اۋرۋى اسقىنىپ, ابدەن شاراسى تاۋسىلعان ناۋقاسقا شۇعىل جۇرەك ترانسپلانتاتسياسى قاجەت بولعاندىقتان, ماماندار ونى رەسپۋبليكالىق كۇتۋ پاراقشاسىنا ەنگىزگەن ەدى. دونور – ارتەريالىق گيپەرتەنزيانىڭ اۋىر تۇرىنە شالدىعىپ, ينسۋلت العان 50 جاستاعى ايەل ادام. ناۋقاس جەدەل تۇردە ورتالىق قالالىق كلينيكالىق اۋرۋحاناعا جەتكىزىلگەندە دارىگەرلەر كونسيليۋمى ونىڭ ميى سەمگەنىن انىقتاپ, قايتىس بولعاننان كەيىنگى دونورلىققا جارامدىلىعىن راستادى. مارقۇمنىڭ تۋىستارى كەلىسىمىن بەرگەن سوڭ, جەدەل دونورلىق جۇرەكتى الۋ وپەراتسياسى باستالدى. دەنساۋلىق ساقتاۋ مينيسترلىگىنە قاراستى ترانسپلانتاتسيا جانە جوعارى تەحنولوگيالىق مەديتسينالىق قىزمەتتەردى ۇيلەستىرۋ جونىندەگى رەسپۋبليكالىق ورتالىق وسى ۇدەرىستىڭ بارلىق كەزەڭىن ءوز مىندەتىنە الدى.
الماتى قالالىق كارديولوگيالىق ورتالىعى جۇرگىزگەن العاشقى جۇرەك اۋىستىرۋ وپەراتسياسى بەس ساعاتتان استام ۋاقىتقا سوزىلىپ, ويداعىداي اياقتالدى. ترانسپلانتاتسيالىق وپەراتسيانى ورتالىق پەن UMC كورپوراتيۆتىك قورىنىڭ ماماندارىنان قۇرالعان كاسىبي دارىگەرلەر جاسادى. كۇردەلى ۇدەرىسكە قالالىق جۇرەك ورتالىعىنىڭ ديرەكتورى ەرماعانبەت قۋاتباەۆ پەن UMC باسقارما توراعاسى, پروفەسسور يۋري پيا جەتەكشىلىك ەتتى. ايتا كەتۋ كەرەك, UMC كومانداسى اقپارات تۇسكەن بويدا الماتىداعى ارىپتەستەرىنە قولداۋ كورسەتۋ ماقساتىندا جەدەل تۇردە ۇشىپ كەلدى.
يۋري ۆلاديميروۆيچ ورتالىق ۇجىمىن تاريحي وقيعامەن قۇتتىقتاپ, ونىڭ الماتىداعى كارديوحيرۋرگيانىڭ جاڭا كەزەڭگە قادام باسۋىنا جول اشقانىن اتاپ ءوتتى. سونداي-اق ول دونوردىڭ جاقىندارىنا كوڭىل ايتا وتىرىپ, ولاردىڭ شەشىمى تالاي جاننىڭ ءومىرىن ساقتاپ قالعانىنا ەرەكشە توقتالدى.
وسى قاراشا ايىندا عانا رەسمي تۇردە جۇرەك ترانسپلانتاتسياسىن جۇرگىزۋگە قۇقىلى مەديتسينالىق ۇيىمدار تىزىمىنە ەنگىزىلگەن الماتى قالالىق كارديولوگيالىق ورتالىعىندا بارلىق جاعداي جاسالعان, حالىقارالىق ستاندارتتارعا ساي جابدىقتار ورناتىلعان. دياگنوستيكا مەن ەمدەۋدىڭ وزىق تاسىلدەرى قولدانىلادى. جوعارى بىلىكتى كارديولوگ, كارديوحيرۋرگ, انەستەزيولوگ-رەانيماتولوگ, پەرفۋزيولوگتەر, وپەراتسيا جاساسۋعا بەيىمدەلگەن بىلىكتى مەيىربيكەلەر قىزمەت ەتەدى.
– ترانسپلانتولوگيا باعدارلاماسىنا قوسىلۋ – پاتسيەنتتەردىڭ ءومىرىن ۇزارتۋعا, ساپاسىن ارتتىرۋعا باعىتتالعان ماڭىزدى قادام. بۇل تەك مەديتسينانىڭ دامۋ دەڭگەيىن ەمەس, قوعامنىڭ دا دونورلىق مادەنيەتكە دايىن ەكەندىگىن كورسەتەدى, – دەيدى ە.قۋاتباەۆ.
تۋىستارىنىڭ رۇقساتىمەن وزگە دونورلىق اعزالار دا پايدالانىلدى. قوس بۇيرەگى ۇلتتىق عىلىمي حيرۋرگيا ورتالىعىنا جونەلتىلىپ, بىرەۋى 15 جاستاعى قىزدىڭ, ەكىنشىسى 30 جاستاعى ايەلدىڭ ءومىرىن ساقتاپ قالدى. ەكى كوزدىڭ قاساڭ قابىقتارى ورتالىق قالالىق كلينيكالىق اۋرۋحاناسىندا ترانسپلانتاتسيالاندى.
جالپى, بۇل – بيىل الماتى قالالىق كلينيكالىق اۋرۋحاناسىندا تىركەلگەن ءتورتىنشى مۋلتيورگاندى دونور. ءبىرىنشى مايىتتىك دونور ناۋرىز ايىندا شىعىپ, ەكى بۇيرەگى مەن جۇرەگى جاڭا يەلەرىن تاپتى. ەكىنشى جاعداي ماۋسىم ايىندا تىركەلدى. دونور بەس پاتسيەنتتىڭ ءومىرىن ساقتاپ قالدى. ونىڭ دا جۇرەك, بۇيرەك, سونداي-اق قاساڭ قابىقتارى ترانسپلانتاتسيالاندى. بۇل كەراتوپلاستيكا ارقىلى ەكى وپەراتسيا جاساۋعا مۇمكىندىك بەردى. ءۇشىنشى مۋلتيورگاندى دونورلىق ۇدەرىس قازان ايىندا جۇزەگە استى. 1962 جىلى تۋعان ايەلدىڭ دونورلىعىنىڭ ارقاسىندا التى پاتسيەنت امان قالدى. ونىڭ جۇرەگى, باۋىرى, ەكى بۇيرەگى, كوزدىڭ قاساڭ قابىقتارى ءارتۇرلى جاستاعى ناۋقاستارعا سالىندى.
بۇل يگى ءىستى ۇيىمداستىرۋدا اۋرۋحانانىڭ ستاتسيونارلىق ترانسپلانتولوگيا ۇيلەستىرۋشىسى عالىمجان پىرماعامبەتوۆتىڭ قاجىر-قايراتى ەرەن. بىلىكتى مامان دونوردىڭ تۋىستارىنا ءتۇسىندىرۋ جۇمىستارىن جۇرگىزىپ, كەلىسىم الۋ مەن بارلىق مەديتسينالىق قىزمەتتىڭ ءوزارا بايلانىسىن رەتتەپ وتىرادى.
الماتى
