Tañba بىرىڭعاي تاڭبالاۋ وپەراتورى ءباسپاسوز قىزمەتىنىڭ حابارلاۋىنشا, 2026 جىلدىڭ 1 اقپانىنان باستاپ, «تاڭبالاۋعا جاتاتىن تاۋارلار تىزبەسىن ايقىنداۋ تۋرالى» بۇيرىققا سايكەس قازاقستاندا سىرا جانە سىرا سۋسىندارى مىندەتتى تاڭبالاۋعا جاتاتىن تاۋارلار تىزبەسىنە ەنگىزىلدى. وندىرۋشىلەر مەن يمپورتتاۋشىلار جۇيەدە تىركەلۋى مىندەتتى.
سىرا مەن سىرا سۋسىندارىن مىندەتتى تاڭبالاۋدى ەنگىزۋ كەزەڭ-كەزەڭىمەن ىسكە اسىرىلادى. 2026 جىلعى 1 اقپاننان باستاپ – كەگتەر مەن بوتەلكەلەردە شىعارىلاتىن سىرا مەن سىرا سۋسىندارىن مىندەتتى تاڭبالاۋ, ال 2027 جىلعى 1 قاڭتاردان باستاپ – قاڭىلتىر بانكىلەردەگى سۋسىندار تاڭبالانا باستايدى. اينالىمعا ەنگىزىلگەنگە دەيىن ءاربىر تاۋار بىرلىگىنە Data Matrix كودى قويىلۋى قاجەت.
«سىرا ونىمدەرى اكتسيزدەلەتىن تاۋارلارعا جاتاتىنىنا قاراماستان ەلىمىزدە بۇل سۋسىندار ەسەپكە الۋ-باقىلاۋ ماركالارىمەن تاڭبالانباعان, ياعني بۇل جونىندە ورتالىقتاندىرىلعان اقپاراتتىق جۇيە جوق. سوندىقتان تۇتىنۋشىلار تاۋاردىڭ زاڭدى شىعۋ تەگى تۋرالى مالىمەتتەردەن حابارسىز. ونىمدەر باقىلانباعاننان كەيىن ەلگە كونتراباندالىق ونىمدەردى تاسىمالداۋ قاۋپى بار», دەلىنگەن تاڭبالاۋ وپەراتورى تاراتقان مالىمەتتە.
تاۋاردى تاڭبالاۋدىڭ مەملەكەت ءۇشىن تيىمدىلىگى – سىرا قايناتۋ ونىمدەرىنىڭ زاڭسىز اينالىمىنىڭ ازايۋى جانە سالىق تۇسىمدەرىنىڭ ۇلعايۋى. ءوز كەزەگىندە تۇتىنۋشىلار شىنايى ءارى ساپالى ءونىمدى ساتىپ الۋعا مۇمكىندىك الادى.
تسيفرلىق تاڭبالاۋ «كوپىرشىك» سۋسىنداردىڭ ءوندىرىسى پەن يمپورت كولەمىنە باقىلاۋدى كۇشەيتۋگە, زاڭسىز ءونىم اينالىمىن تومەندەتۋگە جانە تۇتىنۋشىلاردىڭ قۇقىقتارىن قورعاۋ دەڭگەيىن ارتتىرۋعا مۇمكىندىك بەرەدى.
قازىر ەل ازاماتتارى ءدارى-دارمەكتەر مەن تەمەكى ونىمدەرىنىڭ زاڭدىلىعى مەن تۇپنۇسقالىعى جونىندە Naqty Onim تەگىن ءموبيلدى قوسىمشاسىندا تاڭبالاۋ كودىن سكانەرلەۋ ارقىلى تەكسەرە الادى. ەگەر كود جارامسىز بولسا نەمەسە مۇلدە بولماسا, ازاماتتار قوسىمشانىڭ وزىندە ءوتىنىش قالدىرا الادى, ول كەيىن تەكسەرۋ جۇرگىزۋ ءۇشىن ۋاكىلەتتى ورگانعا جولدانادى.
ساۋدا جانە ينتەگراتسيا ءمينيسترىنىڭ جاڭا بۇيرىعىنا سايكەس, مىندەتتى تاڭبالاۋعا جاتاتىن تاۋارلار تىزىمىنە كيىك دەريۆاتتارى, سىرا ونىمدەرى, موتور مايلارى جانە جەڭىل ونەركاسىپ تاۋارلارى دا ەنگىزىلدى. 2026 جىلعى 1 اقپاننان باستاپ موتور مايلارى مەن سىرا ونىمدەرىن تاڭبالاۋ باستالادى, ال 1 جەلتوقساننان باستاپ جەڭىل ونەركاسىپ تاۋارلارىن تاڭبالاۋ ەنگىزىلەدى.
وندىرۋشىلەر مەن يمپورتتاۋشىلار https://tanba.markirovka.kz/ سىلتەمەسى ارقىلى ونەركاسىپتىك ستەندتە تىركەۋدەن وتە الادى. تىركەۋ ءۇشىن ەلەكتروندىق تسيفرلىق قولتاڭبا, ۇيىم تۋرالى وزەكتى دەرەكتەر (بسن/جسن, اتاۋى, بايلانىس مالىمەتتەرى), سونداي-اق ەتسق-مەن جۇمىس ىستەۋ ءۇشىن ورناتىلعان NCALayer باعدارلاماسى بولۋى قاجەت.
ودان كەيىن قوسىلۋ تۋرالى كەلىسىمگە ەتسق ارقىلى قول قويىپ, قاجەت بولعان جاعدايدا تاڭبالاۋ كودتارىن الۋ تۋرالى شارتقا دا كەلىسىم بەرەدى. تىركەلىپ بولعان سوڭ ءۇش جۇمىس كۇنى ىشىندە كورسەتىلگەن ەلەكتروندىق پوشتا مەكەنجايىنا قۇپياسوز ورناتۋعا ارنالعان سىلتەمەسى بار راستاۋ حاتى كەلەدى.
پايدالانۋشى تىركەلگەننەن كەيىن جەكە كابينەت اشىلادى. وندا تاڭبالاۋ مەن ءونىمدى, ونىڭ كولەمى مەن قۇرامىن, باسقا دا سيپاتتامالارىن قاراپ وتىرۋ ءۇشىن تاۋار كارتوچكالارىن جاساپ الۋعا, ونى وزگەرتۋگە, وڭدەۋگە بولادى.
