شاعان كەنتى وبلىس ورتالىعىنان 75 شاقىرىم قاشىقتىقتا ورنالاسقان. بۇگىندە ەلدى مەكەندە 569 ادام تۇرادى. ونداعى سۋ قۇبىرى جەلىلەرىنىڭ قۇرىلىس جوباسى 2024 جىلى باستالىپ, وتكەن جىلدىڭ سوڭىندا تولىق اياقتالدى. جوبا اياسىندا 1, 2 كوتەرگىش سورعى ستانسالارى, كتپن قوندىرعىسى, سۋ تازارتۋ جۇيەسى, تازا سۋعا ارنالعان رەزەرۆۋارلار سالىندى. بۇعان قوسا, جالپى ۇزىندىعى 19 شاقىرىمدى قۇرايتىن سۋ قۇبىرى جەلىلەرى تارتىلدى. سونىڭ ناتيجەسىندە, كەنت تۇرعىندارى ساپالى ءارى تازا اۋىزسۋمەن تولىق قامتاماسىز ەتىلدى. سونىمەن قاتار جاڭا سۋ قۇبىرىنىڭ ەلدى مەكەننىڭ ءورت قاۋىپسىزدىگىن ارتتىرۋعا دا مۇمكىندىگى زور.
بۇعان دەيىن ەلدى مەكەندە ورتالىقتاندىرىلعان سۋ قۇبىرى مۇلدە بولماعان ەكەن. اۋىل تۇرعىندارى سۋدى ۇڭعىمالار مەن كولونكالار ارقىلى تاسىپ كەلگەن. جاڭا نىساننىڭ ىسكە قوسۋ سالتاناتىنا قاتىسقان وبلىس اكىمى بەرىك ءۋالي اۋىل تۇرعىندارىنىڭ ءومىر ءسۇرۋ ساپاسىن ارتتىرىپ, ءوڭىردىڭ الەۋمەتتىك ينفراقۇرىلىمىن دامىتۋعا سەرپىن بەرەتىنىن ايتتى.
«مەملەكەت باسشىسىنىڭ حالىقتى ساپالى اۋىزسۋمەن قامتاماسىز ەتۋ جونىندەگى تاپسىرماسىنا سايكەس وڭىردە 33 جوبا جۇزەگە اسىرىلىپ جاتىر. سونىڭ ءبىرى بۇگىن سىزدەردىڭ اۋىلدارىڭىزدا ىسكە قوسىلدى. جولدىڭ بويىندا ورنالاسقان شاعان اۋىلىنىڭ بولاشاعى زور. كۋرچاتوۆ قالاسى دا جاقىن. بۇل شاھارعا قازىر ەرەكشە ءمان بەرىلىپ, عىلىم ورتالىعى بولايىن دەپ جاتىر. شاعان اۋىلى كەشە عانا «تازا قازاقستان» باعدارلاماسى اياسىندا جاريالانعان «ۇلگىلى اۋىل» بايقاۋىندا جەڭىمپاز اتانىپ, وبلىسىمىزدىڭ ۇزدىك 20 اۋىلىنىڭ قاتارىنا ەندى. اۋىلعا قاجەت جاڭا تراكتورعا يە بولدى. بۇل – ۇلكەن جەتىستىك, اۋىل حالقىنىڭ بەرەكە-بىرلىگىنىڭ ايعاعى. اۋىلدارىڭىز ءوسىپ, وركەندەي بەرسىن», دەدى ءوڭىر باسشىسى.
اۋىل تۇرعىندارى سۋ قۇبىرىنىڭ پايدالانۋعا بەرىلگەنىنە ريزاشىلىقتارىن ءبىلدىردى. ايتا كەتەيىك, وتكەن جىلى جاڭاسەمەي اۋدانىنىڭ العاباس, پريرەچنوە اۋىلدارىنا دا اۋىزسۋ بەرىلدى.
اباي وبلىسى
