7 قاڭتاردا شىمكەنت قالاسىنىڭ پوليتسيا دەپارتامەنتى جەدەل ءىس-شارالار ناتيجەسىندە جانار-جاعارماي ماتەريالدارىن زاڭسىز شىعارۋ ارناسىن ۇيىمداستىرعان ادامدار توبىن ۇستادى. قىلمىستىق سحەماعا مۇناي وڭدەۋ زاۋىتىمەن بايلانىستى كاسىپورىنداردىڭ ءبىرىنىڭ قىزمەتكەرلەرى تارتىلىپ, ولار مەگاپوليس تۇرعىندارىمەن ءسوز بايلاسقان.
ۇرلانعان وتىندى قىلمىستىق سحەمانى ۇيىمداستىرۋشىلارعا تيەسىلى بىرنەشە بازانىڭ اۋماعىندا ساقتاۋ جانە ساتۋ فاكتىلەرى انىقتالدى. قاراجاتتىڭ كولەڭكەلى اينالىمى 1 ميلليارد تەڭگەدەن اسادى.
ءتىنتۋ كەزىندە ۇلكەن كولەمدە اقشا, 17 توننادان استام جانار-جاعارماي, وتىندى ساقتاۋ جانە ايداۋ قۇرالدارى, سونداي-اق بىرنەشە اۆتوكولىك تسيستەرناسى تاركىلەندى. بارلىق كۇدىكتى ۇستالىپ, اسا ءىرى كولەمدە ۇرلىق فاكتىسى بويىنشا تەرگەۋ جۇرگىزىلىپ جاتىر.
قىلمىستىق ءىس اياسىندا شىمكەنت مۇناي وڭدەۋ زاۋىتى قىزمەتكەرلەرىنىڭ قىلمىسقا, ونىڭ ىشىندە كونترابانداعا قاتىسى بار-جوعى تەكسەرىلىپ جاتىر. بۇل باعىتتاعى جۇمىس جالعاسادى.
