ۇلتتىق قۇرىلتايدا پرەزيدەنت قاسىم-جومارت توقاەۆ ايتقان ويلار ەلدىڭ رۋحاني دامۋى مەن ءبىلىم سالاسىنا قاتىستى تەرەڭ ءارى سالماقتى باعداردى ايقىندادى. بۇل سوزدەردە ناقتى باستامالارمەن قاتار, قوعام ساناسىن قالىپتاستىرۋعا باعىتتالعان جۇيەلى كوزقاراس انىق سەزىلەدى. ۇلتتىق قۇرىلتايدىڭ قىزىلوردا قالاسىندا ءوتۋى دە ايرىقشا مانگە يە. بۇل ءوڭىر – ۇلتتىق جادى, رۋحاني ساباقتاستىق پەن تاريحي مۇرا توعىسقان كەڭىستىك.
پرەزيدەنت كىتاپحانا تاقىرىبىنا ارنايى توقتالىپ, قىزىلوردادا زاماناۋي كىتاپحانا سالىناتىنىن, استانا مەن الماتىدا پرەزيدەنتتىك كىتاپحانالار بوي كوتەرەتىنىن ايتتى. بۇل شەشىم كىتاپحانانىڭ قوعامداعى ورنىنا جاڭاشا كوزقاراس قالىپتاسىپ كەلە جاتقانىن كورسەتەدى. كىتاپحانا – ۇلتتىق جادىنى جۇيەلەيتىن, مادەني تاجىريبەنى ۇرپاققا جەتكىزەتىن, ءبىلىم اينالىمىن قالىپتاستىراتىن قوعامدىق ورتا.
قازاقستاننىڭ ۇلتتىق ەلەكتروندى كىتاپحاناسىن 122 ەلدىڭ وقىرماندارى پايدالانادى
وسى مادەني-رۋحاني كەڭىستىكتە قىزىلوردا قالاسىنىڭ زياتكەرلىك ورتالىقتارىنىڭ ءبىرى – قورقىت اتا اتىنداعى قىزىلوردا ۋنيۆەرسيتەتىنىڭ ءرولى ەرەكشە. بۇگىندە «ارمان-PV» باسپاسى قىزىلوردا قالاسىمەن جانە وسى ۋنيۆەرسيتەتپەن ارىپتەسە وتىرىپ, ءبىلىم مازمۇنىن جاڭعىرتۋ باعىتىندا جۇيەلى جۇمىس جۇرگىزىپ كەلەدى. ۋنيۆەرسيتەت ءبىلىم مەن عىلىمدى, كىتاپحانا مەن زەرتتەۋ مادەنيەتىن ۇشتاستىرا وتىرىپ, زاماناۋي اكادەميالىق ورتانى قالىپتاستىرعان. مۇندا جاساندى ينتەللەكت نەگىزدەرى مەن تسيفرلىق تەحنولوگيالاردى مەڭگەرۋ باعىتىندا ناقتى تاجىريبە بار, ال ۋنيۆەرسيتەت عالىمدارى عىلىمي ويدى زاماناۋي تەحنولوگيالىق تاسىلدەرمەن بايلانىستىرا الاتىن كاسىبي تۇلعالار. وقۋلىقتاردى ازىرلەۋ بارىسىندا ءبىز وسى عالىمدارمەن بىرلەسە وتىرىپ, مازمۇندى تالقىلاپ, عىلىمي جانە ادىستەمەلىك تۇرعىدان اقىلداسا وتىرىپ جۇمىس ىستەيمىز.
وسى تۇرعىدا باسپا سالاسىنىڭ جاۋاپكەرشىلىگى ارتا تۇسەدى. سەبەبى كىتاپحانا مازمۇن ارقىلى ءومىر سۇرەدى. ال مازمۇننىڭ ساپاسى اۆتورلىق ۇجىمنىڭ كاسىبيلىگىنە, رەداكتسيالىق مادەنيەتكە, عىلىمي جانە ادىستەمەلىك نەگىزگە تىكەلەي بايلانىستى. قازاقستاندا بۇل جاۋاپكەرشىلىكتى جىلدار بويى ارقالاپ كەلە جاتقان باسپالار بار. سولاردىڭ ءبىرى – ءبىز, 25 جىلدان استام ۋاقىت بويى مەكتەپ وقۋلىقتارى مەن وقۋ-ادىستەمەلىك كەشەندەرىن ازىرلەپ كەلە جاتقان «ارمان-PV» باسپاسى. بۇل وقۋلىقتارمەن بىرنەشە بۋىن مۇعالىمدەرى جۇمىس ىستەپ, وقۋ ۇدەرىسىندە قولدانىپ كەلەدى.
