سۋرەت: instagram.com/turkistan_oblysy
ءالي بەكتاەۆ پەن مۇرات قادىربەك تۇركىستان قالاسى مەن وتىرار اۋدانىندا بولدى. سەناتورلار تۇركىستاندا «Turan» ارنايى ەكونوميكالىق ايماعىنىڭ اۋماعىندا ورنالاسقان «التىن دالا ماقتا» مەن «Turkestan تextile» وندىرىستىك نىساندارىنىڭ جۇمىسىمەن تانىسىپ, ەڭبەك ۇجىمدارىمەن كەزدەستى. كەزدەسۋدە ولار پارلامەنتتىڭ سەسسياسى كەزىندە قابىلدانعان, كاسىپكەرلىكتى دامىتۋعا باعىتتالعان زاڭدار تۋرالى, وندىرىستىك ايماقتىڭ ينۆەستيتسيالىق احۋالىن جاقسارتۋدىڭ, ەكسپورتتىق الەۋەتىن ارتتىرۋدىڭ ماڭىزىن ايتتى.
سونداي-اق دەپۋتاتتار تۇركىستان قالاسىنىڭ اكتيۆىمەن كەزدەسىپ, وندا قالانىڭ الەۋمەتتىك-ەكونوميكالىق دامۋى, ينفراقۇرىلىمدى جاڭعىرتۋ, اۋىل شارۋاشىلىعىن قولداۋ, قۇقىقتىق جۇيەنى جەتىلدىرۋ مەن حالىقتىڭ ءومىر ءسۇرۋ ساپاسىن ارتتىرۋ ماسەلەلەرىن تالقىلادى. كەزدەسۋ بارىسىندا تۇركىستاننىڭ ەرەكشە مارتەبەسى تۋرالى زاڭدى ىسكە اسىرۋ اياسىندا الاش قوزعالىسىنىڭ قايراتكەرلەرىنە ارنالعان مۇراجاي اشۋ تۋرالى باستاما كوتەرىلدى. سەناتورلار تاريحي-رۋحاني مۇرانى ساقتاۋ ءىسىن ۇكىمەتپەن بىرلەسىپ قولعا الاتىندارىن جەتكىزدى.
وتىرار اۋدانىندا سەناتورلار ىسكە اسىرىلىپ جاتقان ينۆەستيتسيالىق جوبالارمەن, ونىڭ ىشىندە «تۇركىستان ماقتا اگروونەركاسىپتىك كەشەنى» كوپفۋنكتسيونالدى كەشەننىڭ قۇرامىنداعى زاماناۋي ماقتا وڭدەۋ زاۋىتىن ارالادى. ولاردىڭ ايتۋىنشا, كاسىپورىن قازىر زاماناۋي اگروتەحنولوگيالاردى ەنگىزىپ, سۋ رەسۋرستارىن ءتيىمدى پايدالانۋعا ىقپال ەتىپ, ءوڭىردىڭ الەۋمەتتىك-ەكونوميكالىق دامۋىنا ۇلەس قوسىپ وتىر. جالپى, اۋىل-ايماقتاردا سۋ ۇنەمدەۋ تەحنولوگياسىن دامىتۋ اۋىل شارۋاشىلىعى تاۋارىن وندىرۋشىلەرگە, ءوڭىر ەكونوميكاسىن ارتاراپتاندىرۋعا, جاڭا جۇمىس ورىندارىن قۇرۋعا زور ىقپال ەتەدى.
ال سەناتور نۇرتورە ءجۇسىپ ت.جۇرگەنوۆ اتىنداعى ۇلتتىق ونەر اكادەمياسىنىڭ باسشىلىعىمەن, پروفەسسور-وقىتۋشىلار قۇرامىمەن كەزدەسىپ, ونەر سالاسىن دامىتۋ ماسەلەلەرىن تالقىلادى. دەپۋتات اكادەميا ەلىمىزدەگى نەگىزگى زياتكەرلىك, شىعارماشىلىق ورتالىق, سونداي-اق ۇلتتىق ونەر مەكتەبىنىڭ ۇستاسى ەكەنىن اتاپ ءوتتى. ونىڭ ايتۋىنشا, مۇندا بولاشاق ساحنا, ەكران مەن بەينەلەۋ ونەرى شەبەرلەرىنىڭ كوركەم ويى, كاسىبي مادەنيەتى, ازاماتتىق جاۋاپكەرشىلىگى قالىپتاسادى. سەناتور ونەر سالاسىنا بىلىكتى مامان دايارلاۋ ماسەلەسىن دە العا تارتتى.
