سۋرەت: kaz.inform.kz
سۇحباتتىڭ نەگىزگى وزەگىن قازاقستاننىڭ ساپالىق جاڭعىرۋ كەزەڭىنە ءوتۋى تۋرالى تۇجىرىم قۇرايدى. مەملەكەت باسشىسى قازىرگى دامۋ ۇدەرىسىن جەكەلەگەن كورسەتكىشتەرمەن شەكتەمەي, قۇرىلىمدىق وزگەرىستەرگە نەگىزدەلگەن ۇزاقمەرزىمدى جول رەتىندە سيپاتتايدى. پرەزيدەنتتىڭ ايتۋىنشا, ەكونوميكالىق ءوسىم حالىقتىڭ ءومىر ساپاسىن ارتتىرۋعا قىزمەت ەتۋگە ءتيىس. وسى تۇرعىدا ينفلياتسيا, باعا تۇراقتىلىعى, حالىقتىڭ ساتىپ الۋ قابىلەتى ماسەلەلەرىنە ەرەكشە نازار اۋدارىلادى. بۇل مەملەكەت باسشىسىنىڭ الەۋمەتتىك جاۋاپكەرشىلىككە نەگىزدەلگەن پراگماتيكالىق ۇستانىمىن ايقىن كورسەتەدى.
سۇحباتتا اقپاراتتىق ساياسات پەن قوعامدىق سانا ماسەلەسىنە دە ايرىقشا ءمان بەرىلەدى. مەملەكەت باسشىسى ءداستۇرلى ءباسپاسوزدىڭ قوعامداعى ءرولىن جوعارى باعالاپ, ساپالى, تەرەڭ تالداۋعا نەگىزدەلگەن جۋرناليستيكانىڭ ماڭىزىن اتاپ وتەدى. پرەزيدەنت الەۋمەتتىك جەلىلەردەگى ءۇستىرت ءارى ەموتسياعا قۇرىلعان اقپاراتتىڭ كوبەيگەنىن سىنعا الىپ, سانالى قوعام قالىپتاستىرۋ ءۇشىن جاۋاپتى اقپارات كەڭىستىگى قاجەت ەكەنىن ايقىن جەتكىزەدى.
وسى ارنادا مەملەكەت باسشىسى تاريحي سانا ماسەلەسىنە ارنايى توقتالادى. پرەزيدەنت كەز كەلگەن ەلدىڭ, سونىڭ ىشىندە قازاقستاننىڭ دا ءتول تاريحى قايشىلىققا تولى ەكەنىن اتاپ ءوتىپ, تاريحي دەرەكتەردى بۇرمالاۋ مەن ناقتى قۇجاتتارمەن دالەلدەنبەگەن تۇلعالاردى شامادان تىس ۇلىقتاۋدى اقىلعا قونبايتىن قۇبىلىس رەتىندە باعالايدى. كەيىنگى جىلدارى تاريحتى تالقىلاۋدىڭ سانگە اينالۋى – حالىقتىڭ وتكەنگە دەگەن قىزىعۋشىلىعىن كورسەتەتىن قۇپتارلىق ءۇردىس. الايدا مەملەكەت باسشىسى بۇل قىزىعۋشىلىقتىڭ عىلىمي دالدىكپەن جانە جاۋاپكەرشىلىكپەن ۇشتاسپاي وتىرعانىنا الاڭداۋشىلىق بىلدىرەدى. ويدان شىعارىلعان دەرەكتەر مەن جالعان باتىرلاردى دارىپتەۋ قوعامدى اداستىرىپ, تاريحي اقيقاتتان الىستاتاتىنى قاتاڭ ەسكەرتىلەدى.
پرەزيدەنتتىڭ پايىمىنشا, تاريح قوعامدى داۋلاستىراتىن ەمەس, كەرىسىنشە, ۇيىستىراتىن قۇندىلىققا اينالۋعا ءتيىس. بولاشاققا ۇمتىلعان ءبىرتۇتاس ۇلت رەتىندە ءبىز وتكەنىمىزدى جاساندىلىقسىز, قاز-قالپىندا قابىلداۋعا ءتيىسپىز. اقيقاتقا نەگىزدەلگەن تاريحي تانىم عانا وتكەننەن تاعىلىم الىپ, كەمشىلىكتەردى تۇزەتۋگە جانە بولاشاققا سەنىممەن قادام باسۋعا مۇمكىندىك بەرەدى.
وسى تاريحي-رۋحاني ۇستانىم مەملەكەت باسشىسىنىڭ اباي قۇنانباي ۇلى مۇراسىن جۇيەلى تۇردە دارىپتەۋ ساياساتىمەن تىكەلەي ساباقتاس. پرەزيدەنت ابايدى قوعامداعى كەمشىلىكتەردى بۇكپەسىز ايتىپ, ۇلتتى «تولىق ادام» بولۋعا باستايتىن ويشىل رەتىندە باعالايدى. ۇلى اقىننىڭ «قارا سوزدەرى» ەڭبەكقورلىققا, بىلىمگە, ادامگەرشىلىككە ۇندەيتىن قۇندىلىقتارى بۇگىندە دە وزەكتىلىگىن جوعالتقان جوق. مەملەكەت باسشىسىنىڭ پىكىرىنشە, ءمان-ماعىناسىز پىكىرتالاستار مەن نەگىزسىز سوزدەردەن گورى, اباي ءىلىمى ۇرپاققا ناقتى رۋحاني باعدار بەرەدى.
سۇحباتتا قوزعالعان تاعى ءبىر ماڭىزدى باعىت – زاماناۋي تەحنولوگيالار مەن جاساندى ينتەللەكت ماسەلەسى. پرەزيدەنت تسيفرلىق دامۋ مەن تەحنولوگيالىق ىلگەرىلەۋدى ەلدىڭ باسەكەگە قابىلەتتىلىگىن ارتتىراتىن ستراتەگيالىق فاكتور رەتىندە باعالاي وتىرىپ, ولاردىڭ ادامگەرشىلىكپەن جانە ۇلتتىق قۇندىلىقتارمەن ۇيلەسۋى قاجەتتىگىن اتاپ وتەدى. بۇل تۇرعىدا ابايدىڭ «اقىل, قايرات, جۇرەك» قاعيداسى قازىرگى زامانعا بەيىمدەلگەن رۋحاني باعدار رەتىندە ۇسىنىلادى.
قورىتىندىلاي كەلە, مەملەكەت باسشىسىنىڭ بۇل سۇحباتى ەلىمىزدىڭ جاڭعىرۋ جولىنداعى كەشەندى كوزقاراسىن ايقىن كورسەتەدى. پرەزيدەنت ەكونوميكالىق ءوسىمدى الەۋمەتتىك ادىلەتتىلىكپەن, تاريحي اقيقاتتى رۋحاني جاۋاپكەرشىلىكپەن, تەحنولوگيالىق دامۋدى ادامي قۇندىلىقتارمەن ساباقتاستىرا وتىرىپ, سانالى ءارى باسەكەگە قابىلەتتى ۇلت قالىپتاستىرۋدى باستى ماقسات رەتىندە بەلگىلەيدى. بۇل سۇحبات – ەلدىڭ بولاشاعىنا باعىتتالعان پاراساتتى, جۇيەلى جانە جاۋاپتى مەملەكەتتىك ساياساتتىڭ ايقىن كورىنىسى.
كەنجەحان ماتىجانوۆ,
م.اۋەزوۆ اتىنداعى ادەبيەت جانە ونەر ينستيتۋتىنىڭ باس ديرەكتورى, اكادەميك