قۇرىلتايدا تسيفرلاندىرۋ مەن جاساندى ينتەللەكت تاقىرىبى مادەنيەتپەن تىعىز بايلانىستا كوتەرىلدى. بۇل – ۋاقىت تالابىنان تۋعان, بىراق ءمانى تەرەڭ وي. تاريح پەن مادەني مۇرانى تسيفرلىق فورماتقا كوشىرۋ ۇلتتىق سانانى ساقتاۋدىڭ ماڭىزدى جولىنا اينالىپ وتىر. مۇندا مازمۇننىڭ جۇيەلىلىگى, دەرەكتىڭ انىقتىعى, تىلدىك ساپا ەرەكشە ماڭىزعا يە. ءبىلىم بەرۋ سالاسىندا بۇل تالاپ وقۋلىق مازمۇنىن دا جاڭا دەڭگەيگە كوتەرۋدى قاجەت ەتەدى.
پرەزيدەنت قولداعان «ۇلتتىق تسيفرلىق مۇرا» قورى وسى باعىتتاعى ماڭىزدى قادام بولماق. عىلىمي ەڭبەكتەردى, ارحيۆتىك ماتەريالداردى, مۋزەي قورلارىن, ونەر تۋىندىلارىن ءبىر جۇيەگە كەلتىرۋ – بولاشاققا ارنالعان ستراتەگيالىق ينۆەستيتسيا. بۇل باستاما ءبىلىم بەرۋ مازمۇنىنا دا تىكەلەي اسەر ەتەدى. قازىردىڭ وزىندە ءبىز 2025-2026 جانە 2026-2027 وقۋ جىلدارىنا ارنالعان جاڭا بۋىن وقۋلىقتارى مەن وقۋ-ادىستەمەلىك كەشەندەرىن ازىرلەۋ بارىسىندا وسى جۇيەلىلىك پەن ساپاعا ەرەكشە ءمان بەرىپ وتىرمىز.
سونىمەن قاتار بيىل دايىندالىپ جاتقان بارلىق وقۋلىق وقۋ-اعارتۋ مينيسترلىگى جانىنداعى ءبىلىم مازمۇنىن ساراپتاۋ ورتالىعىنىڭ ساراپتاماسىنان وتەدى. ورتالىق وقۋلىقتاردى سۇرىپتاپ, مازمۇنىن تەرەڭ تالداپ, اپروباتسيادان وتكىزىپ, ساپاسىنا كەشەندى تەكسەرىس جۇرگىزەدى.
اباي ىلىمىنە جاسالعان اكتسەنت تە ەرەكشە مانگە يە. «قارا سوزدەردى» يۋنەسكو-نىڭ «الەم جادى» تىزىمىنە ەنگىزۋ تۋرالى ۇسىنىس – ءسوز مادەنيەتىنە, وي تەرەڭدىگىنە, رۋحاني مۇراعا كورسەتىلگەن جوعارى قۇرمەت. بۇل قادام ۇلتتىق دۇنيەتانىمدى حالىقارالىق دەڭگەيدە تانىتۋعا جول اشادى جانە مەكتەپ باعدارلامالارىنداعى ءماتىن ساپاسىنا قويىلاتىن تالاپتى كۇشەيتەدى.
مەملەكەت باسشىسى ابايدىڭ «قارا سوزدەرىن» يۋنەسكو تىزىمىنە ەنگىزۋدى ۇسىندى
سونىمەن قاتار فيلوسوفيا, الەۋمەتتانۋ, ساياساتتانۋ باعىتىنداعى عىلىمي ويدى دامىتۋ, قوعامدىق پىكىردى قالىپتاستىراتىن ەڭبەكتەردى قولجەتىمدى ەتۋ تۋرالى ايتىلعان ويلار گۋمانيتارلىق ءبىلىمنىڭ ءرولىن ارتتىرا تۇسەدى. عىلىم مەن قوعام اراسىنداعى بايلانىستى نىعايتۋدا وقۋلىق پەن وقۋ ادەبيەتىنىڭ ورنى ەرەكشە.
ۇلتتىق قۇرىلتايدا كوتەرىلگەن باستامالاردىڭ بارلىعى ءبىر ارناعا توعىسادى. ول – ۇلتتىق مۇرانى ساقتاي وتىرىپ, ونى زاماناۋي فورماتتا ۇرپاققا جەتكىزۋ. بۇل ۇدەرىستە باسپا سالاسى ءبىلىم مەن مادەنيەتتىڭ سەنىمدى تىرەگىنە اينالۋى ءتيىس. «ارمان-PV» باسپاسى ءۇشىن بۇل كوپجىلدىق تاجىريبەگە سۇيەنگەن كاسىبي جولدىڭ جالعاسى.
مەملەكەت باسشىسى ايقىنداعان باعىت – ءبىز ءۇشىن كاسىبي باعدار, ورتاق جاۋاپكەرشىلىك. ۇلتتىق مازمۇندى ساپالى ۇسىنىپ, ءبىلىم كەڭىستىگىن دامىتۋ – بولاشاققا سالىنعان بەرىك نەگىز.
ديدارا الينا,
«ارمان-PV» باسپاسىنىڭ باس ديرەكتورى
