سۋرەتتى تۇسىرگەن – التىنبەك قارتاباي
شىنى وڭدەۋ ءوندىرىسىن دامىتۋعا دەن قويعان «Dala Glass» كومپانياسىنىڭ قۇرىلعانىنا ساناۋلى جىل عانا بولدى. از ۋاقىتتا اۋقىمدى جوبالاردى جۇزەگە اسىرۋعا دەن قويعان كومپانيا باسشىلىعى تاراز تورىندە دە شىنى وڭدەۋ ءوندىرىسىن وركەندەتىپ جاتىر. جاھاندىق دەڭگەيدەگى ءونىم شىعارۋعا باسىمدىق بەرگەن جاڭا زاۋىتتاعى جۇمىس قارقىنى كوڭىل توعايتادى.
زاۋىت ديرەكتورى قۋانىش سەرىكباەۆتىڭ ايتۋىنشا, جاڭا ءوندىرىس ورنىندا ءۇش بىردەي اۆتوماتتاندىرىلعان جەلى ورناتىلعان. مامان كەلتىرگەن دەرەككە جۇگىنسەك, شىنى كەسۋ, وڭدەۋ, كوپقاباتتى قاۋىپسىز شىنى ءوندىرۋ مەن شىنى پاكەتتەر جيناۋ جەلىسى ساپالى ءونىم شىعارۋعا بارىنشا مۇمكىندىك تۋعىزادى. مۇنداعى بارلىق قۇرال-جابدىق ۋاقىت سۇرانىسىنا ساي سۇرىپتالىپ الىنعان.
ء«بىز ءبىرىنشى كەزەكتە ساپالى ءونىم وندىرۋگە باسىمدىق بەرىپ وتىرمىز. ول ءۇشىن حالىقارالىق ستاندارتقا ساي جابدىقتار ساتىپ الدىق. الەمدىك دەڭگەيدەگى ءونىم شىعارۋ ءۇشىن قۇرال-جابدىقتار سول دەڭگەيگە ساي بولۋى كەرەك دەپ ەسەپتەيمىز. سوندىقتان بۇل ماسەلەگە ايرىقشا نازار اۋدارعانىمىزدى ايتا كەتكەن ءجون. قاجەتتى قۇرىلعىلاردى ساپاسىنا ساي بارىنشا زەرتتەدىك, زەردەلەدىك. نەگىزگى ماقسات – شىنىنى وڭدەۋ, قۇرىلىس پەن ينتەرەرگە ارنالعان زاماناۋي ەنەرگيا ۇنەمدەيتىن شەشىمدەر ۇسىنۋ. جۇمىسىمىزدى وسى باعىتتا وركەندەتۋگە دەن قويىپ وتىرمىز. ارينە, باسەكەگە قابىلەتتى ءونىم ءوندىرۋ ءۇشىن قولدان كەلگەنشە تەر توگىپ جاتىرمىز. بىزگە ەڭ ماڭىزدىسى – تۇتىنۋشى سۇرانىسىن قاناعاتتاندىرۋ. سوندا عانا نارىقتا ءوز ورنىمىزدى ايقىندايتىنىمىزعا بەك سەنىمدىمىن. الەمدىك دەڭگەيدەگى ءونىم شىعارۋ ءۇشىن قاعيداتىمىزدى بەرىك ۇستانامىز. العان باعىتىمىزدان اينىمايمىز», دەيدى زاۋىت ديرەكتورى.
جاڭا كاسىپورىن باسشىسىنىڭ ايتۋىنشا, سۋ جاڭا زاۋىتتا قىزمەتكەرلەردىڭ الاڭسىز جۇمىس ىستەۋىنە قولدان كەلگەنشە بارلىق جاعداي قاراستىرىلعان كورىنەدى. زاۋىتتىڭ جالپى اۋماعى 6 مىڭ شارشى مەتردى قۇراپ وتىر. مۇندا ەكى وندىرىستىك تسەح, كەڭسە عيماراتى مەن زاۋىت قىزمەتكەرلەرىنە ارنالعان بولمەلەر بار.
ء«بىزدىڭ زاۋىتتىڭ ءونىم وندىرۋدەگى قۋاتتىلىعى ايىنا 2 مىڭ شارشى مەتردى قۇرايدى. بۇل دەگەنىمىز جىلىنا 240 مىڭ شارشى مەتر دايىن ءونىم شىعارا الاتىن مۇمكىندىگىمىز بار دەگەن ءسوز. ناتيجەسىندە, جىلدىق قارجىلىق اينالىم 5 ملرد تەڭگەنى قۇرايدى. ارينە, العا قويعان اۋقىمدى جوسپارلار دا بارشىلىق. سول ويلارىمىزدى جۇيەلى تۇردە جۇزەگە اسىرۋ ءۇشىن ءالى ءبىراز جۇمىس ىستەيمىز. باستاپقى كەزەڭدە ءبىرىنشى تسەحتى تولىقتاي ىسكە قوسقانىمىزدى ايتا كەتكەن ءجون. ەلۋدەن استام جەرگىلىكتى ازامات تۇراقتى جۇمىس ورنىمەن قامتىلدى. ەكىنشى وندىرىستىك تسەح تولىق قۋاتىندا جۇمىس ىستەگەن كەزدە تاعى دا ەلۋ جۇمىس ورنى اشىلادى. سودان سوڭ, وندىرىلگەن اينەك تە, اقشالاي اينالىم دا ەكى ەسەگە ارتاتىنىنا سەنىمدىمىز», دەيدى ق.سەرىكباەۆ.
زاماناۋي اينەك ءوندىرىسىن وركەندەتۋگە دەن قويعان زاۋىت باسشىلىعى ەلىمىزدە جاسالعان ۇلتتىق ءونىمنىڭ ساپاسىن جاڭا دەڭگەيگە كوتەرۋگە باسىمدىق بەرىپ وتىر. سول ارقىلى وتاندىق برەندتى قالىپتاستىرساق دەگەن نيەتى بار.
«اۋقىمدى جوبا باستالعاننان باستاپ, ىسكە اسىرىلعانعا دەيىن ايرىقشا قولداۋ كورسەتكەن جەرگىلىكتى اتقارۋشى بيلىك وكىلدەرىنە العىس ايتامىز. ەلىمىزدە شىنى ونەركاسىبىن دامىتۋعا ايرىقشا كوڭىل ءبولىنىپ وتىرعانى كوڭىل قۋانتادى. ارينە, وتاندىق ءونىمدى ىشكى نارىقتا وتكەرگەننەن ەشكىم ۇتىلمايدى. ايتسە دە ءوز ەلىمىزدە وندىرىلگەن ءونىمدى كورشىلەس ەلدەرگە ەكسپورتقا شىعارۋدىڭ دا ماڭىزى زور. الداعى ۋاقىتتا وسى باعىتتا جۇمىستى جانداندىراتىن بولامىز», دەيدى زاۋىت ديرەكتورى.
قالاي دەسەك تە قازىر «Dala Glass» كاسىپورنىندا جۇمىس قارقىنى ۇدەي تۇسكەن. مۇندا ەڭبەك ەتىپ جاتقان جەرگىلىكتى ماماندار ساپالى ءونىم شىعارۋعا ايانباي تەر توگىپ جاتىر. زاۋىت قىزمەتكەرلەرى وندىرگەن ونىمگە دەگەن سۇرانىس تا ارتىپ وتىر.
تاراز
