ەلىمىزدە تەك شەتەلدىكتەر كىرە الاتىن كازينولار سالىنادى

ال ەل ازاماتتارىنا اتالعان ويىن الاڭدارىنا كىرۋگە تىيىم سالىنادى. 

مينيسترلىكتىڭ مالىمەتىنشە, الەمدىك تاجىريبە بىرقاتار ەلدە تەك شەتەلدىكتەرگە ارنالعان ويىن ايماقتارىنىڭ بولۋى تۋريستەردى تارتۋدىڭ جانە كۋرورتتىق ينفراقۇرىلىمدى دامىتۋدىڭ ءتيىمدى تەتىگىنە اينالعانىن كورسەتىپ وتىر.

مۇنداي تاجىريبە ىشكى الەۋمەتتىك ورتاعا كەرى اسەر ەتپەي, ەكونوميكالىق وسىمگە وڭ ىقپال ەتكەن. زەرتتەۋ قورىتىندىسىنا سايكەس, ماڭعىستاۋ وبلىسى تۇرعىندارىنىڭ 46%-ى شەتەلدىكتەرگە ارنالعان كازينو سالۋ باستاماسىن قولداعان.

ەكونوميكالىق بولجام بويىنشا, 2029 جىلعا قاراي وڭىرگە 148 مىڭ شەتەلدىك تۋريست كەلەدى دەپ كۇتىلەدى. بۇل 7 مىڭ تۇراقتى جۇمىس ورنىنىڭ اشىلۋىنا جانە بيۋدجەتكە 1,2 ملرد تەڭگە سالىق ءتۇسىمىن قامتاماسىز ەتۋگە مۇمكىندىك بەرەدى.

جەتىسۋ وبلىسىندا ساۋالناماعا قاتىسقانداردىڭ 67 پايىزى كازينو قۇرىلىسىنا قارسى ەمەس ەكەنىن بىلدىرگەن. بولجام بويىنشا, 2029 جىلعا قاراي ءوڭىر جىل سايىن 36 مىڭعا دەيىن شەتەلدىك تۋريست قابىلداپ, شامامەن 700 جاڭا جۇمىس ورنى اشىلادى. جەرگىلىكتى بيۋدجەتكە جىلىنا 2,4 ملرد تەڭگە سالىق تۇسەدى دەپ بولجانىپ وتىر.

الماتى وبلىسىندا رەسپوندەنتتەردىڭ 54,5 پايىزى ويىن ايماقتارىن سالۋ باستاماسىن قولدايتىنىن اتاپ وتكەن. ەكونوميكالىق تالداۋعا سايكەس, 2030 جىلعا قاراي وڭىرگە كەلەتىن شەتەلدىك تۋريستەر سانى 22 810 ادامعا جەتەدى. سونىمەن قاتار 2028 جىلعا دەيىن ەكى ويىن ايماعىنان 6,5 ملرد تەڭگە سالىق ءتۇسىپ, 2 مىڭ تۇراقتى جۇمىس ورنى اشىلادى.

ايتا كەتەيىك, ويىن ايماقتارىن بەلگىلەۋ جانە ولاردىڭ قىزمەتى «ويىن بيزنەسى تۋرالى» قازاقستان رەسپۋبليكاسىنىڭ زاڭىنا سايكەس جۇزەگە اسىرىلادى. ايماقتاردىڭ ناقتى شەكاراسىن جەرگىلىكتى اتقارۋشى ورگاندار ايقىندايدى. ال جۇمىس تارتىبىنە سايكەس, ويىن ورىندارىنا تەك شەتەل ازاماتتارى عانا كىرە الادى.