جاڭا وكىلدىك «سارىارقا» الەۋمەتتىك-كاسىپكەرلىك كورپوراتسياسى مەن QazTrade ساۋدا ساياساتىن دامىتۋ ورتالىعىنىڭ قاتىسۋىمەن قۇرىلدى. ونىڭ باستى ماقساتى – قىتاي حالىق رەسپۋبليكاسىنان كەلەتىن ينۆەستورلاردى جان-جاقتى سۇيەمەلدەۋ, قاراعاندى وبلىسىنىڭ كاسىپكەرلەرىنە قىتاي نارىعىنا شىعۋعا قولداۋ كورسەتۋ, وتاندىق ءونىمدى ىلگەرىلەتۋ, سونداي-اق ىسكەرلىك بايلانىستاردى نىعايتۋعا ارنالعان B2B-كەلىسسوزدەر مەن كەزدەسۋلەر ۇيىمداستىرۋ.
بۇل كەڭسەنىڭ اشىلۋى بىرلەسكەن جوبالاردى جۇزەگە اسىرۋ بارىسىندا ءجيى كەزدەسەتىن اكىمشىلىك جانە كوممۋنيكاتسيالىق كەدەرگىلەردى ازايتىپ, بيزنەس ءۇشىن قولايلى ءارى اشىق ورتا قالىپتاستىرادى دەپ كۇتىلىپ جاتىر.
– باستى ماقساتىمىز – قاراعاندى وبلىسىنىڭ كاسىپكەرلەرىنە قىتاي نارىعىنا شىعۋعا ناقتى كومەك كورسەتۋ جانە شەتەلدىك ينۆەستورلاردى تارتۋ. جاڭا كەڭسەدە ءبىزدىڭ تۇراقتى وكىلىمىز جۇمىس ىستەيدى, ول تۋىندايتىن بارلىق ماسەلەنى جەدەل شەشۋمەن اينالىسادى. تولىق اقپاراتتى ينۆەستورلارعا قىزمەت كورسەتۋ ورتالىعىنان
+7-702-007-66-61 تەلەفونى ارقىلى الۋعا بولادى, – دەدى وبلىستىق ونەركاسىپ جانە كاسىپكەرلىك باسقارماسىنىڭ باسشىسى اسقار عازاليەۆ.
ءۇرىمجى قالاسىنداعى وكىلدىكتىڭ اشىلۋى قاراعاندى وبلىسى دەلەگاتسياسىنىڭ قىتايعا جاساعان جۇمىس ساپارىنىڭ ماڭىزدى قورىتىندىسى بولدى. ساپار اياسىندا ءوڭىر باسشىلىعى مەن بيزنەس وكىلدەرى بەيجىڭدە, شىڭجاڭ-ۇيعىر اۆتونوميالىق اۋدانىنداعى ءۇرىمجى قالاسىندا, سونداي-اق تسزينان (شاندۋن پروۆينتسياسى) جانە تانشان (حەبەي پروۆينتسياسى) قالالارىندا بولىپ, ءىرى يندۋستريالىق جانە لوگيستيكالىق نىسانداردى ارالادى. سونىمەن قاتار قىتايدىڭ بيزنەس قاۋىمداستىعى مەن مەملەكەتتىك قۇرىلىمدارىنىڭ وكىلدەرىمەن مازمۇندى كەزدەسۋلەر وتكىزىلدى.
كەلىسسوزدەر ناتيجەسىندە ەنەرگەتيكا, ماشينا جاساۋ, مەتاللۋرگيا, لوگيستيكا, اۆياتسيا جانە ەكولوگيالىق تەحنولوگيالار سالالارىندا بىرقاتار ناقتى ۋاعدالاستىقتارعا قول جەتكىزىلدى. سونىڭ ىشىندە ءۇرىمجى قالاسىندا شاحتينسك قالاسىندا جاڭا جىلۋ ەلەكتر ورتالىعىن سالۋ جونىندەگى ەنەرگەتيكالىق جوبانى ىسكە اسىرۋ تۋرالى كەلىسىمگە قول قويىلدى.
كولىك-لوگيستيكالىق الەۋەتتى دامىتۋ ماسەلەسى دە نازاردان تىس قالعان جوق. تاراپتار قاراعاندى مەن ءۇرىمجى اراسىندا تىكەلەي اۋە قاتىناسىن – جولاۋشىلار جانە جۇك رەيستەرىن ىسكە قوسۋ مۇمكىندىگىن تالقىلادى. قازىر بۇل باستاما بەلسەندى پىسىقتاۋ ساتىسىندا. سونىمەن قاتار قاراعاندى اۋەجايىنىڭ كارگو-تەرمينالىن ەكسپورتتىق-لوگيستيكالىق باعىتتى دامىتۋ ماقساتىندا ءتيىمدى پايدالانۋ جولدارى قاراستىرىلدى.
ءوڭىردىڭ يندۋستريالىق دامۋىنا سەرپىن بەرەتىن تاعى ءبىر ماڭىزدى قۇجات تسزينان قالاسىندا جاسالدى. مۇندا Sinotruk كومپانياسى, «Qaztehna» جانە «Saran Machinery» جاۋاپكەرشىلىگى شەكتەۋلى سەرىكتەستىكتەرى اراسىندا قاراعاندى وبلىسىندا اۆتوكومپونەنتتەر ءوندىرۋ جەلىسىن ىسكە قوسۋ, سەرۆيستىك ورتالىق پەن وڭىرلىك قوسالقى بولشەكتەر قويماسىن قۇرۋ جونىندەگى نيەت تۋرالى كەلىسىمگە قول قويىلدى.
ال تانشان قالاسىندا «Qaragandy Metallurgia Zauyty» جشس مەن «سارىارقا» ارنايى ەكونوميكالىق ايماعىندا كابەل زاۋىتىن سالۋ تۋرالى مەموراندۋمعا قول قويىلدى. بۇل جوبا وڭىردەگى ينفراقۇرىلىمدىق جانە ونەركاسىپتىك باستامالاردى ساپالى وتاندىق ونىممەن قامتاماسىز ەتۋگە باعىتتالعان.
ساپار بارىسىندا قاراعاندى مەن تانشان قالالارى اراسىندا باۋىرلاستىق تۋرالى مەموراندۋمعا قول قويىلۋى دا ەرەكشە مانگە يە. بۇل قۇجات الداعى ۋاقىتتا ەكونوميكالىق سەرىكتەستىكپەن قاتار ءبىلىم بەرۋ, مادەني جانە گۋمانيتارلىق الماسۋلارعا كەڭ جول اشادى.
قاراعاندى وبلىسى
