وڭدەۋ ونەركاسىبىندە بيىلعى قورىتىندى بويىنشا ناقتى كولەم يندەكسى (نكي) 6% دەڭگەيىندە ءوسۋى مۇمكىن. كەلەر جىلى ەلىمىزدىڭ 2029 جىلعا دەيىنگى ۇلتتىق دامۋ جوسپارى شەڭبەرىندە نىسانالى كورسەتكىش 6,2% دەڭگەيىندە بولادى دەپ بەلگىلەندى.
وڭدەۋ سالاسىنىڭ نەگىزگى درايۆەرى سانالاتىن مەتاللۋرگيادا ءوندىرىستىڭ ءوسۋى 2026 جىلى 3% دەڭگەيىندە جوسپارلانىپ وتىر. ءونىم كولەمى, ەڭ الدىمەن, بيىل جانە بىلتىرلارى ىسكە قوسىلعان «Kyzyl Aray Copper», «EkibastuzFerroAlloyse», «Kazferrolimited», «Shagala Mining» پەن تاعى دا باسقا زاۋىتتاردىڭ جوبالىق قۋاتىنىڭ ارتۋى ەسەبىنەن ۇلعايادى. قارا مەتاللۋرگيادا فەرروقورىتپا, بولات, جالپاقتاپ جايمالانعان تەمىر مەن شويىن ءوندىرىسىن, ءتۇستى مەتاللۋرگيادا التىن, مىس, اليۋميني, مىرىش ءوندىرىسىن ۇلعايتۋ جوسپارلانىپ وتىر.
ماشينا جاساۋدا كەلەسى جىلعى جوسپارلى ءوسۋ كورسەتكىشى 13,4% دەڭگەيىندە بەلگىلەندى. بۇل كورسەتكىشكە بيىل ىسكە قوسىلعان «Astana Motors Manufacturing Kazakhstan» جشس مەن «KIA Qazaqstan» جشس ارقىلى جەڭىل اۆتوموبيل ءوندىرۋ كولەمىن 17%-عا ۇلعايتۋ ەسەبىنەن قول جەتكىزىلگەلى وتىر. بۇدان باسقا, اۋىل شارۋاشىلىعى تەحنيكاسىن شىعارۋ 5%-عا وسەدى دەپ جوسپارلانعان.
ايرىقشا اتاپ وتەرلىگى, 2025 جىلدىڭ قورىتىندىسىندا 436,5 مىڭ بىرلىك تۇرمىستىق تەحنيكا شىعارىلماقشى. بۇل 2024 جىلمەن سالىستىرعاندا 1,5 ەسە ارتىق. تەلەديدار, كىر جۋعىش ماشينا, پليتا پەش پەن تاعى دا باسقا تۇرمىستىق تەحنيكانى ەلىمىزدە ««Silk road electronics» جشس, «الماتى تۇرمىستىق تەحنيكا زاۋىتى» جشس جانە «DS Multimedia CA» جشس شىعارادى. كەلەسى جىلى تۇرمىستىق تەحنيكانى بيىلمەن سالىستىرعاندا 1,5 ەسە كوپ ءوندىرۋ جوسپارلانىپ وتىر.
2026 جىلى حيميا ونەركاسىبى ءوندىرىسىنىڭ ءوسۋى 7% دەڭگەيىندە بولادى دەپ كۇتىلۋدە. ول كۇكىرت قىشقىلى, ناتري ءتسيانيدى, سۋتەگى اسقىن توتىعى مەن سۇيىق شىنى سەكىلدى جاڭا قۋاتتاردى ەنگىزۋ ارقىلى جۇزەگە اسىرىلادى.
قۇرىلىس ماتەريالىن وندىرۋدە بيىل وتاندىق تاۋار وندىرۋشىلەردىڭ ىشكى نارىقتاعى ۇلەسى 70%-عا جەتتى. پورتلاندتسەمەنت, كەراميكالىق تاقتايشا, تەمىربەتون مەن تاۋارلىق بەتون ءوندىرىسى درايۆەرگە اينالادى. رەزەرۆتەر اراسىندا شىمكەنتتەگى كەراميكالىق تاقتايشا شىعاراتىن جاڭا زاۋىت پەن تسەمەنت زاۋىتى بار. بيىل تسەمەنت ءوندىرىسى رەكوردتىق كولەمدە وسەدى. كەلەر جىلى كاسىپورىندار جوبالىق قۋاتىنا شىققان سايىن ءوسۋ دە جالعاسادى.
ساۋدا سالاسىندا 2025 جىلدىڭ قورىتىندىسى بويىنشا تاۋار اينالىمى نومينالدىق ماندە 108,9%-عا دەيىن وسەدى. كەلەسى جىلعى نىسانالى كورسەتكىش 106,5% وسىممەن 92,4 ترلن تەڭگەنى قۇرايدى.
ءوسىم مۇناي مەن مۇناي ونىمدەرىن ءوندىرۋ كولەمىن ساقتاۋ, ازىق-ت ۇلىك پەن ازىق-ت ۇلىك ەمەس تاۋارلاردى قايتا وڭدەۋدىڭ اۋقىمدى باعدارلاماسىن ىسكە قوسۋ, سونداي-اق قىتاي باعىتىن قوسا العاندا, كوتەرمە ەكسپورتتىق ساۋداعا باعدارلانعان ءتورت ءىرى B2B الاڭىنىڭ جۇمىسىن تولىقتاي باستاۋ ارقىلى جۇزەگە اسىرىلادى.
اۋىل شارۋاشىلىعىندا كەلەسى جىلى ازىق-ت ۇلىك پەن سۋسىن وندىرىسىندە جوعارى ءوسىم بولۋى مۇمكىن. ول تيىسىنشە 109% بەن 109,3%-دى قۇراماق.
كەڭەس سوڭىندا ۆيتسە-پرەمەر ورتالىق مەملەكەتتىك ورگاندارعا ونەركاسىپتىك ءوسۋدىڭ جوسپارلى كورسەتكىشىنە قول جەتكىزىپ, نەگىزگى ينۆەستيتسيالىق جانە ينفراقۇرىلىمدىق جوبالاردى جۇزەگە اسىرۋ ءۇشىن, قوسىمشا رەزەرۆتەردى پىسىقتاپ, اۋىل شارۋاشىلىعىندا, ساۋدا مەن كولىكتە تۇراقتى ءوسۋ سەرپىنىن قامتاماسىز ەتۋگە باسا نازار اۋدارا وتىرىپ, سالالاردى دامىتۋدىڭ جول كارتاسىن ازىرلەپ, ۇسىنۋدى تاپسىردى.
