فوتو: Gov.kz
جاڭا سالىق كودەكسىندە وزىن-ءوزى جۇمىسپەن قامتىعاندار ءۇشىن, وڭايلاتىلعان دەكلاراتسيا نەگىزىندەگى رەجيم, شارۋا جانە فەرمەر قوجالىقتارى ءۇشىن ۇش ارناۋلى سالىق رەجيمى ەنگىزىلگەن.
«جاڭا سالىق كودەكسى اياسىندا ارناۋلى سالىق رەجيمدەرىنىڭ سانى قىسقارتىلدى, ياعني ولار ۇشكە دەيىن وڭتايلاندىرىلدى. بۇعان دەيىن ولاردىڭ سانى جەتى بولعان. قازىرگى تاڭدا ءۇش ارناۋلى سالىق رەجيمى قالدى. ءبىرىنشىسى – وڭايلاتىلعان دەكلاراتسيا نەگىزىندەگى ارناۋلى سالىق رەجيمى. ەكىنشىسى – ءوزىن-ءوزى جۇمىسپەن قامتىعاندارعا ارنالعان ارناۋلى سالىق رەجيمى. ءۇشىنشىسى – شارۋا جانە فەرمەر قوجالىقتارىنا ارنالعان ارناۋلى سالىق رەجيمى», دەدى مەملەكەتتىك كىرىستەر كوميتەتىنىڭ ارناۋلى سالىق رەجيمدەرىن اكىمشىلەندىرۋ باسقارماسىنىڭ باسشىسى ەرقانات شىڭبەرگەن.
كاسىپكەرلەر نەنى ءبىلۋى ءتيىس:
وڭايلاتىلعان دەكلاراتسيا نەگىزىندەگى ارنايى سالىق رەجيمى (اسر)
وسى رەجيمدى قولدانۋدى جوسپارلاپ وتىرعان سالىق تولەۋشىلەر 2026 جىلعى 1 ناۋرىزعا دەيىن قولدانىلاتىن سالىق سالۋ رەجيمى تۋرالى حابارلاما ۇسىنۋى قاجەت.
ەگەر كورسەتىلگەن مەرزىمدە حابارلاما ۇسىنىلماسا, سالىق تولەۋشىلەر 2026 جىلعى 1 قاڭتاردان باستاپ اۆتوماتتى تۇردە جالپىعا بىردەي بەلگىلەنگەن سالىق سالۋ تارتىبىنە اۋىستىرىلادى.
حابارلامانى قالاي جىبەرۋ كەرەك:
سالىق تولەۋشىنىڭ كابينەتى ارقىلى (اج ءسايج جۇيەسىندە «قۇجاتتاردى تاپسىرۋ» – «قولدانىلاتىن سالىق سالۋ رەجيمى تۋرالى حابارلاما» ءبولىمى).
«E-Salyq Business» ارنايى ءموبيلدى قوسىمشاسى ارقىلى («قىزمەت» – «جك سالىق سالۋ رەجيمىن وزگەرتۋ» ءبولىمى).
قاعاز نۇسقادا ورنالاسقان جەرى بويىنشا «مەملەكەتتىك كرەديتتىك بيۋرو» اق (مكب) ارقىلى;
بانكتەردىڭ ءموبيلدى قوسىمشالارى ارقىلى (قازىر بۇل سەرۆيس Kaspi Bank قوسىمشاسىندا «مەملەكەتتىك قىزمەتتەر» – «جك رەكۆيزيتتەرى مەن سالىق رەجيمىن وزگەرتۋ» بولىمىندە ىسكە اسىرىلعان) بەرۋگە بولادى.
ءوزىن-ءوزى جۇمىسپەن قامتىعاندارعا ارنالعان ارناۋلى سالىق رەجيمىنە كوشۋ
2026 جىلعى 1 ناۋرىزدان باستاپ سالىق ورگاندارى 2025 جىلى پاتەنت نەگىزىندەگى اسر نەمەسە ارنايى ءموبيلدى قوسىمشاسى ارقىلى اسر قولدانعان سالىق تولەۋشىلەردى جەكە كاسىپكەر رەتىندە ەسەپتەن اۆتوماتتى تۇردە شىعارادى. بۇل رەتتە سالىق تولەۋشىنىڭ ەسەپتەن شىعۋ تۋرالى ءوتىنىشتى ءوز بەتىنشە بەرۋ قۇقىعى ساقتالادى.
ەگەر سالىق تولەۋشى قولدانىلاتىن سالىق سالۋ رەجيمى تۋرالى حابارلاما تاپسىرىپ, وزگە رەجيمدى تاڭداعان جاعدايدا, ەسەپتەن شىعارىلمايدى. بۇل رەتتە ءوزىن-ءوزى جۇمىسپەن قامتىعاندارعا ارنالعان اسر قولدانا باستالعان كۇنى رەتىندە «E-Salyq Business» ءموبيلدى قوسىمشاسىندا العاشقى چەك ەنگىزىلگەن كۇن ەسەپكە الىنادى.
شارۋا جانە فەرمەر قوجالىقتارى (شفق) ءۇشىن ارناۋلى سالىق رەجيمىنە كوشۋ
اتالعان رەجيمگە كوشۋ 2026 جىلعى 1 ناۋرىزعا دەيىن سالىق ورگاندارى ارقىلى اۆتوماتتى تۇردە جۇزەگە اسىرىلادى. بۇل ساناتقا جاتاتىن كاسىپكەرلەردەن حابارلاما تاپسىرۋ تالاپ ەتىلمەيدى.
