2025 جىلدىڭ 9 قاڭتارى كۇنى كلاسسيك قالامگەر, ادەبيەت تاريحىن سان عاسىرعا تەرەڭدەتكەن عالىم, حالىق جازۋشىسى مۇحتار ماعاۋين 85 جاسقا قاراعان شاعىندا اقش-تىڭ مەريلەند شتاتىندا كوز جۇمدى. ادەبي ورتانى العاشقى تۋىندىلارىمەن مويىنداتىپ, سانالى عۇمىرىن ءسوز ونەرىنە باعىشتاعان الىپ تۇلعاعا مۇحيتتىڭ ارعى جاعىنان توپىراق بۇيىردى. قازاق جۇرتشىلىعى ماعاۋيننىڭ قازاسىنان ەس جيىپ ۇلگەرمەي جاتىپ, ارادا ءۇش كۇن وتكەندە ابايتانۋشى عالىم, فيلولوگ, پروفەسسور مەكەمتاس مىرزاحمەت ۇلى 95 جاسىندا باقيعا بەت تۇزەدى. الاش بۇقاراسى اباي شىعارمالارىن جاڭا قىرىنان تالداپ, عىلىمي اينالىمعا ەنگىزگەن ابىز اقساقالمەن قيماي قوشتاستى.
اقپان ايىنىڭ 22-جۇلدىزىندا ادەبيەتىمىزدىڭ ۇجدانى ءھام ايبارى سانالاتىن كلاسسيك جازۋشى, الەم ەلدەرىندە پەسالارى ساحنالانعان دراماتۋرگ, مەملەكەتتىك سىيلىقتىڭ لاۋرەاتى دۋلات يسابەكوۆ 84 جاسىندا ماڭگىلىك مەكەنىنە كوشتى. 11 ناۋرىزدا نۇرعيسا تىلەنديەۆتىڭ جارى, «قۇلاگەر», «التى جاسار الپامىس», «قوشتاسقىم كەلمەيدى», «جامبىلدىڭ جاستىق شاعى» سەكىلدى كوركەم فيلمدەردە ءارتۇرلى رولدەردى سومداعان اكتەر, «قايران مەنىڭ نۇرەكەم», «قاراتالىم», «ماحامبەت بابا» اتتى ءان-كۇيلەر جازعان سازگەر, قازاقستاننىڭ ەڭبەك سىڭىرگەن ءارتىسى داريعا تىلەنديەۆا, ال, 19 ناۋرىزدا «قازاق كəدەسى», «قازاق مىنەزى», «قازاق تانىعان گۇلدەر», «قازاق اسپان ەسەبى» سىندى كىتاپتاردىڭ اۆتورى, ەتنوگراف بولات بوپاي دۇنيە سالدى.
جىلان جىلىنىڭ 22 ساۋىرىندە قازاق ادەبيەتىنىڭ تاعى ءبىر الىپ بايتەرەگى قۇلاپ, حالقىمىز كلاسسيك قالامگەر, دراماتۋرگ, قازاقستاننىڭ ەڭبەك ەرى اكىم تارازيدان ايىرىلدى. 28 ساۋىردە 85 جاستاعى كورنەكتى فولكلورتانۋشى, ۇلتتىق عىلىم اكادەمياسىنىڭ اكادەميگى, فيلولوگيا عىلىمدارىنىڭ دوكتورى, مەملەكەتتىك سىيلىقتىڭ لاۋرەاتى سەيىت قاسقاباسوۆ باقيلىق بولدى. 10 مامىر كۇنى 81 جاسقا قاراعان شاعىندا قازاقستاننىڭ حالىق جازۋشىسى, مەملەكەتتىك سىيلىقتىڭ لاۋرەاتى, اقىن تەمىرحان مەدەتبەك دۇنيەدەن ءوتتى.
