ەلىمىزدە ءدارى-دارمەك باعاسى قالاي رەتتەلىپ جاتىر؟

باعا رەتتەۋ ەرەجەلەرىنە قانداي وزگەرىستەر ەنگىزىلدى؟

2024 جىلعى 25 جەلتوقساندا دەنساۋلىق ساقتاۋ ءمينيسترىنىڭ №110 بۇيرىعىمەن تەگىن مەديتسينالىق كومەكتىڭ كەپىلدىك بەرىلگەن كولەمى (تمككك) جانە مىندەتتى الەۋمەتتىك مەديتسينالىق ساقتاندىرۋ ء(مامس) شەڭبەرىندە قولدانىلاتىن دارىلىك زاتتار مەن مەديتسينالىق بۇيىمداردىڭ شەكتى باعالارى مەن ۇستەمە باعالارىن قالىپتاستىرۋ قاعيدالارى جاڭارتىلدى.

ازاماتتار نەلىكتەن ءالى كۇنگە دەيىن تەگىن ءدارى-دارمەك الا الماي وتىر؟

اتاپ ايتقاندا, ماركەتينگ جانە كولىك شىعىندارى باعا قۇرامىنان الىنىپ تاستالدى. بۇل ءدارىنىڭ تۇپكى باعاسىنا تىكەلەي قاتىسى جوق شىعىنداردى پاتسيەنت ەسەبىنەن وتەمەۋگە مۇمكىندىك بەرەدى.

ۇستەمە باعالاردىڭ بىرىڭعاي رەگرەسسيۆتى شكالاسى ەنگىزىلدى:

• تمككك اياسىندا – 20 %,

• كوتەرمە ساۋدادا – 25 %,

• بولشەك ساۋدادا – 30 %.

بۇل شەكتەۋلەر ءدارىحانالار مەن جەتكىزۋشىلەردىڭ باعانى شامادان تىس كوتەرۋىنە توسقاۋىل قويادى.

سونىمەن قاتار رەفەرەنتتىك ەلدەر ءتىزىمى جاڭارتىلدى. ەندى قازاقستان ءدارى باعاسىن سالىستىرۋ كەزىندە ازەربايجان, بەلارۋس, بولگاريا, ماجارستان, قىرعىزستان, پولشا, رەسەي, سلوۆەنيا, تۇركيا جانە وزبەكستان دەرەكتەرىنە سۇيەنەدى.

حالىقارالىق دەرەكتەر بازاسى نەگىزىندە سىرتقى رەفەرەنتتىك باعا بەلگىلەۋ ەنگىزىلدى. بۇل ءۇشىن Navlin جانە IQVIA سياقتى حالىقارالىق پلاتفورمالار قولدانىلادى.

مينيسترلىكتىڭ مالىمەتىنشە, بۇرىن رەفەرەنتتىك ەلدەردەگى ەڭ تومەنگى ءۇش باعانىڭ ەڭ جوعارىسى الىناتىن بولسا, ەندى سول ءۇش باعانىڭ ورتاشا ءمانى ەسەپكە الىنادى. بۇل ءتاسىل شەكتى باعالاردى تومەندەتەدى.

دارىحانالارداعى كەزەك: ءدارى-دارمەك نەگە تەز تاۋسىلىپ جاتىر؟

بۇل وزگەرىستەر نە ءۇشىن قاجەت؟

مينيسترلىك قابىلدانعان شارالار ەڭ الدىمەن پاتسيەنت مۇددەسىن قورعاۋعا باعىتتالعانىن اتاپ وتەدى. رەفورمانىڭ نەگىزگى ماقساتى:

• ءدارى-دارمەك باعاسىنىڭ كۇرت وسۋىنە جول بەرمەۋ;

• ەم-دومنىڭ قولجەتىمدىلىگىن ساقتاۋ;

• باعا بەلگىلەۋ جۇيەسىنىڭ اشىقتىعى مەن ادىلدىگىن ارتتىرۋ;

• سالىق-بيۋدجەت رەفورماسى جاعدايىندا الەۋمەتتىك شيەلەنىستىڭ الدىن الۋ.

نەلىكتەن ءدارى-دارمەك باعاسى مەملەكەت باقىلاۋىندا؟

دەنساۋلىق ساقتاۋ مينيسترلىگىنىڭ تۇسىندىرۋىنشە, دارىلىك زاتتار الەۋمەتتىك ماڭىزى بار تاۋارلار ساناتىنا جاتادى. ولار ازاماتتاردىڭ دەنساۋلىعى مەن ءومىر ءسۇرۋ ساپاسىنا تىكەلەي اسەر ەتەتىندىكتەن, ولاردىڭ باعاسى ەركىن نارىققا تولىق جىبەرىلمەيدى جانە مەملەكەتتىك رەتتەۋگە جاتادى.