تاربيە ساعاتىن 4-سىنىپ جەتەكشىسى شولپان مولداعۇلوۆا «اۋىزشا جۋرنال» فورماتىندا وتكىزدى. جاڭا فورمات «تاۋەلسىزدىك وڭاي جولمەن كەلگەن جوق», «باقىتىم بار ءۇشىنشى – وتان دەگەن», «تاۋەلسىز قازاقستان: تاريح جانە تاعىلىم», «تاۋەلسىزدىك – بالالار كوزىمەن» جانە «قازاقستاننىڭ جەتى كەرەمەتىنە ساياحات» اتتى بەس تاقىرىپقا بولىنگەن.
اشىق تاربيە ساعاتى مەملەكەتتىك انۇرانمەن باستالدى. ودان كەيىن وقۋشىلارعا «تاۋەلسىزدىك وڭاي جولمەن كەلگەن جوق» اتتى تاقىرىپتا بەينەروليك كورسەتىلدى. وندا بالالار ازاتتىق جولىندا كۇرەسكەن ءباھادۇر بابالارىمىزدىڭ ەرلىگىمەن بىرگە ەل يگىلىگى جولىندا قىزمەت ەتكەن ايتۋلى قايراتكەرلەردىڭ ەڭبەگى جايىندا مول ماعلۇمات الدى. سونداي-اق ساباق بارىسىندا وقۋشىلار ءوز ونەرىن دە ورتاعا سالدى. ماسەلەن, «باقىتىم بار ءۇشىنشى – وتان دەگەن» بولىمىندە بالالار اباي اتامىزدان باستاپ, مىرجاقىپ دۋلات ۇلى, جۇبان مولداعاليەۆ, مۇقاعالي ماقاتاەۆ, فاريزا وڭعارسىنوۆا سەكىلدى كورنەكتى اقىنداردىڭ وتان, تۋعان جەر تۋرالى ولەڭدەرىن مانەرىنە كەلتىرىپ, جاتقا وقىدى. جاس كۇيشى باعدات الشىن «ەرتۇران» تۋىندىسىن اسقاقتاتا كۇمبىرلەتتى. ال «تاۋەلسىز قازاقستان: تاريح جانە تاعىلىم» اتتى بولىمىندە سىنىپ مۇعالىمى وقۋشىلارعا ەگەمەندىك العان جىلداردان بەرى ەلىمىزدە بولعان ەلەۋلى وقيعالارعا قاتىستى تانىمدىق سۇراقتار قويىپ, جەتكىنشەكتەر وعان ناقتى جاۋاپ بەردى. قىزىقتى سوزجۇمباقتاردى شەشتى. «قازاقستاننىڭ جەتى كەرەمەتىنە ساياحات» بولىمىندە ەلىمىزدەگى تابيعاتى اسەم ولكەلەرمەن جاقىن تانىستى. اسىرەسە ولارعا «التىن-ەمەل», «بۋراباي» ۇلتتىق تابيعي پاركى, بوزجىرا, شارىن شاتقالى, بۇرقانبۇلاق سارقىراماسى جانە حالقىمىز ەرەكشە قاسيەت تۇتاتىن تۇركىستان قالاسى تۋرالى قۇندى اقپاراتتار بەرىلدى.
سونىمەن قاتار تاربيە ساعاتى اياسىندا وقۋشىلاردىڭ شىعارماشىلىق قابىلەتىن دامىتۋ ماقساتىندا «تاۋەلسىزدىك – بالالار كوزىمەن» اتتى سۋرەت بايقاۋى ۇيىمداستىرىلدى. بايقاۋعا بالالار وزدەرى سالعان سۋرەتتەردى ۇسىندى. سولاردىڭ اراسىنان ۇزدىك شىققان جۇمىستار «ەڭ اسەرلى سۋرەت», «شىعارماشىلىق وي», «ەڭ كرەاتيۆتى جۇمىس», «ەڭ اسەرلى كومپوزيتسيا», «ۇلتتىق ورنەك كورىنىسى» سەكىلدى اتالىمدارمەن باعالانىپ, ماراپاتتالدى. مازمۇندى ءىس-شارا سوڭىندا جەتكىنشەكتەر «ەگەمەن ەلىم – قازاقستان!» اتتى ءاندى قوسىلىپ كەرەمەت شىرقادى. سونداي-اق سىنىپ جەتەكشىسى تاربيە ساعاتىنا بەلسەندى قاتىسقان بارلىق وقۋشىعا ۇلى تۇلعالارىمىزدىڭ بەينەسى بەدەرلەنگەن توسبەلگى تارتۋ ەتتى.
ءساليما تالىپبايقىزى
