ءىس-شارا بارىسىندا قالامگەرلەر مەن ادەبيەتتانۋشىلار قازىرگى بالالار ادەبيەتىنىڭ دامۋ ۆەكتورى, جانرداعى جاڭا ۇردىستەر, سونداي-اق ادەبيەتتىڭ مادەني جانە كرەاتيۆتى يندۋستريالارمەن توعىساتىن وزەكتى باعىتتارى جونىندە پىكىر الماستى.
پانەلدىك تالقىلاۋ بالالار ادەبيەتىنىڭ بۇگىنگى بولمىسى مەن بولاشاعىن جاڭا قىرىنان سارالاۋعا مۇمكىندىك بەردى. كەزدەسۋ اياسىندا «بالالار ادەبيەتىنىڭ باعاندارى» سەرياسىمەن جارىق كورگەن وتەپبەرگەن اقىپبەك ۇلى, توقاش بەردياروۆ, بەيبىت قويشىباەۆ, سەرىكباي وسپان ۇلى, نۇرداۋلەت اقىش جانە بەيسەباي كىرىسباي ۇلىنىڭ تاڭداۋلى ەڭبەكتەرى كوپشىلىككە تانىستىرىلدى. سونىمەن قاتار, «بالالار كىتاپحاناسى» توپتاماسى اياسىندا جارىق كورگەن بەلگىلى جازۋشىلار قۋاندىق تۇمەنباي مەن ساۋلە دوسجاننىڭ جاڭا تۋىندىلارى وقىرمان نازارىنا ۇسىنىلدى.
جيىن بارىسىندا بالالار مەن جاسوسپىرىمدەر ادەبيەتى جانرلىق كەڭەسىنىڭ توراعاسى ەلدوس توقتارباي سوڭعى بەس ايدا اتقارىلعان جۇمىستار جونىندە ەسەپ بەرىپ, ادەبي پروتسەستى جۇيەلى تۇردە مونيتورينگتەۋ, جاس اۆتورلاردى قولداۋ جانە بالالار ادەبيەتىنىڭ ساپالىق دەڭگەيىن ارتتىرۋعا باعىتتالعان باستامالاردىڭ نەگىزگى ناتيجەلەرى مەن الداعى جوسپارلارىمەن ءبولىستى.
پانەلدىك سەسسيا قازاق بالالار جانە جاسوسپىرىمدەر ادەبيەتىنىڭ رۋحاني كەڭىستىگىن جاڭعىرتىپ, ءداستۇر مەن يننوۆاتسيا توعىسىنداعى تىڭ يدەيالاردى ورتاعا سالعان مازمۇندى مادەني ديالوگ الاڭىنا اينالدى.
