سۋرەت: opennews.kz
رەسمي دەرەككە سۇيەنسەك, بۇگىنگى تاڭدا شىمكەنتتە 1 ميلليوننان استام ادام, ياعني حالىقتىڭ 81,7%-ى ءمامس جۇيەسىنە تىركەلگەن. ونىڭ ىشىندە جەڭىلدىك ساناتىنداعى 800 مىڭعا جۋىق ازاماتتىڭ جارناسىن مەملەكەت تولەپ وتىر. دەي تۇرعانمەن, قالادا جۇيەگە كىرمەي قالعان الەۋمەتتىك تۇرمىسى تومەن 55 362 ازامات بار. ءمامس-تەگى سوڭعى وزگەرىستەر ءدال وسى ساناتتاعى جانداردى قولداۋعا باعىتتالعان. مەملەكەت باسشىسىنىڭ تاپسىرماسىنا سايكەس, 2026 جىلدان باستاپ الەۋمەتتىك تۇرعىدان ءالسىز D, E ساناتىنداعى ازاماتتار مەديتسينالىق كومەككە جۇگىنگەن جاعدايدا, ولاردىڭ ساقتاندىرۋ جارناسىن جەرگىلىكتى اتقارۋشى ورگاندار تولەيتىن بولادى. ماماندار مۇنى وسال توپقا قولداۋ كورسەتۋدى كۇشەيتىپ, ولاردىڭ قاجەتتى ەمدى ۋاقتىلى الۋىنا جول اشاتىن ءتيىمدى رەفورما دەپ باعالاپ وتىر.
جۇيە ەنگىزىلگەلى بەرى شاھاردا مەديتسينالىق قىزمەتتەردىڭ ءورىسى كەڭەيدى. بۇگىندە شىمكەنتتە 177 مەديتسينالىق ۇيىم جۇمىس ىستەسە, ونىڭ 34-ءى مەملەكەتتىك, قالعانى – جەكەمەنشىك ەمحانالار. ەڭ باستىسى, ءار تۇرعىن وزىنە قولايلى دارىگەردى نەمەسە ەمدەۋ مەكەمەسىن قالاۋىنشا تاڭداي الادى. №1 قالالىق كلينيكالىق اۋرۋحاناسىنىڭ باس دارىگەرى باقىتجان ءپوزيلوۆتىڭ ايتۋىنشا, وتكەن جىلى اۋرۋحانادا 43 ناۋقاسقا ءمامس شەڭبەرىندە جوعارى تەحنولوگيالىق مەديتسينالىق كومەك كورسەتىلگەن. جالپى, سوڭعى ءبىر جىل ىشىندە مۇندا ساقتاندىرۋ جۇيەسىمەن 14 938 ناۋقاس ەمدەلىپ, ونىڭ 7 206-سىنا ءتۇرلى وپەراتسيا جاسالعان.
«قازىرگى ۋاقىتتا ءبىزدىڭ كلينيكالىق اۋرۋحانا 530 توسەك ورىننان تۇرادى. ستاتسيوناردا مىڭنان استام ادام, ونىڭ ىشىندە عىلىم كانديداتتارى مەن جوعارى ساناتتى دارىگەرلەر قىزمەت ەتەدى. مامانداردىڭ دەنى شەتەلدىك كلينيكالاردا بىلىكتىلىگىن ارتتىرىپ كەلگەن. اۋرۋحانا ەڭ وزىق دياگنوستيكالىق قۇرالدارمەن جابدىقتالعان. مۇندا اسقازان-ىشەك جولدارىنا, باۋىر, ءوت, وڭەشكە كۇردەلى وپەراتسيالار جاسالادى. دارىگەرلەرىمىز جامباس بۋىنىن اۋىستىرۋدى, ەندوپروتەزدەۋدى تولىق مەڭگەردى. بۇرىن مۇنداي قيىن وپەراتسيالاردى جاساتۋعا تۇرعىندار استانا, الماتى قالالارىنا نەمەسە شەتەلگە سابىلاتىن. قازىر ۋرولوگيا, بۇيرەك, ءزار شىعارۋ جولدارىنا قاتىستى وپەراتسيانىڭ بارلىق ءتۇرى وسىندا جاسالادى», دەيدى باس دارىگەر.
ەمحانادا قۇنى 995 ملن تەڭگە تۇراتىن جاڭا رەنتگەندىك انگيوگرافيالىق قوندىرعى ىسكە قوسىلعان. بۇل قۇرىلعى 3D كەسكىنىندە تامىرلاردى تەكسەرىپ, وپەراتسيا ۇستىندە كومپيۋتەرلىك توموگرافيا جاساۋعا مۇمكىندىك بەرەدى. وسىنىڭ كومەگىمەن ينسۋلت العان, مي تامىرلارى مەن باس ىسىكتەرى بار ناۋقاستارعا كۇردەلى وپەراتسيالار جاسالىپ كەلەدى. بۇگىنگە دەيىن دارىگەرلەر ترانسپلانتاتسيا بويىنشا كوپتەگەن وپەراتسيا جۇرگىزىپ, 244 بۇيرەك پەن 32 باۋىر اعزاسىن الماستىرعان.
ءمامس ناتيجەسىندە بۇرىن قولجەتىمسىز بولعان قىمبات وپەراتسيالار قاراپايىم حالىققا تەگىن جاسالا باستادى. ماسەلەن, بىلتىر شىمكەنتتە 1 جۇرەك, 17 بۇيرەك الماستىرىلدى. ولاردىڭ ارقايسىسىنىڭ قۇنى 10 ملن تەڭگەگە دەيىن بارادى. ال سوڭعى بەس جىلدا جۇرەك ورتالىعىندا 23 ناۋقاسقا قۇنى 77 ملن تەڭگە تۇراتىن جاساندى جۇرەك قويىلدى. قالتاسى كوتەرە بەرمەيتىن مۇنداي شىعىنداردى ساقتاندىرۋ قورى تولىق وتەپ, قانشاما ادامنىڭ ءومىرىن ۇزارتتى.
الەۋمەتتىك مەديتسينالىق ساقتاندىرۋ قورىنىڭ شىمكەنت قالاسى فيليالى ديرەكتورىنىڭ ورىنباسارى اراپكۇل ءىزباساروۆانىڭ مالىمدەۋىنشە, وتكەن جىلى مىڭعا جۋىق ناۋقاس جوعارى تەحنولوگيالىق كومەك العان. مامان ءمامس-ءتى جيناقتاۋشى جۇيەمەن شاتاستىرماۋ قاجەتتىگىن ەسكەرتەدى. ءاربىر ناۋقاس قانشا جارنا تولەسە دە, قاجەتتى مەديتسينالىق قىزمەتتىڭ كەز كەلگەن ءتۇرىن تولىق كولەمدە الۋعا قۇقىلى. سونىمەن قاتار ەمحانالار پاتسيەنتتەرگە ءمامس جۇيەسىندە جۇمىس ىستەيتىن جەكەمەنشىك كلينيكالارعا دا جولداما بەرە الادى. بۇل جاعدايدا قىزمەت قۇنى قور تاراپىنان تولەنەدى, ناۋقاس ەشقانداي شىعىن شىعارمايدى. ەگەر ناۋقاس قاجەتتى قىزمەتكە جولداما الا الماسا, ەمحانا جانىنداعى پاتسيەنتتەردى قولداۋ قىزمەتىنە نەمەسە قورعا رەسمي ءوتىنىش بىلدىرۋىنە بولادى.
شىمكەنت
