جىل سوڭىنداعى بۇل تاعىلىمدى ءارى اسەرلى مادەني كەش ونەرسۇيەر قاۋىمعا شاتتىق سىيلاپ قانا قويماي, شىعارماشىلىق تابىستارعا تولى جىلدى سالتاناتتى تۇردە قورىتىندىلاعان مازمۇندى كەش بولدى. مەرەكەلىك كونتسەرتتە وتاندىق ەسترادانىڭ تاڭداۋلى وكىلدەرى ساحنا تورىنە شىعىپ, كورەرمەنگە جوعارى دەڭگەيدەگى مۋزىكالىق باعدارلاما ۇسىندى. انشىلەردىڭ جاندى داۋىستا كاسىبي بەندتىڭ سۇيەمەلدەۋىمەن ورىنداعان تۋىندىلارى كەشتىڭ شىنايى رۋحىن ايقىنداي ءتۇستى. تانىمال حيت اندەر مەن جاڭا جىلدىق كلاسسيكالىق شىعارمالار زالداعى تىڭدارماندى ءبىر ساتكە كۇندەلىكتى كۇيبەڭنەن الىستاتىپ, مەيرامنىڭ سيقىرلى الەمىنە جەتەلەدى.
كونتسەرت باعدارلاماسىنا ەنگەن «جاڭا جىل شامدارى», «اپپاق قار», «جاڭا جىل» سىندى وتاندىق تۋىندىلار كورەرمەننىڭ ىستىق ىقىلاسىنا بولەنسە, الەمگە ايگىلى «It's the Most Wonderful Time of the Year» مەن «Jingle Bell Rock» اندەرى كەشكە حالىقارالىق مەرەكەلىك رەڭك بەردى. ءاربىر مۋزىكالىق نومەر جاڭا جىلدىڭ ءۇمىت پەن جاڭارۋ كەزەڭى ەكەنىن ايشىقتاي وتىرىپ, كورەرمەن كوڭىلىندە ەرەكشە اسەر قالدىردى.
مۋزىكالىق كەش بي ونەرىمەن, ساحنالىق قويىلىمدارمەن جانە زاماناۋي ۆيزۋالدى شەشىمدەرمەن شەبەر تولىقتىرىلدى. ساحنا تورىندە ورىندالعان حورەوگرافيالىق كومپوزيتسيالار كونتسەرتتىڭ كوركەمدىك دەڭگەيىن ارتتىرىپ, ءان مەن ءبيدىڭ ۇيلەسىمدى ۇندەستىگىن كورسەتتى. اسەم كوستيۋمدەر, جارىقتىڭ اسەرلى قولدانىلۋى مەن ساحنالىق بەزەندىرۋ كەشتىڭ كوركىن اشا ءتۇستى.
بۇل كەشتە «قازاقكونتسەرت» ۇيىمىنىڭ تانىمال ونەر جۇلدىزدارىمەن قاتار «Astana Musical» مەملەكەتتىك تەاترى, ەلىمىزگە كەڭىنەن تانىمال «GULDER» ءانسامبلىنىڭ بالەتى, سونداي-اق «G-band» توبى ونەر كورسەتتى. ءار ۇجىم وزىنە ءتان ستيل مەن كاسىبي شەبەرلىگىن ايگىلەپ, كونتسەرت باعدارلاماسىن مازمۇندىق ءارى كوركەمدىك تۇرعىدان بايىتتى. ءبىر ساحنادا توعىسقان ءتۇرلى جانر وكىلدەرى مەرەكەلىك كەشتىڭ كوركەمدىك اياسىن كەڭەيتىپ, كورەرمەنگە شىنايى ونەر مەرەكەسىن سىيلادى.
«NEW YEAR with QAZAQCONCERT» كونتسەرتى كورەرمەننىڭ ۇزاق قول سوعۋىنا يە بولىپ, جاڭا جىلدى ونەرمەن قارسى الۋدىڭ جارقىن ۇلگىسىنە اينالدى. بۇل كەش وتكەن جىلعا ريزاشىلىق ءبىلدىرىپ, الداعى جىلعا ءۇمىت پەن سەنىممەن قادام باسۋعا ۇندەگەن رۋحاني ءمانى تەرەڭ مادەني شارا رەتىندە ەستە قالدى. اتالعان كونتسەرت «قازاقكونتسەرت» ۇجىمىنىڭ كاسىبي دەڭگەيى مەن شىعارماشىلىق الەۋەتىن تاعى ءبىر مارتە دالەلدەپ, ەلىمىزدىڭ مادەني كەڭىستىگىندەگى ماڭىزدى وقيعالاردىڭ قاتارىن تولىقتىردى.
