وتكەندە ءبىر ەسكى تۇسىرىلىمنەن تالدىرماش قانا قىزدىڭ لەپەسىن تىڭداپ قايران قالدىق. «كەلەسى تىڭدايتىن ءاننىڭ ءسوزىن ءشومىشباي ساريەۆ اعامىز, ءانىن كەڭەس دۇيسەكەەۆ اعامىز سەمبەك ەكەۋمىزگە ارناپ جازعان. بۇل ءاننىڭ كەرەمەتى سونداي, حالىق سەمبەك ەكەۋمىزدى «قوسىپ» قويۋعا دەيىن باردى. بىراق سەمبەكتىڭ ءجۇرىپ جۇرگەن قىزى, مەنىڭ ءوز جىگىتىم بار» دەسىن. سويتسەم, ماقپال ءجۇنىسوۆانىڭ جاس كەزى, سەمبەك جۇماعاليەۆتىڭ جىگىت شاعى ەكەن. سىزدەر مەن ايتپاي-اق ءبىلىپ وتىرعان شىعارسىزدار, جارتى عاسىرعا جۋىق جۇرەكتەرگە گۇل ەگىپ كەلە جاتقان ۇزدىك تۋىندى – «عاشىقتار جىرىنىڭ» قازاق ەستراداسىندا وزىندىك ورنى بار. 1983 جىلداردىڭ ءۇستى سەمبەك اعانىڭ جانىپ تۇرعان جىگىت شاعى بولسا, ماقپال اپايدىڭ قىلشىلداعان قىز عۇمىرى. سول كەزدىڭ وزىندە كليپ تۇسىرىلگەن تۋىندى تۋرالى جەكەلەگەن حابار دا بار. ال التىن قورداعى كونتسەرتتەردە اتاقتى دۋەت ساقتالىپ باققانىنا كۇمان جوق. سوندىقتان اراسىندا بولماسا, ءاننىڭ تاريحىنا ەمەس, جۇرەكتەرگە جورتۋىلىنا قۇلاق تىككىمىز كەلەدى.
توقسانىنشى جىلداردىڭ بەلورتاسىندا اۋىلداعى ۇيلەنۋ تويلارى پالاتكالاردا وتەتىن ەدى عوي. جالبىراعان قارا پالاتكانىڭ ءىشى كىرسە شىققىسىز. جۇپار اڭقيدى. تاۋدىڭ كوك ارشاسىنىڭ بۇتالارىن ج ۇلىپ-ج ۇلىپ اكەپ اينالدىرا قابىرعاسى مەن توبەسىنە تۇتىپ, تومەنگە كوك مايسا ءشوپ توسەپ تاستاعان سوڭ نە كەرەك. جازدىڭ جايلى كۇندەرىندە وتەتىن ونداي تويلار ارمان ەندى. ال اناۋ وتالعان ارشانىڭ وبالىن كىم ويلاپتى؟ جارايدى, ول باسقا اڭگىمە.
اۋىل بولعان سوڭ اعايىننىڭ تويى ءانسىز وتە مە؟ ءبىر كەزدە ەتەك جاقتان ءبىر جىگىت كوتەرىلەدى. ءدال سەمبەك اعاداي شاشىن ءوسىرىپ, ارتىنا قايىرىپ العان. قويعان مۇرتىنا شەيىن كەلىڭكىرەيتىن. تولەگەننىڭ مۇرتى ما, سەمبەك اعانىڭ مۇرتى ما, ايىرۋدىڭ ءوزى قيىن. سول كىسىدەي ءجۇرىسى دە سالماقتى, ازدەكتەمەي, اڭداپ باسا كەلە «قاسىڭ قانداي, قاراقات كوزىڭ قانداي» دەپ سىزىلتا بەرگەندە, كەلىسىپ العانداي تۇسىنان ءبىر بويجەتكەن دە تابىلا كەتەر ەدى. اۋىلدىڭ تويلارىندا كۇلكى دە, ءازىل دە, بي دە, كۇي دە بولاتىن, ءبىر عاجابى – وسىنداي سالماقتى دا سىرلى اندەر ارقاسىندا جوعارى دەڭگەيدە وتەتىندەي كورىنەر ەدى.
