داراقىلىق تا قوعامدىق دەرت

«ەگەمەن قازاقستان» گازەتىنىڭ 13 ناۋ­رىزدا شىققان سانىنداعى ۇلتىمىزدىڭ ماقتانىشى, اسا سىيلى اعامىز تورە­گەلدى شارمانوۆتىڭ «قۇندىلىقتار قۇلدى­راۋى» اتتى ماقالاسىن وقىپ, سونشالىقتى ريزاشىلىق سەزىمگە بولەندىم, قالىڭ مۇڭعا باتقانداي دا بولدىم. ريزا بولۋدىڭ سەبەبى – كوپتەن ايتىلۋعا ءتيىس, قوعامنىڭ تاعى ءبىر دەرتىنە اينالعان قۇبىلىستى قانىن سورعالاتا وتىرىپ تالداۋى. جانە بۇلاي ايتۋعا تەك وسىنداي جانى دا, ارى دا تازا, ەلىنە ەلەۋلى ەڭبەك ءسىڭىرىپ, حال­قىن باس­قا جۇرتتارعا لايىقتى كورسەتە بىلگەن, ومىردەن تۇيگەنى ۇشان-تەڭىز ناعىز عالىم­نىڭ ءھام ۇلت ازاماتىنىڭ مورالدىق قۇقى بولسا كەرەك. قۇداي-اۋ, اۆتوردىڭ ءار ءسوزى قورعاسىننان قۇيعانداي, ءار سانالى الاش بالاسىنىڭ جانىن جەگىدەي جەگەن پايىمدار عوي! جاناشىرلىقتان جانعا باتىرا, ءادىلىن تىلگىلەپ, كادىمگى ابايشا ايتىلعان تۇجىرىمدار عوي! جال­عان عالىمسىماقتاردىڭ جاۋىننان كەيىنگى ساڭىراۋقۇلاقتاي قاۋلاعانىن كورىپ, تورەكەڭنىڭ «قازىر كوبىنەسە «اكادەميك» دەگەن اتاقتى ەسىمىمە قوسىپ ايتۋعا ۇيالاتىن دارەجەگە جەتتىم» دەۋىنىڭ ءوزى نەگە تۇرادى؟! پاراسات تەرەڭدىگىنىڭ ولشەمى وسىنداي-اق بولار. انا جىلى سونىڭ الدىندا عانا عىلىم كانديداتى اتاعىن العان ءبىر تانىسىمىزبەن ديسسەرتاتسياسىنىڭ مازمۇنى تۋرالى جاي عانا الىستان اڭگىمەنىڭ شەتىن قىل­تيتقاندا, سونىسىنىڭ تاقىرىبىن ەسىنە ءتۇسى­رە الماي, «اۋىلدى اينالا شاپقى­لاعانى» بار-دى. ال, ەندى, ماقالا اۋانىنىڭ مۇڭعا باتىراتىنى, جان كۇيزەلتەتىنى – نەگە عانا ۇلتى­مىزدىڭ وسىنداي داراقى مىنەز­دەن ارىلۋعا ورەسى جەتپەيتىندىگى؟ سول باياعى «ءماز بولادى بولىسىڭ, ارقاعا ۇلىق قاق­قانعا» قاعيداسىنان تۋىندايتىن «ءداستۇرلى» ءدىل مە, نە بولماسا اتاق, دارە­جە, توسبەلگى ارقىلى عانا جۇرتتان اسۋعا بولادى دەگەن دۇمبىلەز تۇسىنىك پە؟ ارينە, تويقۇمارلىق, تۇپتەپ كەلگەندە, ىلگەرىلەۋ ءۇشىن ەش پايدا بەرمەيتىن, قۇر اتتى شى­عارۋ داڭعازا­لىعى دا بۇدان الىسقا كەتكەن جوق, سونىمەن ساباقتاس. ءيا, شىنىندا دا, دەر كەزىندە جازىلعان, ەشكىمدى بەيجاي قالدىرمايتىن, قوعامدىق ويدى قامشىلار, وسەر ەلدىڭ ساناسىن قالىپتاستىرۋعا ءتيىستى بارلىق تەتىكتەردىڭ قۇلاعىندا وتىرعاندارعا ۇندەۋ ىسپەتتەس ماقالا بولىپ شىققان. ەندىگى جەردە عالىم­دار, اقساقالدار, ەڭبەك ادامدارى, جالپى دۋالى اۋىزدى قالىڭ وقىرمان پىكىر­لەسۋگە اتويلاپ كىرىسەر, قۇندىلىقتار قۇلدىراۋىنا توسقاۋىل قويار, ءسويتىپ كەم­شىلى­گىمىزدى تۇزەپ, ەرتەڭىمىزدى جارقىن ەتەر جول­داردى كوپ بولىپ نۇسقار دەپ كۇتۋدەمىز. عوسمان تولەعۇل, قازاقستان رەسپۋبليكاسىنىڭ مادەنيەت قايراتكەرى. كوكشەتاۋ.