قازىر ەلىمىزدە ءجۇرىپ جاتقان ساياسي رەفورمانىڭ نەگىزگى ماقساتى – قوعامدى يگىلىككە, ادىلەتتىككە, ادامگەرشىلىككە, ەڭبەكقورلىققا, جاۋاپكەرشىلىككە, مەيىرباندىلىققا, ۇيلەسىمدىلىككە قاراي تابيعي, ساپالى وزگەرتۋ. بۇل – ءوز قولىمىزدان كەلەتىن, كۇشىمىز جەتەتىن ءىس. بارلىق سالانى (ەكونوميكا, ءوندىرىس, اۋىل شارۋاشىلىعى, ساياسات, قۇقىق, مادەنيەت, الەۋمەتتىك ينستيتۋتتار) تەرەڭ, ساپالى, ىرگەلى, جان-جاقتى رەفورمالاۋ – مەملەكەت, جاۋاپتى ورىندار ماڭداي تەرىنىڭ ولشەمى. وڭاي ەمەس, بىراق قايتارىمى مەن قايىرى مول جۇمىس. وزىقتارمەن تەڭەلۋ, ەلدىك تەگەۋرىن وسى جولدا.
تاريحي جولايىرىق – 2019 جىلى جۇمىسىن باستاعان ۇلتتىق قوعامدىق سەنىم كەڭەسى دە, قاڭتاردىڭ قاتاڭ ساباعىنان سوڭ 2022 جىلى ىسكە كىرىسكەن ۇلتتىق قۇرىلتاي دا ەل پرەزيدەنتى جانىنان قۇرىلدى. قوعامدىق سەنىم كەڭەسى ۇلتتىق قۇرىلتاي دەڭگەيىنە ءوستى دەسەك, اقىلعا سىيىمدى. قوعام سەنگەن زيالى تۇلعالار, ساياسي پارتيالار, ۇكىمەتتىك ەمەس ۇيىم كوشباسشىلارى, ازاماتتىق سەكتوردىڭ سارابدال وكىلدەرى ەنگەن بۇل ەلدىك قۇرىلىمنىڭ قۋاتى – حالىققا جاقىندىعىندا, وزەكتى ماسەلەنىڭ ءمانى مەن شەشىلۋ جولىن جۇيەلى بايىپتاۋىندا, ەڭ باستىسى, بيلىك پەن قوعام اراسىندا التىن كوپىر بولا بىلۋىندە.
ارينە, الەم مەن اينالا تولى قايشىلىق. بىراق قازاقستان قوعامىنىڭ قۇندىلىعى, قۇرىلىمى, ءپىشىنى, قوردالانعان زارۋلىگى كوبىمىزگە ءمالىم. سوندىقتان ۇلتتىق قۇرىلتاي مەن باسقا دا قوعامدىق ۇيىمدار قاجەتتى وزگەرىستىڭ تەتىگىن, ماسەلەنى شەشۋدىڭ امالىن قاراستىرۋعا الەۋەتى جەتەدى.
شەجىرەلى ۇلىتاۋدا, تۇعىرلى تۇركىستاندا, ۇلىق ۇلىس جۇرتى اتىراۋدا, حان-سۇلتان قونىسى بۋرابايدا وتكەن ۇلتتىق قۇرىلتاي جيىنىنىڭ ءاربىرى تاريح ولشەمىمەن قاراساق تا, بۇگىنگى جاڭارعان ۇلت پايىمىمەن سارالاساق تا ەلەۋلى ناتيجەگە قول جەتكىزدى.
پرەزيدەنت ق.ك.توقاەۆ ۇلىتاۋداعى قۇرىلتايدا جالپىۇلتتىق بىرلىكتى نىعايتۋ, ساياسي رەفورمالاردىڭ ءمان-ماڭىزى, جاڭا تەحنولوگيانىڭ مۇمكىندىكتەرى تۋرالى ايتا كەلىپ, جاڭاشىلدىق پەن ادىلەتتىكتىڭ, ەلدى ۇيىستىراتىن تاريحي جاد پەن زاماناۋي ىزدەنىستەردىڭ ءجون-جوباسىنا توقتالدى. قۇرىلتاي سەكتسيالارىندا دا وسى باعداردا وزەكتى ماسەلەلەر تالقىلاندى. جيىننان سوڭ جۇمىس كوميسسيالارى قوعاممەن بايلانىستى جانداندىرىپ, قانشاما يگى ىستەر اتقاردى. تۇركىستانداعى قۇرىلتايدا مەملەكەت باسشىسى ادىلەتتى قازاقستان مەن ادال ازامات ۇعىمىن, قۇندىلىعىن تالداپ-تارازىلادى. ەلدىك نىشانداردى جەتىلدىرۋ, تاريحي سانا-سەزىمدى جاڭعىرتۋ, مادەني مۇرامىزدى دارىپتەۋ, ۇرپاق تاربيەسى, ءتيىمدى اقپارات ساياساتى مەن كرەاتيۆتى يندۋستريا, ساياسي تالداۋ مەن ساراپتامانى ساپالاندىرۋ, ستراتەگيالىق اۋماقتاردى دامىتۋ, مەملەكەتتىك قىزمەت جاۋاپكەرشىلىگى جان-جاقتى بايىپتالدى. باسقوسۋدا كەلەلى ويلار ورتاعا سالىندى. قۇرىلتاي مۇشەلەرى مەن اتقارۋشى بيلىكتىڭ تۇركىستانعا رۋحاني زياراتى قاسيەتتى مەكەندە ەلشىلدىك پەن ەلدىك ءداستۇر الدىندا بەرگەن سەرتى دەپ قابىلداندى.