«كوركەمدىك ءبىلىم بەرۋ جۇيەسىنىڭ الدىندا كاسىبي داعدىنى جەتكىزۋ عانا ەمەس, ۇلتتىق بىرەگەيلىكتى ساقتاي وتىرىپ, جاھاندىق كەڭىستىكتە جۇمىس ىستەي الاتىن مادەني جاۋاپتى, باسەكەگە قابىلەتتى تۇلعانى قالىپتاستىرۋ مىندەتى تۇر. وقىتۋشىلار, ولاردىڭ ماماندىققا دەگەن تالاپشىلدىعى مەن ادالدىعى بولاشاق وتاندىق ونەردىڭ ساپاسىن ايقىندايدى. قازىر ءبىلىم باعدارلامالارىن جاڭارتۋ, وقىتۋدىڭ پراكتيكالىق قۇرامداس بولىگىن كۇشەيتۋ مەن تەاتر, كينوستۋديا, مۇراجايلار مەن حالىقارالىق مادەني ينستيتۋتتارمەن ىقپالداسۋ وزەكتى بولىپ وتىر. بۇل مەملەكەت پەن كاسىبي قوعامداستىقتىڭ ءوزارا تىعىز ءىس-قيمىلىن تالاپ ەتەدى», دەدى دەپۋتات.
سونىمەن قاتار سەناتور التىنبەك نۇح ۇلى بۇقار جىراۋ اتىنداعى پاۆلودار وبلىستىق ادەبيەت جانە ونەر مۇراجايىندا بولدى. ول مەكەمەنىڭ قىزمەتىمەن, كەيىنگى جىلدارى تابىلعان جاڭا ەكسپوناتتارمەن, جۇزەگە اسىپ جاتقان تسيفرلىق جوبالارمەن تانىستى. ەۆاكۋاتسيا, ءورت قاۋىپسىزدىگى, كۇزەت, كليماتتىق ەرەكشەلىك جانە ساقتاۋ جاعدايى بويىنشا تالاپتارمەن قوسا مۇراجايلارعا ۇلتتىق قاۋىپسىزدىك ستاندارتتارىن ازىرلەۋ ماسەلەلەرى قارالدى. سەناتور ۇجىمنىڭ ايتىلعان ۇسىنىستارىن ودان ءارى پىسىقتاۋعا الىپ, ولاردىڭ ىسكە اسىرىلۋىنا قولداۋ كورسەتۋگە دايىن ەكەنىن اتاپ ءوتتى.
بۇعان قوسا ا.نۇح ۇلى ەكىباستۇز قالاسىنىڭ اكىمى ايان بەيسەكينمەن كەزدەسىپ, ەكىباستۇز قالالىق ءماسليحاتىنىڭ سەسسياسىنا قاتىستى. وندا قالانىڭ ءبىر جىلداعى الەۋمەتتىك-ەكونوميكالىق دامۋىنىڭ قورىتىندىسى شىعارىلىپ, مەملەكەت باسشىسىنىڭ وڭىرلىك ينفراقۇرىلىمدى جاڭارتۋ, حالىقتىڭ ءومىر ءسۇرۋ ساپاسىن ارتتىرۋ, ەكولوگيالىق قاۋىپسىزدىكتى قامتاماسىز ەتۋ جانە جاستارعا جاڭا مۇمكىندىك جاساۋعا باعىتتالعان تاپسىرمالارىن ىسكە اسىرۋ ماسەلەلەرى قارالدى. سەناتور ءماسليحات دەپۋتاتتارىنا قالا دامۋىنىڭ وڭ سەرپىنىن ساقتاۋعا باعىتتالعان مىندەتتەردى تابىستى ىسكە اسىراتىنىنا سەنىم ءبىلدىردى.
