astana قوناقۇيىندە وتەتىن Qazaqstan NEXT 2026 فورۋمىندا رەسمي تانىستىرۋ جوسپارلانىپ وتىر», دەلىنگەن اتالعان كومپانيا تاراتقان حابارلامادا.
ءبىر ايتا كەتەتىنى, جۋرنالدىڭ ەلەكتروندى نۇسقاسى The New York Times Licensing سايتىندا دا قولجەتىمدى بولادى.
