سۋرەت: pavlodarnews.kz
«شەبەر اسۋى» – ءوڭىر اكىمىنىڭ ارنايى سىيلىعى. ماراپات العاش رەت تابىستالىپ وتىر ءارى بۇل بىلىمىمەن, ەڭبەگىمەن, تالانتىمەن, تاباندىلىعىمەن كاسىبي شەبەرلىكتىڭ شەگى جوق ەكەنىن دالەلدەگەن جاستاردى ىنتالاندىرۋعا باعىتتالعان.
وبلىس اكىمى اسايىن بايحانوۆ جەڭىمپازداردى قۇتتىقتاپ, جىلى لەبىزىن ءبىلدىردى.
«وزدەرىڭىزگە بەلگىلى, جۇمىسشى ماماندىقتارى – ەل ەكونوميكاسىنىڭ نەگىزى. بۇگىن سىزدەر – ۇزدىك ستۋدەنتسىزدەر, ال ەرتەڭ سۇرانىسقا يە مامان بولىپ, ءوڭىرىمىزدىڭ تىرەگىنە اينالاسىزدار. الداعى ۋاقىتتا دا ۇنەمى دامۋ كوشىندە بولىپ, جاڭا ماقساتتار قويىپ, پاۆلودار وبلىسىنىڭ اتىن رەسپۋبليكالىق جانە حالىقارالىق دەڭگەيدە اسقاقتاتا بەرەسىزدەر دەپ سەنەمىن. سىزدەردىڭ كاسىبي بىلىكتىلىكتەرىڭىز بەن بەلسەندى ازاماتتىق ۇستانىمدارىڭىز ەرتىس-بايان ءوڭىرىنىڭ بولاشاعىنىڭ بەرىك ىرگەتاسى», دەدى ءوڭىر باسشىسى.
ماراپاتتالعانداردىڭ قاتارىندا جاياۋ مۇسا اتىنداعى اقسۋ جوعارى كوپسالالى كوللەدجىنىڭ ستۋدەنتى, «WorldSkills Kazakhstan – 2025» كونكۋرسىندا «ەلەكترمونتاج» قۇزىرەتتىلىگى بويىنشا التىن مەدال يەگەرى ماكسيم سوروزيدينوۆ, مۇساحان قاناپيانوۆ اتىنداعى جوعارى كوللەدج ستۋدەنتى, ۆولونتەر, «قازاقستاننىڭ 100 ۇزدىك ستۋدەنتى» رەسپۋبليكالىق كونكۋرسىنىڭ جەڭىمپازى نازەركە قايىرگەلدينوۆا, تەحنولوگيالىق كوللەدج ستۋدەنتى, «WorldSkills Kazakhstan – 2025» كونكۋرسىندا «ناۋبايحانا ءىسى» قۇزىرەتتىلىگى بويىنشا كۇمىس جۇلدەگەر, ماسكەۋدە وتكەن «كونديتەر. دەتي» شوۋىنىڭ جارتىلاي ءفيناليسى مەيرام اسىلجان بار.
جالپى, بيىل «شەبەر اسۋى» اتالىمى بويىنشا وبلىس اكىمىنىڭ بىرجولعى سىيلىعىمەن كاسىبي شەبەرلىكتىڭ جوعارى دەڭگەيىن جانە دامۋعا دەگەن ۇمتىلىسىن كورسەتكەن ءوڭىر كوللەدجدەرىنىڭ 30 ستۋدەنتى ماراپاتتالدى.
پاۆلودار وبلىسى
