حالىق قالاۋلىسى كاسىپكەرلەردى جۇمىلدىرىپ, ءبىر وتباسىنىڭ ءۇيىن قايتا جوندەپ بەرۋگە ۇيىتقى بولىپتى. جاڭاتالاپتىق اعايىندار دەپۋتاتتىڭ ازاماتتىعىنا ءدان ريزا. ا.زەينەتاەۆ سول كەزدە الەۋمەتتىك جەلىدەگى پاراقشاسىندا: «وسىدان ءبىراز ۋاقىت بۇرىن جاڭاتالاپ ەلدى مەكەنىندە ءتىلسىز جاۋ ەكى بىردەي وتباسىنىڭ باسپاناسىن شارپىدى. ءبىرىنشى ءۇي تولىقتاي ورتەنىپ, جاناما ورنالاسقان ەكىنشى ءۇيدىڭ تەك قابىرعاسى عانا قالعان. بۇل جاعداي ۇزاق جىلدار بويى ءوز كۇشىمەن باسپانا تۇرعىزعان وتباسىلارعا اۋىر سوققى بولدى. «Amanat» پارتياسى تۇران اۋداندىق فيليالىنىڭ توراعاسى ءارى قالالىق ءماسليحات دەپۋتاتى رەتىندە ورتتەن زارداپ شەككەن ەكى وتباسى مۇشەلەرىن قابىلداپ, وقيعا ورنىنا باردىم. جاعدايمەن جاقىن تانىسىپ, زارداپ شەككەن جاندارعا مورالدىق ءارى ماتەريالدىق قولداۋ كورسەتۋ ماسەلەسىن تالقىلادىق. جەرگىلىكتى تۇرعىندار ءوزارا ۇيىمشىلدىق تانىتىپ, ءبىرىنشى وتباسىعا كومەك جيناۋدى باستاپ كەتىپتى. ءبىز بەلسەندى ازاماتتارمەن, كاسىپكەرلەرمەن بىرلەسە وتىرىپ, ەكىنشى باسپانانى تۇرعىزۋعا اتسالىساتىن بولىپ كەلىستىك. مۇنداي ساتتە ەلدىڭ بىرلىگى مەن جاناشىرلىعى ايقىن سەزىلەدى. بىرلىگىمىز بەكەم, جۇرەگىمىز مەيىرىمگە تولى بولسىن!» دەپ جازدى.
بۇگىندە ورتكە ورانعان ءۇي اعايىن-تۋىس, جاڭاتالاپ تۇرعىندارى كومەگىنىڭ ارقاسىندا قايتا سالىنىپ, ادامدار تۇرىپ جاتىر. جانىندا ورنالاسقان كورشى باسپانانىڭ جوندەۋ جۇمىستارى بىتۋگە تاياۋ. ءۇي يەسى وتباسىمەن ازىرگە جاقىن ماڭداعى ساياجايدى پانالاپ وتىر.
«جاڭاتالاپ ەلدى مەكەنىنىڭ جاڭا قۇرىلىس اۋماعىنان ءۇي سالعان ەدىم. ءوزىم جۇك كولىگىن ايدايمىن. كۇزدىڭ ورتا كەزى ەدى. سىرتتا كولىك جوندەپ جاتقانمىن. ءبىر كەزدە ۇيدەن ءورت شىقتى. ابىروي بولعاندا كەلىنشەگىم جۇمىستا, بالا-شاعام مەكتەپتە ەدى. كورشىلەردى شاقىرىپ كەلگەنشە جالىن كۇشەيىپ بوي الدىرماي كەتتى. ءورت قاسىمداعى كورشىمنىڭ دە ءۇيىن شارپىپ ۇلگەردى. ازىرگە ءورتتىڭ شىعۋ سەبەبى نەدەن ەكەنى بەلگىسىز بولىپ وتىر. جالپى, قاۋىپسىزدىك شارالارىنىڭ ءبارىن جاساعانمىن. بۇل دا ءبىر جازاتايىم وقيعا, باسقا تۇسكەن سىناق. حالىققا راحمەت. بىردەن كومەك قولدارىن سوزىپ, قارجىلاي جاردەمدەرىن كورسەتتى. اعايىن-تۋىس, ەلدىڭ كومەگىنىڭ ارقاسىندا ءۇيىمدى قايتا تۇرعىزىپ, از ۋاقىتتا ىشىنە كىرىپ الدىم. بىرلىك بولسا كەز كەلگەن قيىندىقتى ەڭسەرۋگە بولادى. سوعان كوزىم انىق جەتتى», دەيدى ورتتەن زارداپ شەككەن ءنىشانالى زياقۇلوۆ.
ءورت شالعان ۇيلەردى قايتا سالىپ, جوندەۋگە كاسىپكەرلەردى جۇمىلدىرۋعا, قايىرىمدىلىق جۇمىستارىن ۇيىمداستىرىپ, سول وكرۋگتەن سايلانعان دەپۋتاتقا ءمان-جايدى جەتكىزۋگە تۇران اۋداندىق اكىمدىگى دە زور كومەك كورسەتتى.
ا.زەينەتاەۆ باستاعان قايىرىمدى جاندار وتقا ورانعان ءۇيدىڭ جانىنداعى باسپانانى قايتا جوندەۋگە جاردەمدەسىپ, ءبىراز قۇرىلىس جۇمىستارىن اتقارىپ بەردى. ەسىك الدىن بەتونمەن تەگىستەپ, ءۇيدىڭ قاسبەتىن تاقتاتاسپەن ارلەدى, شاتىرىن جاپتى. ەندى ءۇيدىڭ ىشكى ارلەۋ جۇمىستارىن تولىق جاساپ بەرۋگە ۋادەلەسىپ وتىر. ىشكى قۇرىلىس جۇمىستارىنىڭ باعاسى شىعارىلىپ, جۇمىسشىلارمەن ارنايى كەلىسىم جاسالىپتى. جۇمىستار كوپ كۇتتىرمەي باستالادى.
جالپى, حالىق قالاۋلىلارىنىڭ قايىرىمدىلىق كومەكتەرى ءبىر مۇنىمەن شەكتەلىپ قالماعان. شىمكەنت قالالىق ءماسليحاتىنىڭ توراعاسى باحادىر نارىمبەتوۆتىڭ ايتۋىنشا, دەپۋتاتتار بۇدان باسقا دا تالاي ساۋاپتى ىستەرگە ۇيىتقى بولىپ ءجۇر. ولاردىڭ باستاماسىمەن الەۋمەتتىك جاردەمگە مۇقتاج بىرنەشە وتباسى باسپانالى بولىپتى.
شىمكەنت
