ءىس-شارا اياسىندا 2026 جىلعى 1 قاڭتاردان باستاپ قازاقستان رەسپۋبليكاسىنداعى بارلىق كۇشتىك قۇرىلىمداردىڭ اسكەري قىزمەتشىلەرى مەن ولاردىڭ وتباسى مۇشەلەرى جىلىنا ءبىر رەت ەل اۋماعىندا جولاۋشىلار پويىزدارىمەن تەگىن قاتىناي الاتىنى جونىندە ناقتى مالىمەت بەرىلدى. بۇل باستاما اسكەري قىزمەتشىلەردىڭ الەۋمەتتىك جاعدايىن جاقسارتۋعا جانە ولاردىڭ وتباسىمەن بىرگە ساپارلاۋ مۇمكىندىگىن ارتتىرۋعا باعىتتالعان.
اقپاراتتاندىرۋ بارىسىندا «جولاۋشىلار تاسىمالى» اق تاسىمالداۋ ەكونوميكاسى جانە ەسەبى دەپارتامەنتىنىڭ باس مەنەدجەرى اينۇر بازارباەۆا تەگىن جول ءجۇرۋ قۇقىعى تەك قازاقستان ىشىندەگى باعىتتاردا قاتىنايتىن جولاۋشىلار پويىزدارىنا قولدانىلاتىنىن اتاپ ءوتتى. سونداي-اق, اتالعان شىعىندار «قازاقستان تەمىر جولى» ۇلتتىق كومپانياسىنىڭ قاراجاتى ەسەبىنەن وتەلەتىنىن ءتۇسىندىردى.
جيىنعا قاتىسقان «قازاقستان تەمىر جولى» ۇلتتىق كومپانياسى» اق تاريف ساياساتى دەپارتامەنتىنىڭ ديرەكتورى دياس تۇسىپبەكوۆ اسكەري قىزمەتشىلەر تاراپىنان قويىلعان سۇراقتارعا جاۋاپ بەرىپ, جەڭىلدىكتى پايدالانۋ بارىسىندا تۋىنداۋى مۇمكىن تەحنيكالىق جانە ۇيىمداستىرۋشىلىق ماسەلەلەرگە توقتالدى.
ءىس-شارا قورىتىندىسىندا ءىىم ۇلتتىق ۇلانى باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى گەنەرال-مايور قايرات ۇمبەتوۆ بۇل باستامانىڭ ماڭىزىن اتاپ ءوتتى.
اسكەريلەرگە بولىنەتىن قاراجات – ەڭ الدىمەن ادامعا باعىتتالۋى ءتيىس
ول جوبانى ىسكە اسىرۋ بارىسىندا بەلگىلەنگەن تالاپتاردىڭ قاتاڭ ساقتالۋى قاجەتتىگىن ايتىپ, اتالعان الەۋمەتتىك قولداۋدىڭ اسكەري قىزمەتشىلەر مەن ولاردىڭ وتباسى مۇشەلەرىنىڭ الەۋمەتتىك قورعالۋ دەڭگەيىن ارتتىرۋعا, دەمالىستى الدىن الا جوسپارلاۋعا جانە جول شىعىندارىن ەداۋىر ازايتۋعا مۇمكىندىك بەرەتىنىن جەتكىزدى.
