فوتو: اشىق دەرەككوز
نورۆەگيا نوبەل كوميتەتىنىڭ حابارلاۋىنشا, سىيلىقتى باسقا ادامعا بەرۋ نەمەسە كەرى قايتارىپ الۋ تەتىگى قاراستىرىلماعان.
«نوبەل بەيبىتشىلىك سىيلىعىنىڭ لاۋرەاتىن ماراپاتتان ايىرۋ مۇمكىن ەمەس. الفرەد نوبەلدىڭ وسيەتىندە دە, نوبەل قورىنىڭ جارعىسىندا دا مۇنداي مۇمكىندىك كورسەتىلمەگەن. نوبەل قورى جارعىسىنىڭ 10-پاراگرافىنا سايكەس, «سىيلىق بەرۋ تۋرالى شەشىم شاعىمدانۋعا جاتپايدى». ستوكگولم مەن وسلوداعى بىردە-ءبىر نوبەل كوميتەتى بۇرىن-سوڭدى بەرىلگەن سىيلىقتى قايتارىپ الماعان», دەدى كوميتەت مۇشەلەرى.
كوميتەت سونىمەن بىرگە لاۋرەاتتارعا سىيلىق تابىستالعاننان كەيىن ولاردىڭ ساياسي مالىمدەمەلەرى مەن ءىس-ارەكەتتەرىنە باعا بەرمەيتىنىن اتاپ ءوتتى. نوبەل كوميتەتىنىڭ وكىلەتتىگى تەك بەلگىلى ءبىر جىلداعى سىيلىقتى تاعايىنداۋعا دەيىنگى كەزەڭمەن شەكتەلەدى.
بۇعان دەيىن ماريا كورينا ماچادو 2025 جىلى وزىنە بەرىلگەن نوبەل بەيبىتشىلىك سىيلىعىن دونالد ترامپقا تاپسىرۋدى قالايتىنىن ايتقان. ول مۇنى ترامپتىڭ «دەموكراتيالىق قۇقىقتار ءۇشىن تىنىمسىز كۇرەسى» جانە ۆەنەسۋەلانىڭ دەموكراتياعا وتۋىنە قوسقان ۇلەسىمەن ءتۇسىندىردى.
6 قاڭتاردا ماچادو «مەن بۇل سىيلىقتى وعان جەكە تابىستاپ, ۆەنەسۋەلالىق حالىق ونى ونىمەن بولىسكىسى كەلەتىنىن ايتقىم كەلەدى» دەگەن. ونىڭ ايتۋىنشا, ول لاۋرەاتتار 2025 جىلعى 10 قازاندا جاريالانعان ساتتەن باستاپ بۇل ماراپاتتى ترامپقا سىيلايمىن دەپ نيەتتەنگەن. سونىمەن بىرگە ول سول كۇننەن بەرى اقش پرەزيدەنتىمەن سويلەسپەگەنىن دە مالىمدەدى.
ايتا كەتەيىك, اقش-تىڭ ۆەنەسۋەلا پرەزيدەنتى نيكولاس مادۋروعا قارسى اسكەري وپەراتسياسىنان كەيىن, ونى ەلدەن شىعاردى.
ماچادو باستاعان وپپوزيتسيا مادۋرو تۇتقىندالعان جاعدايدا بيلىكتى ءوز قولىنا الۋعا دايىن ەكەنىن جاريالادى. ال 3 قاڭتاردا دونالد ترامپ ماچادونىڭ ەلدى باسقارۋ مۇمكىندىگىنە كۇمان كەلتىرىپ, ونىڭ «ەلدە جەتكىلىكتى قولداۋى مەن بەدەلى جوق» ەكەنىن ايتقان.
