فوتو: قر باس پروكۋراتۋراسى
باس پروكۋراتۋرانىڭ ۇيلەستىرۋىمەن ەكى اي بويى قوعامدىق ورىندارداعى قىلمىس پەن قۇقىق بۇزۋشىلىققا قارسى ءىس-قيمىل جاساۋ ماقساتىندا ۇيىمداستىرۋشىلىق جانە تاجىريبەلىك شارالار قابىلداندى. ول ءۇشىن درون ارقىلى قوعامدىق ءتارتىپتىڭ ساقتالۋىن باقىلاۋدان باستاپ, كوشە قىلمىستارىن بولجاۋ ءۇشىن جاساندى ينتەللەكتىنى قولدانۋعا دەيىنگى داستۇردەن تىس تاسىلدەر سىننان وتكىزىلدى. ناتيجەسىندە, بۇل كەشەندى باستامالار ەلوردانىڭ الماتى اۋدانىنداعى كريمينوگەندىك احۋالدىڭ جاقسارۋىنا وڭ اسەرىن تيگىزدى.
اتاپ ايتقاندا, كوشەدەگى قىلمىستار 32%-عا تومەندەپ, ونىڭ ىشىندە قاساقانا اۋىر, ورتاشا جانە جەڭىل دارەجەدەگى دەنە جاراقاتتارىن كەلتىرۋ دەرەكتەرى تيىسىنشە 50%, 38% جانە 37%-عا ازايعان. سونداي-اق ۇرلىقتار 23%-عا, بۇزاقىلىق 100%-عا, ادام ءولتىرۋ قىلمىستارى 66%-عا قىسقارعانى بەلگىلى بولىپ وتىر. ال قىلمىستاردىڭ جالپى اشىلۋ دەڭگەيى 14%-عا ارتتى.
قاناتقاقتى جوبانىڭ ناتيجەلەرى باس پروكۋراتۋرادا وتكەن كەڭەستە تالقىلانىپ, قاداعالاۋ ورگانىنىڭ باسشىسى اتالعان جۇمىس مودەلىن بۇكىل ەل اۋماعىندا قولدانا بەرۋدى تاپسىردى. سونىمەن قاتار جوبانى ءتيىمدى ەنگىزگەنى ءۇشىن استانا قالاسىنىڭ الماتى اۋدانى پروكۋراتۋراسىنىڭ, اكىمدىگىنىڭ جانە پوليتسياسىنىڭ بىرقاتار قىزمەتكەرى باس پروكۋروردىڭ بۇيرىعىمەن ماراپاتتالدى.
بۇعان قوسا, تاياۋ كۇندەرى استانا قالاسىندا پروكۋراتۋرانىڭ ۇيىمداستىرۋىمەن «قامقورلىق پەن زاڭ» جوباسى وتكەنىن ايتا كەتەيىك. 26 جەلتوقساندا ەلوردانىڭ سارىارقا اۋداندىق پروكۋراتۋراسىنىڭ باستاماسىمەن قوسىمشا قاجەتتىلىكتەرى بار ادامداردىڭ قاتىسۋىمەن سپورتتىق ءىس-شارا وتكىزىلدى. سپورتتىق جارىس بارىسىندا قاتىسۋشىلار ءوز قابىلەتتەرىن كورسەتۋگە, قوعامنىڭ قولداۋىن جانە جارقىن جاعىمدى ەموتسيالاردى سەزىنۋگە مۇمكىندىك الدى. ناتيجەسىندە, قاتىسۋشىلارعا ەستەلىك ماراپاتتار مەن ىنتالاندىرۋ سىيلىقتارى تابىس ەتىلدى.
