فوتو: اشىق دەرەككوز
Bloomberg دەرەگىنە قاراعاندا, وسى ايدا CPC Blend ماركالى قازاقستاندىق مۇناي تاۋلىگىنە نەبارى 800-900 مىڭ باررەل كولەمىندە جونەلتىلەدى. بۇل جەلتوقسان ايىنىڭ ورتاسىندا كۇتىلگەن دەڭگەيدەن شامامەن 45 پايىزعا از. الدىن الا جوسپارلانعان 45 تانكەردىڭ كەمىندە 21-ءى رەيستەن الىنىپ تاستالعان.
قازاقستاننىڭ مۇنايىن تاسىمالدايتىن تانكەرلەر شابۋىلعا ۇشىرادى
ماسەلەنىڭ ءتۇپ-توركىنى پورتتاعى كەمەلەردى قاتارلاپ قابىلداي الماۋىندا جاتىر. قالىپتى جاعدايدا مۇناي تاسيتىن كەمەلەر ارنايى ايلاقتارعا كەلىپ, قۇبىر ارقىلى مۇنايدى تىكەلەي بورتىنا قۇيادى. ال قازىر سول ايلاقتاردىڭ ءبىر بولىگى ىستەن شىققان. سونىڭ كەسىرىنەن پورت ءبىر مەزەتتە كوپ كەمە قابىلداي الماي, مۇناي تەڭىزگە ۋاقىتىندا جونەلتىلمەي وتىر.
جاقىندا اۋا رايىنىڭ قولايسىزدىعى جۇمىستاردى بىرنەشە رەت توقتاتتى. بۇعان قوسا, جوندەۋدەن شىعۋى ءتيىس ەكىنشى ايلاق ءالى ىسكە قوسىلعان جوق. قازىر تەك ءبىر ايلاق قانا جۇمىس ىستەپ تۇر, ونىڭ ءوزى ۇزىلىسپەن. ءۇشىنشى ايلاق وتكەن جىلدىڭ قاراشا ايىنىڭ سوڭىندا دروندار شابۋىلىنان زاقىمدانعان. ال قازاقستان مۇنايىن بۇرىنعى كولەمدە ەكسپورتتاۋ ءۇشىن پورتتا كەمىندە ەكى ايلاق قاتار جۇمىس ىستەۋى قاجەت, ءۇشىنشىسى ساقتىق قورى رەتىندە تۇرۋى ءتيىس.
دەرەككوزدەردىڭ ايتۋىنشا, پورتتاعى مۇناي ساقتايتىن قويمالار تولىپ كەتكەندىكتەن, قۇبىر ارقىلى كەلەتىن مۇنايدى قابىلداۋ دا ۋاقىتشا توقتاتىلعان. ياعني جەر قويناۋىنان وندىرىلگەن مۇنايدى تەڭىزگە شىعاراتىن ورىن بولماي قالدى.
وتكەن جىلى قازاقستان تاۋلىگىنە شامامەن 1,8 ملن باررەل مۇناي ءوندىردى. الايدا ەلدىڭ ىشكى تۇتىنۋى مەن كقك-دەن وزگە باعىتتار ارقىلى سىرتقا شىعارا الاتىن كولەمى سونىڭ جارتىسىنا عانا جەتەدى. سوندىقتان تەڭىزدەگى بۇل تۇيتكىل ۇزاققا سوزىلسا, مۇناي ءوندىرۋدى ازايتۋ قاۋپى بار.
يرانداعى احۋالعا بايلانىستى الەمدىك نارىقتا مۇناي باعاسى كۇرت ءوستى
تەڭىزگە شىقپاي قالعان مۇناي ازايعان سايىن ونىڭ باعاسى قىمباتتاي باستادى. نارىقتا CPC Blend ماركالى مۇناي تاپشى بولىپ, ءبىر جىلدان استام ۋاقىتتان كەيىن العاش رەت ۇستەمە باعامەن ساتىلا باستادى. كەيبىر پارتيالار Brent باعاسىنا باررەلىنە 1,20 دوللار قوسىپ وتكەن, ال كوپ كەلىسىم 60-80 تسەنت ارالىعىندا جاسالعان.
ادەتتە كقك ارقىلى تاسىمالداناتىن مۇنايدىڭ شامامەن 90 پايىزى قازاقستانعا تيەسىلى. رەسەي مۇنايى تاۋلىگىنە ورتا ەسەپپەن 150 مىڭ باررەل كولەمىندە جونەلتىلەتىن. الايدا كاسپي تەڭىزىندەگى لۋكويل نىساندارىنا دروندار شابۋىل جاساعاننان كەيىن بۇل باعىتتاعى تاسىمال دا كۇرت قىسقاردى.
قىسقاسى, ماسەلە مۇنايدىڭ جوقتىعىندا ەمەس, ونى تەڭىزگە شىعاراتىن جولدىڭ ۋاقىتشا تارىلۋىندا. پورت تولىق قالىپقا كەلمەيىنشە, قازاقستاندىق مۇناي ەكسپورتى دا وسى دەڭگەيدە شەكتەلە بەرمەك.