ول كەزدە دۋەت سيرەك, قازىر دە كوپ ەمەس قوي. ال مىنا دۋەتتىڭ ءجونى بولەك-ءتى. زامانىنىڭ ماڭدايالدىسى دەۋگە تۇرارلىق. سول تۇستا جۇپ قۇرماقشى قىز-جىگىتتەردىڭ جۇرەك قاعىسىن ءدوپ باسقان تۋىندىنى حالىق ءالى كۇنگە تىڭدايدى. جاي تىڭدامايدى, ىقىلاسپەن تىڭدايدى. قازىر YouTube ارناسىن اشىپ, «عاشىقتار جىرى» دەپ تەرىپ كورىڭىز. بۇرىن «تاماشادا» جۇرت قالاي تىڭداسا, بۇگىندە سولاي تىڭدايتىنىنا كۋا بولاسىز. جانە و باستاعى ورىنداۋشىلارى سول شىرقاعاننان قازىر دە جىرلاپ كەلە جاتقانىنىڭ ءوزى ءبىر عالامات. كەيبىر ونەرتانۋشىلار «عاشىقتار جىرىن» قازاق ەستراداسىنداعى العاشقى دۋەتتەردىڭ ءبىرى دەپ تانيدى ەكەن.
ءان اۋەنىن ادىپتەگەن ايگىلى سازگەر كەڭەس دۇيسەكەەۆ شىعارماسىن دۇنيەگە اكەلگەن سوڭ كوزى بىردەن سەمبەك اعاعا تۇسسە كەرەك. جوعارىدا ءان اسكەرىنىڭ جورتۋىلى تۋرالى سويلەگەنىمىزدە تۋىندىنىڭ دا جاراتۋشىسى ءھام قولباسشىسى بار دەپ اسپەتتەگەن ەدىك قوي. سولار ءشومىشباي ساريەۆ پەن كەڭەس دۇيسەكەەۆ بولسا, باستاپ الىپ شىققان سەمبەك جۇماعاليەۆ مەن ماقپال ءجۇنىسوۆانىڭ ونەرى. 1983 جىلدارى سەمبەك جۇماعاليەۆتى «گۇلدەر» انسامبلىنەن كورگەن كەڭەس دۇيسەكەەۆ: «مەنىڭ اندەرىمدى نەگە ايتپايسىڭ؟» دەپتى. سوندا ول: «بىرەۋلەر ورىنداپ جۇرگەن اندەرىڭدى قايتالايتىن توتىقۇس ەمەسپىن عوي, ماعان ارناپ ءان جاز, ورىندايىن» دەدىم. كەڭەستىڭ قىز بەن جىگىتتىڭ دۋەتىنە ارنالعان «عاشىقتار جىرى» دەگەن جاڭا ءانى بار ەكەن, ناعيما ەسقاليەۆاعا ارناپتى. ءاننىڭ اۋەنىنە, سوزىنە قاراعاندا, ناعيمانىڭ تابيعاتىنا كەلىڭكىرەمەيدى. سوسىن مەن ول ءاندى انسامبلگە جاڭادان كەلگەن جاس ءانشى ماقپال جۇنىسوۆامەن ورىنداپ كورەيىن دەپ شەشتىم. وسى ءاندى 1983 جىلدىڭ اياعىندا بولعان «تاماشادا» ورىندادىق. وزىمە ۇنادى, ونەر ادامىنىڭ وزىنە-ءوزى ۇناۋى قيىن عوي. سودان بەرى حالىق وسى ءاندى تىڭداۋدان جالىققان ەمەس. ماقپالدىڭ دا باعىن اشقان ءان بولدى. «قازاقتىڭ 100 ءانىنىڭ» قاتارىنا ەندى» دەيدى ءانشى.
ءسوزى مەن سازى جىمداسىپ ءبىر قۇدىرەت تۋدىرماسا, ءان وسى ۋاقىتقا دەيىن ومىرشەڭ بولۋشى ما ەدى؟ ودان كەيىن بۇل تۋىندىنى قانشاما جاس شىرقاپ, جۇرەكتەرىندە الديلەدى. جۇرەكتەرگە جول تاپتى, سەزىمدەرىن بايىتتى. دەمەك شىعارما ماحابباتتىڭ بويتۇمارىنا اينالدى.
«كوڭىلگە جىر تۇنادى سەن دەگەندە,
جۇرەككە سىر تۇنادى سەن دەگەندە.
كەۋدەمە ءبىر عاجايىپ شاتتىق ورناپ,
ءومىر دە قۇلپىرادى سەن دەگەندە»
بۇل كىمنىڭ بولسىن جۇرەك تۇكپىرىنە ورناپ قالاتىن ءسوز. لايىم سولاي بولسىن.
