وڭىردە العاش رەت اۋىر دارەجەدەگى ساڭىراۋلىق دياگنوزى قويىلعان بالاعا كوحلەارلىق يمپلانتاتسيا وپەراتسياسى ءساتتى جاسالدى. بۇل – ايماقتا جوعارى تەحنولوگيالى مەديتسينالىق كومەكتىڭ جاڭا كەزەڭگە كوتەرىلگەنىن كورسەتەتىن كوشەلى جەتىستىك. جوعارى دالدىكتى تالاپ ەتەتىن كۇردەلى حيرۋرگيالىق وپەراتسيا قاراعاندى قالاسىنداعى كوپبەيىندى وبلىستىق بالالار اۋرۋحاناسىندا ءوتتى. كوحلەارلىق يمپلانتاتسيا – ەستۋ اپپاراتتارى كومەكتەسپەيتىن بالالارعا دىبىستى, سويلەۋدى, قورشاعان ورتانى ەستۋگە مۇمكىندىك بەرەتىن زاماناۋي مەديتسينالىق ءادىس. بالالار وتورينولارينگولوگياسىندا مۇنداي وپەراتسيالار اسا كۇردەلى ءارى جاۋاپتى سانالادى.
بۇعان دەيىن كوحلەارلىق يمپلانتاتسيا تەك استانا مەن الماتى قالالارىندا عانا جاسالىپ كەلگەن. قاراعاندى وبلىسىندا العاش رەت اتالعان وپەراتسيانىڭ ءساتتى ءوتۋى – ءوڭىر مەديتسيناسىنىڭ الەۋەتى ارتقانىن, سالالىق مامانداردىڭ كاسىبي دەڭگەيى جاڭا بەلەسكە كوتەرىلگەنىنىڭ دالەلى.
وپەراتسيانى وڭىردە ورىنداۋعا جۇيەلى دايىندىق جۇمىستارى الدىن الا جۇرگىزىلدى. قاراعاندى وبلىسى اكىمدىگىنىڭ قولداۋىمەن زاماناۋي مەديتسينالىق قۇرال-جابدىقتارمەن قامتىلعان ءىرى بالالار اۋرۋحاناسى سالىندى. سونىمەن قوسا, لور-بولىمشەسىنىڭ مەڭگەرۋشىسى, ەمدەۋشى دارىگەر, سۋردوپەداگوگ رەسەيدىڭ سانكت-پەتەربۋرگ, ماسكەۋ قالالارىندا ارنايى تاعىلىمدامادان ءوتىپ, ءيزرايلدىڭ حايفا قالاسىندا كوحلەارلىق يمپلانتاتسيا جۇرگىزۋ جونىندە كاسىبي بىلىكتىلىگىن ارتتىردى. بۇل قادام وڭىردە جوعارى تەحنولوگيالى مەديتسينالىق كومەكتى تولىق كولەمدە كورسەتۋگە جول اشىپ وتىر.
– 2024 جىلى كوحلەارلىق يمپلانت ورناتۋعا ارنالعان ارنايى اپپاراتتار ساتىپ الىندى. جىل سوڭىنا قاراي وپەراتسيالىق ميكروسكوپ جەتكىزىلىپ, تولىققاندى تەحنيكالىق بازا قالىپتاستى. وپەراتسيا جاسالعان بالانى ۇزاق مەرزىمدى وڭالتۋ كەزەڭى كۇتىپ تۇر. وپەراتسيادان كەيىن سۋردولوگ پەن لوگوپەدتىڭ قاتىسۋىمەن جۇيەلى وڭالتۋ جۇمىستارى جۇرگىزىلىپ, يمپلانتتىڭ قىزمەتى كەزەڭ-كەزەڭىمەن باقىلاۋدا بولادى. بۇل بالانىڭ بولاشاقتا دىبىستى ەستىپ, سويلەۋدى مەڭگەرۋىنە, قاتارلاستارىمەن ەركىن ارالاسىپ, جالپى ءبىلىم بەرەتىن مەكتەپتە وقۋىنا مۇمكىندىك بەرەدى, – دەدى كوپبەيىندى وبلىستىق بالالار اۋرۋحاناسىنىڭ ديرەكتورى ارعىن بيدايباەۆ.
مامانداردىڭ ايتۋىنشا, العاشقى وپەراتسيا پوستلينگۆالدى ساڭىراۋلىق دياگنوزى قويىلعان 13 جاستاعى بالاعا جاسالعان. وپەراتسيا ءساتتى ءوتتى, ناۋقاستىڭ قازىرگى جاعدايى قالىپتى.
استانا قالاسىنىڭ شتاتتان تىس باس بالالار وتورينولارينگولوگى, وپەراتسيالىق بولىمشەنىڭ مەڭگەرۋشىسى ارمان امانگەلدى ۇلىنىڭ ايتۋىنشا, بۇل – ءوڭىر بالالارىنا مەديتسينالىق قىزمەتتىڭ قولجەتىمدىلىگىن ارتتىراتىن ماڭىزدى قادام.
– كوحلەارلىق يمپلانتاتسيا جوعارى تەحنولوگيالى مەديتسينالىق قىزمەتتەر قاتارىنا جاتادى. مۇنداي وپەراتسيانىڭ وڭىردە العاش رەت جاسالۋى بالالاردى باسقا قالالارعا جىبەرۋ قاجەتتىلىگىن ازايتادى. ەگەر بۇل باعىتتاعى جۇمىس جۇيەلى تۇردە جالعاسسا, وپەراتسيا سانى ارتىپ, قىزمەت ءوڭىردىڭ مۇقتاج بالالارىنا تولىق قولجەتىمدى بولادى, – دەيدى ول.
ءجون, جاقىن ۋاقىتتا وبلىستا تاعى 10 بالاعا كوحلەارلىق يمپلانتاتسيا جاساۋ جوسپارلانىپ وتىر. بۇل دا بولسا وڭىردە بالالارعا كورسەتىلەتىن جوعارى تەحنولوگيالى مەديتسينالىق كومەكتىڭ تۇراقتى تۇردە دامىپ كەلە جاتقانىنىڭ تاعى ءبىر ايعاعى. كوحلەارلىق يمپلانتاتسيا – تەك مەديتسينالىق وپەراتسيا عانا ەمەس, بالانىڭ ءومىر ءسۇرۋ ساپاسىن تۇبەگەيلى وزگەرتەتىن مۇمكىندىك. كەنشىلەر قالاسىندا باستالعان بۇل تاجىريبە ءوڭىر مەديتسيناسىنىڭ الەۋەتىن ارتتىرىپ قانا قويماي, جۇزدەگەن وتباسىنا ءۇمىت سىيلايتىن يگى باستاما رەتىندە دە باعالى بولىپ وتىر.
قاراعاندى وبلىسى
