وڭالتۋ ورتالىعى شامامەن 2 گەكتارعا جۋىق جەردى الىپ جاتىر. اق قايىڭى, قىز قاراعايى ارالاس قالىڭ اعاش اراسىندا تۇرعان كەشەن اۋماعىندا جەتى عيمارات بار. ونىڭ ەكەۋى 2002 جىلى, تورتەۋى 2004–2008 جىلدار ارالىعىندا پرەزيدەنت جانىنداعى شەتەلدىك ينۆەستورلار كەڭەسىنىڭ جالپى وتىرىسىن وتكىزۋگە دايىندىق شارالارى بارىسىندا سالىنعان.
بالالار ورتالىعىنىڭ اشىلۋ راسىمىنە وبلىس اكىمى قۇمار اقساقالوۆ پەن عيماراتتاردى قايتا جوندەۋدەن وتكىزىپ, قاجەتتى قۇرال-جابدىقپەن قامتاماسىز ەتۋگە قىرۋار قارجى بولگەن «قازاقستان حالقىنا» قوعامدىق قورىنىڭ باسقارما توراعاسى ءلاززات شىڭعىسباەۆا قاتىستى. وبلىس اكىمىنىڭ ايتۋىنشا, بۇعان دەيىن وڭىردە بالالارعا ارنالعان جالعىز وڭالتۋ ورتالىعى بولعان.
– ول جىلىنا 400 بالاعا دەيىن قابىلدايدى. ال جاڭادان اشىلىپ وتىرعان ورتالىقتىڭ قىزمەت كورسەتۋ اياسى ودان ەكى ەسە جوعارى. جاڭا ورتالىق جوعارى دەڭگەيدەگى زاماناۋي مەديتسينالىق قۇرىلعىلارمەن جابدىقتالعان. ءتيىستى دايارلىقتان وتكەن بىلىكتى ماماندار جۇمىس ىستەيدى. بىزگە «قازاقستان حالقىنا» قورى زور كومەك كورسەتتى. 1 ملرد تەڭگەدەن استام قارجى ءبولىپ, وعان بۇرىن-سوڭدى بولماعان زاماناۋي قۇرال-جابدىقتار ورناتىپ بەردى. بۇرىن مۇنداي تەحنولوگيا استانا مەن الماتىدا عانا بولعاندىقتان, اتا-انالار سول قالالارعا قاتىناۋعا ءماجبۇر ەدى. ەندى الىسقا سابىلماي-اق, وزىمىزدە دە وڭالتۋ شارالارىنان وتۋگە مۇمكىندىك پايدا بولىپ وتىر, – دەدى ق.اقساقالوۆ.
ل.شىڭعىسباەۆا «قازاقستان حالقىنا» قوعامدىق قورى قوستاناي وبلىسىنا 21 ملرد تەڭگەگە جۋىق قارجى ءبولىپ, الەۋمەتتىك سالانى دامىتاتىن ىرگەلى جوبالاردى ىسكە اسىرىپ جاتقانىن ايتتى. سونىڭ ايقىن ءبىر دالەلى – وسى ورتالىق.
– بۇل – «التىن ستاندارت» نەگىزىندە جاسالعان ورتالىق. نەگە ءبىز ەلىمىزدە جوق جابدىقتاردى اكەلدىك؟ ويتكەنى الەۋمەتتىك سالادا وتە ماڭىزدى ستاندارتتاردى كوتەرۋىمىز كەرەك. سول ارقىلى قىزمەت ساپاسى ارتۋى قاجەت. بۇگىن وزدەرىڭىز كورىپ وتىرعان قۇرال-جابدىقتارعا 700 ملن تەڭگە جۇمسالدى. قالعاندارى كەلىسىم-شارتتار اياسىندا جاپونيا, شۆەيتساريا, اقش, اۋستراليا سياقتى ەلدەردەن كەلە جاتىر. الەمدىك برەندتەر تاپسىرىسپەن ارنايى جاسالادى. دەگەنمەن قولدا بار تەحنيكالار جۇمىستى تولىق باستاي بەرۋگە مۇمكىندىك بەرەدى. مۇنداعى قامتىلىم جەرگە قونعان عارىشكەردى وڭالتۋعا قاجەتتى جابدىقتاردان ەش كەم ەمەس, – دەدى ل.شىڭعىسباەۆا.
جالپى, وڭىردە پسيحونەۆرولوگيالىق اۋىتقۋعا ۇشىراعان, تىرەك-قيمىل قوزعالىسىنا زاقىم كەلگەن ەكى مىڭعا جۋىق بالا بار. ورتالىق جىل سايىن 1,5 جاستان 18 جاسقا دەيىنگى 900 بالانى ەمدەپ, رەابيليتاتسيالىق قولداۋ كورسەتەدى. ورتالىق اۋماعىنداعى جەتى عيماراتتىڭ ارقايسىسى ءارتۇرلى ساۋىقتىرۋ قىزمەتىن اتقارادى. بارلىعى كومپيۋتەرلەندىرىلگەن, روبوتتاندىرىلعان قۇرال-جابدىقتارمەن قامتاماسىز ەتىلگەن. بالانى دياگنوزىنا ساي دامىتۋعا, وڭالتۋعا قولايلى جاعداي جاسالعان. تىرەك-قيمىل اپپاراتىن, پسيحونەۆرولوگيا جۇيەسىن جەتىلدىرەتىن تەحنيكانىڭ دا سان ءتۇرى, ەدەن-قابىرعاسى تۇتاستاي سەنسورلانعان ينتەراكتيۆ بولمەسى, شۋنگيت بولمەلەرى, باسسەين, فيزيوتەراپيا, باسقا دا بولىمدەرى بار.
قوستاناي وبلىسى