سونداي-اق قازاق بۇقاراسى 22 مامىردا ەلىمىزگە بەلگىلى جۋرناليست, سپورت كوممەنتاتورى دياس احمەتشارىپ, 10 ماۋسىمدا جازۋشى, اۋدارماشى, پۋبليتسيست ماقسوت ءىزىم ۇلى, 17 شىلدەدە «الماس قىلىش» فيلمىندەگى كەرەي حان ءرولىن سومداعان بەلگىلى اكتەرى قايرات كەمالوۆ, 18 شىلدەدە قازاقستاننىڭ حالىق جازۋشىسى, بەلگىلى اقىن, دراماتۋرگ, تالانتتى سازگەر يسرايل ساپارباي, 21 شىلدەدە بەلگىلى جۋرناليست, جازۋشى, وتاندىق اقپارات كەڭىستىگىندە ءوز قولتاڭباسىن قالدىرعان مۇحتار تۇمەنباي, 4 تامىزدا عارىشكەر, حالىق قاھارمانى تالعات مۇساباەۆ, 21 تامىزدا قازاق بەينەلەۋ ونەرىنىڭ كورنەكتى وكىلى, قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ لاۋرەاتى, پروفەسسور اعىمسالى دۇزەلحانوۆ, 23 تامىزدا «Egemen Qazaqstan» گازەتىنىڭ ءتىلشىسى, بەلگىلى جۋرناليست ايگۇل احانبايقىزى, 30 قازاندا جۋرناليست, فيلولوگيا عىلىمدارىنىڭ كانديداتى, قازاقستاننىڭ ەڭبەك سىڭىرگەن قايراتكەرى ماقسات ءتاج-مۇرات, 11 قاراشادا كورنەكتى مادەنيەت قايراتكەرى, فيلولوگ, ادەبيەت سىنشىسى, رەجيسسەر جانە ستسەناريست عالىم دوسكەن, 15 قاراشادا «قازاقتىڭ كورنەكتى اقىنى, مەملەكەتتىك سىيلىقتىڭ يەگەرى كۇلاش احمەتوۆا, 18 قاراشادا قازاقستاننىڭ ەڭبەك سىڭىرگەن قايراتكەرى, «قۇرمەت» وردەنىنىڭ يەگەرى, قاليبەك قۋانىشباەۆ اتىنداعى قازاق ۇلتتىق مۋزىكالىق دراما تەاترىنىڭ نەگىزىن قالاۋشىلاردىڭ ءبىرى رىمكەش ومارحانوۆا مەن فەلدشەر ۇلدانا مىرزۋان (استانادا كوپقاباتتى ءۇيدىڭ قاپتاماسى قۇلاعاندا ازاماتتارعا جەدەل جاردەم كورسەتۋگە بارىپ, اۋىر جاراقات الىپ, قازا تاپتى), 3 جەلتوقساندا كورنەكتى قوعام قايراتكەرى, ۇلتتىق عىلىم اكادەمياسىنىڭ اكادەميگى, ەلىمىزدەگى ديالەكتيكالىق لوگيكا مەكتەبىنىڭ نەگىزىن قالاعان جابايحان ءابدىلدين, 21 جەلتوقسان-دا كەڭەستىك جانە قازاقستاندىق كينو جانە تەاتر اكتەرى, كسرو حالىق ءارتىسى, قازاقستاننىڭ مەملەكەتتىك سىيلىعىنىڭ لاۋرەاتى ءاسانالى ءاشىموۆ, 26 جەلتوقساندا «مەنىڭ اتىم – قوجا» فيلمىندە باستى ءرولدى سومداعان بەلگىلى اكتەر, ستسەناريست, كينودراماتۋرگ نۇرلان سەگىزباەۆ سىندى تۇلعالاردان ايرىلىپ, قارا جامىلدى.
ايگىلى ءماشھۇر ءجۇسىپ ءبىر جوقتاۋىندا: «كەۋەندەي بۇ دۇنيەگە از كۇن قونىپ...» دەپتى. راسى سولاي-اۋ.
«ونەرلىگە ءولىم جوق» دەيتىن قازاق حالقى بيىل ءجۇز جىلدىقتاردا ءبىر تۋاتىن الاشتىڭ وسىنداي ازاماتتارىن اقتىق ساپارعا اتتاندىرىپ, جىلان جىلىنىڭ جىلناماسىن جاپتى.
