اباي ايماعامبەت ەسىمى كوپشىلىككە ءداستۇرلى اڭگىمەلەرىمەن تانىلىپ, قازاق ادەبيەتىنىڭ قورجىنىنا «بەسىنشى جاتاقحانا», «بىلتە شامنىڭ جارىعى», «بۇرىلىسقا جارتى قادام قالعاندا» سىندى كىتاپتار سالعان جازۋشى. وسىدان بىرەر جىل بۇرىن ارىپتەسىمىزدىڭ «بۇرىلىسقا جارتى قادام قالعاندا» اتتى رومانى كەمەل توقاەۆ اتىنداعى دەتەكتيۆ جانرىندا وتكەن ادەبي بايقاۋدان باس جۇلدە العان ەدى. ەندى, مىنە, اباي ايماعامبەتتىڭ كەزەكتى «تولقىندى كۇتكەن بالا» اتتى شىعارماسى مادەنيەت جانە اقپارات مينيسترلىگى مەن جازۋشىلار وداعىنىڭ «جاڭا قازاقستاننىڭ ادەبي-تانىمدىق پانوراماسى» اتتى جوباسى اياسىندا جارىق كورىپ وتىر.
اۆتور بۇل تۋىندىسىندا ارال تەڭىزىنىڭ قاسىرەتتى تاعدىرىن وزەك ەتىپ, 1960–1980 جىلدارى ارالىعىندا ۇلتىمىزدىڭ باسىنان وتكەن تاريحتى تەڭىزدىڭ تارتىلۋ تراگەدياسىمەن استاستىرا اڭگىمەلەيدى. ياعني جاس قالامگەر تولقىنى جاعانى ۇرعان تەڭىزدى كۇتكەن بالانىڭ اڭسارىن ارال بويىنداعى شىنايى ءومىردى بايلانىستىرا وتىرىپ بوياماسىز سۋرەتتەگەن.
جالپى العاندا, وسىعان دەيىن جىپ-جىلى تۋىندىلارىمەن وقىرمان كوڭىلىن ارباعان قالامگەر ارتىق ايتىپ, كەم تۇسپەي, ءار سويلەمىن تارازىعا ەكشەپ پايدالانعانىن بايقادىق. سوندىقتان دا سۋى تارتىلىپ, ورنىندا تاۋ-تاۋ قۇمى قالعان ارال تاعدىرىنا, سول ولكەگە قاتىستى وقيعالار مەن اڭىزدارعا جان بىتىرگەن جازۋشىنىڭ تالابىنا وقىرمان رەتىندە ريزاشىلىق بىلدىرەمىز. ەكولوگيالىق اپاتقا ۇشىراپ, زامانا سالعان زارداپقا بەلشەسىنەن باتقان حالىقتىڭ ءۇنى ادەبي شىعارمادان ەستىلدى. بۇل ءۇن ارالدىڭ اقيقاتى مەن ارال اپاتىنا بەرىلگەن ادەبي باعا بولارىنا سەنەمىز.
