بىرەۋ ونى عىلىمعا قارجى رەتىندە سالادى, تاعى بىرەۋى ونەرگە جۇمسايدى, ەندى بىرەۋى تۋعان-تۋىسى مەن وتباسىنىڭ قاجەتىن وتەۋگە بەرەدى. 1 ميلليون دوللاردان اساتىن جۇلدە قارجىسىنا ءتىپتى كەيبىرەۋى ۇلكەن ءۇي ساتىپ الىپتى. ۇلى فيزيك البەرت ەينشتەين نوبەل سىيلىعىن الارىنان ەكى جىل بۇرىن – 1919 جىلى-اق ونىڭ اقشاسىن بۇرىنعى زايىبى ميلەۆا ماريچكە بەرۋگە ۋادە ەتىپتى. سىيلىق قارجىسى قولىنا تۇسكەننەن كەيىن عالىم بەرگەن ۋادەسىندە تۇردى. ال يرلانديالىق قالامگەر سەميۋەل بەككەت (1969 جىلعى سىيلىق يەگەرى) جۇلدە قارجىسىن دوستارىنا تاراتىپ بەرگەن. دوستىقتى بيىك باعالاعان كىسىنىڭ ءىس-ارەكەتى دە وسىلاي بولاتىن شىعار.
ال عىلىم سالاسى بويىنشا نوبەل العان كوپتەگەن عالىم سىيلىق اقشاسىن عىلىم مەن قوعام يگىلىگىنە جۇمساۋدى ءجون كورىپتى. امەريكالىق نەيروبيولوگ پول گرينگارد اناسىنىڭ قۇرمەتىنە پيورل مەيستەر گرينگارد اتىنداعى جۇلدە قورىن قۇرعان. ول بيومەديتسينالىق زەرتتەۋلەر سالاسىنداعى ايەل عالىمداردى ماراپاتتاۋعا باعىتتالعان. سونىمەن بىرگە نەمىس بيولوگى كريستيان نيۋسلياين-فولحارد بالا كۇتىمى مەن تۇرمىستىق كومەك ءۇشىن ايەل عالىمدارعا گرانت بەرەتىن ورتالىق اشقان. امەريكالىق كوسمولوگ دجون مازەر استرونوميا جانە كوسمولوگيا سالاسىنداعى ستۋدەنتتەرگە ارنالعان ستيپەنديا باعدارلاماسىن ازىرلەگەن.
اتالعان ۇلكەن ماراپاتتى يەلەنگەن قالامگەرلەر سىيلىق اقشاسىن قايدا جۇمساعانى تۋرالى ايتالىق. البەر كاميۋ فرانتسيانىڭ ءبىر بۇرىشىنان جايلى ءۇي الىپ, شىعارماشىلىقپەن اينالىسىپتى. ال يۋدجين ءو’نيلدىڭ كاليفورنيادا شىعىس ستيلىندەگى شىعارماشىلىق ءۇي سالدىرعانىن بىلدىك. وسىلايشا, نوبەل سىيلىعىنىڭ قارجىسى يەگەرىنىڭ قالاۋىنا ساي كادەگە جارايدى.
