بۇۇ-نىڭ باس كەڭسەسىندە ءورت شىقتى

استانا. 23 ناۋرىز. بۇۇ-نىڭ نيۋ-يوركتەگى شتاب-پاتەرىندە ءورت شىقتى. ءتىلسىز جاۋ باس اسسامبلەيا عيماراتىنىڭ استىڭعى قاباتىندا بولعان. بۇل تۋرالى تاسس حابارلادى. بۇۇ كەشەنى نيۋ-يوركتىڭ مانحەتتەن اۋدانىندا ورنالاسقانى بەلگىلى. ءورت دابىلى جەرگىلىكتى ۋاقىت بويىنشا ساعات 19:00 شاماسىندا (استانا ۋاقىتىمەن بۇگىن تاڭعى 05:00-دە) قوسىلعان. سول ساتتە ءبىرىنشى اۆەنيۋدىڭ بويىن ءورت ءسوندىرۋشى جانە جەدەل جاردەم كولىكتەرى باسىپ الدى. دەسەك تە, كوشە ءبىرجولا جابىلعان جوق. ءبىر ساعاتتىڭ ىشىندە جاعداي قالىپقا كەلىپ, اياق استىنان بولعان اپات اۋىزدىقتالدى. ول ءۇشىن بۇۇ-نىڭ ورتكە قارسى قىزمەتى مەن نيۋ-يورك قالاسىنىڭ ءورت باسقارماسىنا ايتارلىقتاي تەر توگۋگە تۋرا كەلدى. بۇۇ ءباسپاسوز قىزمەتىنىڭ وكىلى ۆاننينا ماەستراچچيدىڭ ايتۋىنشا, ءورتتىڭ شىعۋىنا ەلەكتر سىمدارىنىڭ قىسقا تۇيىقتالۋى سەبەپ بولعان. سونداي-اق, ول ءورت ءسوندىرۋ كەزىندە ىشتەگى ادامداردىڭ تىسقا شىعارىلعانىن ايتتى. ايتا كەتەيىك, بۇۇ-دا جەكسەنبى رەسمي تۇردە دەمالىس كۇنى بولىپ سانالادى. دەسەك تە, ءورت بولعان كۇنى بىرنەشە ساعات بۇرىن قاۋىپسىزدىك كەڭەسىنىڭ يەمەندەگى جاعدايعا بايلانىستى شۇعىل وتىرىسى بولعان ەدى. ءورت سالدارىنان عيماراتقا بەلگىلى ءبىر دەڭگەيدە زاقىم كەلىپ, ۇيىم شىعىنعا ۇشىراعان. ويتكەنى, ءورت شىققان ورىندا كادەسىيلار ساتاتىن دۇكەن ورنالاسقان بولاتىن. دەگەنمەن, بۇگىن عيمارات ادەتتەگىدەي جۇمىس كۇنىن باستادى. ەلامان قوڭىر. دەرەك: تاسس سۋرەت:  ntv.ru.