فوتو: اقوردا
مەملەكەت باسشىسى قايعىلى وقيعاعا قاتىستى پىكىر ءبىلدىرىپ, قىز الىپ قاشۋ ادام ۇرلىعىنا تەڭ قىلمىس ەكەنىن اتاپ ءوتتى.
«كۇدىكتىنىڭ نۇرايدى اڭدىپ, مازا بەرمەي قوقان-لوققى كورسەتكەنى انىقتالىپ وتىر. اقىرى مۇنىڭ ارتى ادام ولىمىنە اكەپ سوقتىردى. وسىعان بايلانىستى ىشكى ىستەر مينيسترلىگىنە شىمكەنت قالالىق دەپارتامەنتىنە قۇقىقتىق باعا بەرۋدى تاپسىردىم. باس پروكۋرور دا بۇل ماسەلەنى مۇقيات تەكسەرەدى. قىز الىپ قاشۋ – ادام ۇرلاۋ دەگەن ءسوز. بۇل – ۇلتىمىزدىڭ بەدەلىنە نۇقسان كەلتىرەتىن ورەسكەل, جابايى قىلمىس. ونداي قاتىگەزدىككە ەشقاشان جول بەرۋگە بولمايدى», دەدى پرەزيدەنت.
ايتا كەتەيىك, قىزىلوردادا مەملەكەت باسشىسى قاسىم-جومارت توقاەۆتىڭ توراعالىعىمەن ۇلتتىق قۇرىلتايدىڭ V وتىرىسى ءوتىپ جاتىر.
پرەزيدەنت قۇرىلتايدا سويلەگەن سوزىندە ارال تەڭىزى ماسەلەسىنە توقتالىپ, ونىڭ جاھاندىق ماڭىزىن اتاپ ءوتتى.
ال مەملەكەتتىك كەڭەسشى ەرلان قارين بۋرابايداعى قۇرىلتايدان كەيىن 6 زاڭ قابىلدانىپ, 10 زاڭ جۇمىسقا الىنعانىن جەتكىزدى.
بۇعان دەيىن شىمكەنتتە كوپقاباتتى ءۇيدىڭ الدىنان جاس قىزدىڭ ءمايىتى تابىلعانىن جانە مارقۇمنىڭ تۋىستارى ءادىل سوت شەشىمىن تالاپ ەتكەنى تۋرالى حابارلاعانبىز.
