فوتو: istockphoto.com
پرەزيدەنتتىڭ ايتۋىنشا, جاڭا تەحنولوگيا داۋىرىندە وركەنيەتتى ەل بولىپ قالۋدىڭ بىردەن-ءبىر جولى – تسيفرلاندىرۋ مەن جاساندى ينتەللەكتىنى كەڭىنەن ەنگىزۋ.
«قازاقستان تسيفرلىق دەرجاۆاعا اينالۋى كەرەك. بۇل – قازىرگى جاڭا تەحنولوگيا داۋىرىندە وركەنيەتتى ەل بولىپ قالۋدىڭ بىردەن-ءبىر جولى. حالقىمىزدىڭ وي-ساناسى مۇنداي يننوۆاتسيالارعا دايىن ەكەنىنە سەنىمدىمىن. ونىڭ ۇستىنە, قازاقستاندا ازاماتتارىمىزدىڭ ءومىر سالتىن ەداۋىر وزگەرتكەن تانىمال فينتەح كومپانيالار تابىستى جۇمىس ىستەپ جاتىر.
تەحنولوگيا سالاسىنداعى ناعىز الەمدىك الپاۋىتتار – اقش پەن قىتاي اراسىنداعى باسەكە قىزا ءتۇستى. امەريكا باسشىسى اقش-تىڭ ۇستەمدىگىن نىعايتۋ ءۇشىن ارنايى باعدارلاما جۇزەگە اسىرىلا باستاعانىن مالىمدەدى. قىتايدىڭ دا شەگىنەتىن ويى جوق, ولار مۇنى ۇلتتىڭ ابىروي-بەدەلىنە قاتىستى ماسەلە دەپ سانايدى. قازىردىڭ وزىندە قىتايدا جاساندى ينتەللەكت ماسەلەسىمەن اينالىساتىن بەس مىڭعا جۋىق كومپانيا جۇمىس ىستەپ جاتىر. باسقا دامىعان مەملەكەتتەر دە قامسىز وتىرعان جوق», دەدى مەملەكەت باسشىسى.
ايتا كەتەرلىگى قازاقستان دا ەكونوميكا مەن قوعامدىق ومىرگە جاساندى ينتەللەكتىنى ەنگىزۋگە باسىمدىق بەرىپ جاتىر. ەلىمىزدىڭ بۇل جۇمىسقا قاتىستى باستاپقى مۇمكىندىكتەرى جامان ەمەس.
«مەملەكەت كورسەتەتىن قىزمەتتەردى, قارجى تەحنولوگيالارىن, ەكونوميكانىڭ بىرقاتار سەكتورىن تسيفرلاندىرۋ ىسىندە ناقتى جەتىستىكتەرىمىز بار. ءىت-ستارتاپتاردى قولدايتىن تولىققاندى ەكوجۇيە ءتيىمدى جۇمىس ىستەپ تۇر. ەكى مىڭ كومپانيانىڭ باسىن قوسقان Astana Hub يننوۆاتسيالىق كلاستەرى دە بار. 2025 جىلى ءىت-قىزمەتتەردىڭ جالپى ەكسپورتى ءبىر ميلليارد دوللارعا جۋىقتادى. تسيفرلىق اكتيۆتەرگە ارنالعان CryptoCity پيلوتتىق ايماعى قۇرىلىپ جاتىر. جەدەل داميتىن Alatau city قالاسىنىڭ قۇرىلىسى باستالدى. مەملەكەتتىك دەرەكتەردى جيناۋ جانە تالداۋ جۇمىسىنىڭ قارقىنى كۇشەيىپ كەلەدى. كاسىبي ماماندار مۇنداي دەرەكتەردى الداعى ءداۋىردىڭ جاڭا التىنى دەپ سانايدى», دەدى پرەزيدەنت.
سۇحبات بارىسىندا جاساندى ينتەللەكتىنى ينستيتۋتسيونالدىق تۇرعىدان دامىتۋ ماسەلەسىنە دە توقتالدى. بىلتىر مامىردا جاساندى ينتەللەكتىنى دامىتۋ جونىندەگى كەڭەس جۇمىسىن باستاعان. قاراشا ايىندا «جاساندى ينتەللەكت تۋرالى» زاڭعا قول قويىلىپ, ول جاقىن ۋاقىتتا كۇشىنە ەنەدى. سونداي-اق جاساندى ينتەللەكت جانە تسيفرلىق دامۋ مينيسترلىگى قۇرىلدى.
پرەزيدەنتتىڭ ايتۋىنشا, ەلىمىزدە Alem.Cloud جانە Al-Farabium اتتى ەكى سۋپەركومپيۋتەر ىسكە قوسىلعان. استانا قالاسى اكىمدىگى بىرىككەن اراب امىرلىكتەرىنىڭ ءىرى كومپانياسىمەن بىرلەسىپ, دەربەس تسيفرلىق پلاتفورما ازىرلەگەن.
كادر دايارلاۋ ماسەلەسى دە باستى نازاردا.
«650 مىڭنان استام ستۋدەنت AI-Sana باعدارلاماسى اياسىندا ءبىلىم الدى. الداعى ۋاقىتتا جاساندى ينتەللەكتىگە مامانداندىرىلعان زەرتتەۋ ۋنيۆەرسيتەتى اشىلادى», دەدى مەملەكەت باسشىسى.
پرەزيدەنت جاساندى ينتەللەكتىنى ەل دامۋىنىڭ شەشۋشى فاكتورى دەپ اتادى.
«جاساندى ينتەللەكت پايدا بولعاننان بەرى بولاشاقتىڭ كەمەسىنە ءمىنىپ ۇلگەرەتىن ەلدەر مەن ەسكى زاماندا قالىپ قوياتىن ەلدەردىڭ اراسى الشاقتاي باستادى. سوندىقتان, مەن تسيفرلىق تەحنولوگيالار مەن جاساندى ينتەللەكتىنى قازاقستاننىڭ دامۋ جولىنداعى باسىم باعىت دەپ جاريالادىم. بيىل وتە كوپ شارۋا اتقارىلادى. وسى ايرىقشا ماڭىزدى جۇمىستىڭ تابىستى بولارىنا سەنەمىن», دەدى قاسىم-جومارت توقاەۆ.
