ۆەدومستۆونىڭ مالىمەتىنشە, 1 قاڭتارعا قاراعان ءتۇنى سارايشىق اۋدانىنداعى تۇرعىن ۇيلەردىڭ بىرىندە جۇك-جولاۋشىلار ءليفتى ءۇشىنشى قاباتتان كۇرت تومەن ءتۇسىپ, ءبىرىنشى جانە ەكىنشى قاباتتاردىڭ اراسىندا توقتاپ قالعان. سونىڭ سالدارىنان ليفت ىشىندەگى ادامدار سىرتقا شىعا الماي قالعان.
وقيعا ورنىنا جەدەل جەتكەن قۇتقارۋشىلار ارنايى ليفت كىلتىنىڭ كومەگىمەن ەسىكتى اشىپ, ادامداردى قاۋىپسىز تۇردە سىرتقا شىعارعان.
«قۇتقارۋ جۇمىستارى بارىسىندا زارداپ شەككەندەر جوق, مەديتسينالىق كومەك قاجەت بولمادى», دەپ حابارلادى توتەنشە جاعدايلار مينيسترلىگى.
ەسكە سالا كەتەيىك, بۇعان دەيىن, 13 قاراشا كۇنى استاناداعى «ارىستان» تۇرعىن ءۇي كەشەنىندە جوندەۋ جۇمىستارى كەزىندە ليفت ءۇزىلىپ كەتكەن ەدى. سالدارىنان ءبىر قىزمەتكەر قازا تاۋىپ, تاعى ەكى ادام جاراقات العان. اتالعان دەرەك بويىنشا پوليتسيا ەڭبەك قاۋىپسىزدىگى ەرەجەلەرىن بۇزۋ بابىمەن قىلمىستىق ءىس قوزعاعان.