كونە سارايشىق جۇرتىندا (اتىراۋ) شاقىرىلعان قۇرىلتايدا قاسىم-جومارت كەمەل ۇلى ادالدىق قۇندىلىعىن جاۋاپتى اداممەن, ەڭبەكپەن, تابىسپەن بايلانىستا ءسوز ەتتى. رۋحانيات, ءتىل, كىتاپ وقۋ, اكادەميالىق تاريح كوپتومدىعى, ءداستۇرلى ءدىن مەن ءدىل, قاھارماندار ونەگەسى, قوعام كەسەلدەرى (لۋدومانيا, قۇمارپازدىق, ۆەيپ, ۆانداليزم, بۋللينگ ت.ب.), ەكونوميكالىق ىزدەنىس پەن سەرپىلىس, كوممۋنالدىق-ينجەنەرلىك جۇيەنى وڭداۋ, ساۋاتتى لوگيستيكا ت.ب. جاڭارۋدىڭ وزەكتى مىندەتىن ءتۇسىندىردى. سەكتسيالاردا قوردالانعان وي-ۇسىنىستار قورجىنى رەت-رەتىمەن تالقىلاندى.
مەملەكەت باسشىسى بۋرابايداعى قۇرىلتايدا جاڭا تۇرپاتتى وزگەرىستەردىڭ باستاپقى ناتيجەلەرى, ادىلەتتى سالىق رەفورماسىنىڭ ءمانى, الەۋمەتتىك جەلى مادەنيەتى, زاماناۋي ونەر قۋاتى, ەڭبەك نارىعىنداعى باسەكە, ەسىرتكىگە قارسى شارالار, تۇرمىستىق زومبىلىققا قارسى زاڭ, ء«بىرتۇتاس تاربيە» باعدارلاماسىن «ادال ازامات» قاعيداتى مەن اتاۋىنا سايكەستەندىرۋ, «قازاقستان بالالارى» ءبىرتۇتاس باعدارلاماسى, ونوماستيكا مەن ماراپاتتاعى بىرىزدىلىك پەن ساۋاتتىلىق, ىشكى ساياسات تۇجىرىمداماسىنىڭ زارۋلىگى, ابايدىڭ 180 جىلدىعى مەن دانا حاكىم ينستيتۋتىنىڭ وزەكتىلىگى, «الەم جادى» قورىنىڭ قازاق مازمۇنى, ۇلت تاريحى مەن جاھان وركەنيەتىن ۇيلەستىرۋ, سەرپىندى ەكونوميكالىق, يندۋستريالىق, ينۆەستيتسيالىق, لوگيستيكالىق جوبالار, ەل وڭىرلەرىن تەڭ دامىتۋ, ءىت باستامالار مەن جوبالاردىڭ جاڭا كەزەڭى سەكىلدى ماقسات-مىندەتتەردى ايقىندادى. قۇرىلتاي مۇشەلەرى ۇكىمەت پەن زاڭ شىعارۋشى قۇرىلىمنىڭ جاۋاپتى تۇلعالارىمەن بىرلەسە وتىرىپ, ماڭىزدى ماسەلەردى شەشۋدىڭ جولىن قاراستىردى.
قازاق ەلىنىڭ تاريحي ءتورت تاراپى اراسى مىڭداعان شاقىرىم جەر بولسا دا, ەل بىرلىگى مەن شەجىرەسى, ورتاق مۇرات پەن مۇددە ولاردى جاقىنداستىرىپ, جالعاستىرىپ تۇر. پرەزيدەنتىمىز ۇلىتاۋدا: «بابالارىمىز ماڭىزدى ماسەلەلەردى وسىنداي القالى جيىندا تالقىلاعان. حالىق اقىلداسا وتىرىپ, ءبىر توقتامعا كەلگەن» دەپ وتكەننىڭ تاعىلىمىن ەسكە السا, بىلتىر بۋرابايدا: ء«بىزدىڭ يدەولوگيامىز قاراپايىم ءارى تۇسىنىكتى. بۇل – جاھانداعى اسا كۇردەلى گەوساياسي احۋالدا ەلىمىزدى جاڭا دامۋ دەڭگەيىنە كوتەرۋ ءۇشىن بەرىك نەگىز قالاۋ دەگەن ءسوز» دەپ, بۇگىنگى ۇلتتىق ميسسيانىڭ باعدارىن انىقتاپ بەردى.
ەندىگى قۇرىلتاي جيىنى – ەجەلدەن ەل بەرەكەسىنە ۇيىتقى, سان وردانىڭ جوقشىسى قىزىلوردادا. ورتا تولسىن, وي قازىناسى ورەمىزدى بيىكتەتسىن.
