قانداسىمىزدىڭ قارسىلاسى, 32 جاستاعى تيحۋانا قالاسىنىڭ تۋماسى سپورتتىڭ بۇل تۇرىمەن بوزبالا شاعىنان شۇعىلدانىپ كەلەدى. 2011 جىلدان بەرى ءتۇرلى جارىسقا قاتىسىپ ءجۇر. سول ارالىقتا 34 كەزدەسۋ وتكىزىپ, 23 رەت جەڭىسكە جەتتى. 16 باسەكەدە ايقىن باسىمدىق تانىتتى. جەتى رەت ۇتىلىپ, ەكى جەكپە-جەكتە تەڭ ەسەپ تىركەلدى. مەكسيكالىق مارعاسقانىڭ UFC-دە كۇش سىناسىپ جۇرگەنىنە 10 جىلعا جۋىقتادى. بۇل رەتتە دە ەلەۋلى تابىستارعا قول جەتكىزدى. 2021 جىلدىڭ ماۋسىمىندا برازيليالىق دەيۆيسون فيگەيرەدۋدى قىلقىندىرىپ تاستاپ, پروموۋشەننىڭ چەمپيوندىق اتاعىن ولجالادى. ارادا جەتى اي وتكەن سوڭ ءدال سول فايتەردەن ۇتىلىپ, التىن بەلبەۋدەن ايىرىلدى. 2023 جىلدىڭ قاڭتارىندا فيگەيرەدۋمەن تاعى دا ايقاستى. بۇل جولى مورەنونىڭ مەرەيى ۇستەم بولىپ, چەمپيوندىق ءتاجدى قايتا يەلەندى. بىراق «ادام ولتىرگىش بالا» (برەندوننىڭ بۇركەنشىك ەسىمى) سول جىلدىڭ شىلدە ايىندا برازيليانىڭ بەتكەۇستارى الەشاندرە پانتوجاعا ەسە جىبەرىپ, تۇعىردان ءتۇستى.
برەندون مورەنونىڭ UFC-دەگى رەكوردى – 11 جەڭىس, 6 جەڭىلىس, 2 رەت تەڭ ءتۇستى. سوڭعى رەت ول بىلتىرعى 6 جەلتوقساندا لاس-ۆەگاستا جاپو-نيالىق تاتسۋرا تايرادان ويسىراي ۇتىلدى. سوعان قاراماستان قازىر برەندون UFC-ءدىڭ رەيتينگىندە 5-ورىندا تۇر.
ا.الماباەۆ – جامبىل وبلىسى, سارىسۋ اۋدانىنىڭ تۋماسى. جاسى 31-دە. سپورتتىق مانسابىن 2013 جىلى باستادى. سول ارالىقتا 26 رەت وكتاگونعا شىعىپ, 23 مارتە مەرەيى ۇستەم بولدى. 13 قارسىلاسىن ەسىنەن تاندىردى. UFC-دەگى رەكوردى – 6 جەڭىس, 1 جەڭىلىس. ەكى جارىم جىلدان اسا ۋاقىت ارالىعىندا «زۇلفيكار» (اسۋدىڭ بۇركەنشىك ەسىمى) ودە وسبورن (يامايكا), سي-دجەي ۆەيگارا (اقش), حوسە دجونسون (اقش), ماتەۋس نيكولاۋ (برازيليا), حوسە وچاو (پەرۋ), الەكس پەرەز (اقش) سىندى سپورتشىلاردى سابادى. اسۋدىڭ ءالى تەك مانەل كاپەگە (پورۋگاليا) جەتپەدى. قانداسىمىز سوڭعى ەكى جەكپە-جەگىن جارقىن جەڭىسپەن اياقتادى. بۇل كۇندەرى الماباەۆ UFC رەيتينگىندە 7-ورىندى ەنشىلەپ وتىر.
