ونىڭ ۇلتىمىزدىڭ ونەرىنە دەگەن قىزىعۋشىلىعى تۇركيا جەرىندە باستالىپتى. ستۋدەنت كەزىندە وسمان يمپەرياسىنىڭ تاريحىنا قىزىققانىن ايتادى. سول سەبەپتەن دە اكيرا 2015 جىلى تۇركيانىڭ ىستانبۇل قالاسىنا ات باسىن بۇرادى. وسى ساپارىندا دومبىرامەن تانىسادى. عاسىرلار بويى ءبىر حالىقتىڭ ءۇنىن, اڭسارى مەن ارمانىن الەمگە جەتكىزگەن قوڭىر دومبىرانىڭ ءۇنى جۇرەگىنە وشپەس اسەر سىيلايدى. «بىردە انكارادا جاپون ءتىلىن جاقسى بىلەتىن ءبىر جىگىتتىڭ ۇيىندە قوناقتا بولدىم. داستارقان باسىندا ءۇي يەسى مەنىڭ قۇرمەتىمە ارناپ كۇي شەرتىپ بەردى. سول ساتتە دومبىرانىڭ عاجاپ ءۇنى مەنىڭ قۇلاعىمدا تۇنىپ تۇردى. بۇعان دەيىن ءتۇرلى مۋزىكالىق اسپاپتاردا ويناپ كورگەن ەدىم, الايدا دومبىرانىڭ ءۇنى جۇرەگىمە بۇرىن-سوڭدى بولماعان سىر قالدىردى», دەيدى اعىنان جارىلىپ.
سودان باستاپ كۇنشىعىس ەلىنىڭ تۋماسى اكيرا دومبىرا ۇيرەنۋگە بەل بۋادى. ىزدەنگەن ادامعا ءبارى مۇمكىن ەكەن عوي. كوپ وتپەي ول بايقاۋلاردا دومبىراشى رەتىندە ونەر كورسەتە باستايدى. 2017–2021 جىلدار ارالىعىندا ىستانبۇلدا كونتسەرتتىك ساحنالارعا دومبىرامەن شىعادى. سونىمەن قاتار فيلمدەر مەن تەلەسەريالدارعا دا ءتۇستى. ونىڭ كۇي ورىنداۋ مانەرى مەن دومبىرانى تۇركىلىك كەڭىستىكپەن بايلانىستىرۋى تىڭدارمان نازارىن بىردەن اۋداردى. 2021 جىلى ەلىمىزدە وتكەن ەتنوستىق اسپاپتار ورىنداۋشىلارىنىڭ III حالىقارالىق «جاس تولقىن» بايقاۋىندا ول دومبىرا اتالىمى بويىنشا گران-پري يەگەرى اتاندى. بۇل جەڭىس ونىڭ ونەر جولىنداعى ماڭىزدى بەلەسكە اينالدى. كەيىن ونىڭ ورىنداۋىنداعى كۇيلەر الەۋمەتتىك جەلىلەردە كەڭىنەن تارالىپ, ءتۇرلى تەلەباعدارلاماعا قاتىسۋىنا جول اشتى. تانىمال كۇيشى سەكەن تۇرىسبەكوۆپەن بىرگە «اقجاۋىن» كۇيىن ورىنداپ, ءوز قابىلەتىن كاسىبي كۇيشىگە باعالاتتى. سونداي-اق ايگىلى نوعاي ءانشىسى ارسلانبەك سۇلتانبەكوۆپەن ءبىر ساحنادا ونەر كورسەتىپ, تۇركى حالىقتارىنىڭ رۋحاني بىرلىگىن مۋزىكا ارقىلى ايگىلەدى.
