فوتو: جي
ۆيتسە-مينيستر كوممۋنالدىق ينفراقۇرىلىمدى تۇراقتى پايدالانۋدىڭ, جۇيەلى باسقارۋدىڭ, باقىلاۋدىڭ جانە شىعىنداردى ازايتۋ باعىتىندا اتقارىلىپ جاتقان شارالار تۋرالى باياندادى.
ۇلتتىق جوبا اياسىندا سۋ ارنالارى كاسىپورىندارىنىڭ پروتسەستەرىن كەزەڭ-كەزەڭىمەن اۆتوماتتاندىرۋ كوزدەلىپ وتىر.
2026-2028 جىلدارى 3,6 ملن-نان استام «اقىلدى» سۋ ەسەپتەۋ قۇرىلعىلارىن ورناتۋ جوسپارلانعان. بۇل سۋ شىعىندارىن ايتارلىقتاي وڭتايلاندىرۋعا جانە جابدىقتىڭ قىزمەت ەتۋ مەرزىمىن ۇزارتۋعا مۇمكىندىك بەرەدى.
«وتاندىق جانە حالىقارالىق ساراپشىلارمەن بىرگە استانا, شىمكەنت, ورال, ەكىباستۇز, شاحتينسك سىندى 5 قالاداعى سۋ ارنالارى قىزمەتىنىڭ جۇمىسىن باعالاۋ جۇرگىزىلدى. ناتيجەسىندە پروتسەستەردى وڭتايلاندىرۋ بويىنشا ۇسىنىستار دايىندالدى, ءبىرتۇتاس تسيفرلىق شەشىمدەردى جانە كەزەڭ-كەزەڭىمەن ەنگىزۋدى قاراستىراتىن تەحنيكالىق-ەكونوميكالىق نەگىزدەمەنى دايىنداۋ ءۇشىن تاپسىرما ازىرلەندى. سۋمەن جابدىقتاۋ اسپاپتارىن ورناتۋ بويىنشا وتىنىمدەردى قالىپتاستىرۋ ماقساتىندا اكىمدىكتەر مەن تابيعي مونوپوليا سۋبەكتىلەرىمەن جۇمىس جۇرگىزىپ جاتىر», دەدى قۋاندىق قاجكەنوۆ.
سونىمەن قاتار مەملەكەت باسشىسىسىنىڭ 2025 جىلعى 8 قىركۇيەكتەگى جولداۋى اياسىندا سۋ سەكتورىنا حالىقارالىق تاجىريبەنىڭ وزىق ۇلگىلەرىن ەنگىزۋدى تاپسىرعان. وسى ماقساتتا بىلتىر ءىرى حالىقارالىق جەلىلىك وپەراتورلار – Veolia, Suez جانە Aqualia كومپانيالارىمەن ىنتىماقتاستىق تۋرالى مەموراندۋمدارعا قول قويىلدى. قۋاندىق قاجكەنوۆتىڭ ايتۋىنشا, مۇنداعى ماقسات اكتيۆتەردى بەرۋ ەمەس, مەملەكەت باقىلاۋىن ساقتاي وتىرىپ, باسقارۋشىلىق قۇزىرەتتەر مەن حالىقارالىق ۇزدىك تاجىريبەلەردى ەنگىزۋگە باعىتتالعان. قازىرگى ۋاقىتتا ەلىمىزدىڭ سۋ ينفراقۇرىلىمىن باسقارۋداعى تاجىريبەسى مەن قۇزىرەتتىلىگىن كەڭەيتۋ ءۇشىن بىرنەشە ازيالىق كومپانيامەن كەلىسسوزدەر جالعاسىپ جاتىر.
ايتا كەتەيىك, قۋاندىق قاجكەنوۆ بۇگىنگى ۇكىمەت وتىرىسىندا ەلىمىزدىڭ بارلىق ەلدى مەكەنى 100% اۋىز سۋمەن قامتىلعانىن جەتكىزدى.
بىلتىر ەل وڭىرلەرىندەگى بىرنەشە ەلدى مەكەنگە تازا اۋىز سۋ بەرىلگەنىن حابارلاعانبىز. ماسەلەن, وتكەن جىلى شالعايداعى اقباستىعا سۋ جەتىپ, سىر ءوڭىرى اۋىز سۋ ماسەلەسىن تولىق شەشتى.
سونداي-اق, ۇلىتاۋ وبلىسىنداعى كەڭگىر اۋىلى گازعا قوسىلىپ, تازا اۋىز سۋمەن قامتىلدى.
ماڭعىستاۋدا دا اۋىز سۋ تاپشىلىعى جوق ەكەنى حابارلاندى.
