فوتو: acat.kz
ماگەررام ماگەرراموۆتىڭ ايتۋىنشا, ءاربىر ءتورتىنشى توناۋ, جول-كولىك وقيعاسى جانە وتباسىلىق-تۇرمىستىق زورلىق-زومبىلىق قۇقىقبۇزۋشىلىقتاردىڭ جارتىسىنان استامى ماس كۇيدە جاسالعان.
ول ەلىمىزدە ساۋدا نىساندارىنىڭ كامەلەتكە تولماعاندارعا الكوگولدىك ىشىمدىكتەردى ساتپايتىنىنا ەشكىم كەپىلدىك بەرمەيتىنىن, سەبەبى مۇنداي نىسانداردىڭ كوپتىگىنەن ولاردى فيزيكالىق تۇرعىدان تولىق باقىلاۋ مۇمكىن ەمەس ەكەنىنە توقتالدى.
«وسىعان بايلانىستى بۇرىن قولدانىستا بولعان, بالالار مەكەمەلەرى مەن ءبىلىم بەرۋ ۇيىمدارىنان 100 مەتر راديۋستا الكوگول ونىمدەرىن ساتۋعا تىيىم سالاتىن نورمانى قايتا ەنگىزۋ قاجەتتىلىگى ءپىسىپ-جەتىلدى. سونىمەن قاتار الكوگول ونىمدەرىن ساتاتىن ساۋدا نۇكتەلەرىنىڭ سانىن شەكتەۋ دە ماڭىزدى. قازاقستان حالىق پارتياسى الكوگول ونىمدەرىن مىندەتتى تاڭبالاۋدى ۇسىنادى. بۇل ەل اۋماعىندا الكوگولدى زاڭسىز ساتۋ فاكتىلەرىنىڭ بار-جوعىن نەعۇرلىم ناقتى قاداعالاۋعا مۇمكىندىك بەرىپ, قۇقىقبۇزۋشىلىقتاردىڭ الدىن الۋعا ىقپال ەتەدى», دەدى ماگەررام ماگەرراموۆ.
دەپۋتات اتالعان ماسەلەنى شەشۋ ءۇشىن الكوگول ونىمدەرىن مىندەتتى تسيفرلىق سايكەستەندىرۋ قۇرالدارىمەن تاڭبالاۋعا جاتاتىن تاۋارلار تىزبەسىنە ەنگىزۋدى, ونى ساتۋ ورىندارىن ناقتى ايقىنداپ, وزگە جەرلەردە الكوگول ساتۋعا جالپىعا بىردەي تىيىم سالۋدى, بولشەك ساۋدادا 20:00-دەن كەيىن ساتۋعا, مەيرامحانالاردا 22:00-دەن كەيىن ساتۋعا جانە ونلاين ساتۋعا تىيىم سالۋدى ۇسىندى.
ايتا كەتەيىك, بۇگىنگى ءماجىلىس وتىرىسىندا دەپۋتات تەمىر قىرىقباەۆ ءسابىز ەكسپورتىنا تىيىم سالۋعا قاتىستى شارۋالاردى الاڭداتىپ وتىرعان ماسەلەردى كوتەرىپ, پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارينگە ساۋال جولدادى.
ال «AMANAT» پارتياسى فراكتسياسىنىڭ مۇشەسى ءمۇتالى ابۇتالىپ ەل اۋماعىندا جاسىرىن باقىلاۋعا ارنالعان تەحنيكالىق قۇرىلعىلاردىڭ باقىلاۋسىز اينالىمى مەن جاڭا بۋىنداعى اۆتوموبيلدەر ارقىلى جەكە دەرەكتەردىڭ شەتەلگە كەتۋ قاۋپىنە نازار اۋداردى.
سونداي-اق دەپۋتات ەدىل جاڭبىرشين وڭىردەگى كاسىپكەرلەرمەن كەزدەسۋ بارىسىندا ارنايى رەەستردەن سەرتيفيكات الۋ ماسەلەسى قوزعالعانىن ايتتى.
