سۋرەت: gov.kz
باسقوسۋدى جازۋشىلار وداعى باسقارماسىنىڭ توراعاسى مەرەكە قۇلكەنوۆ اشىپ, جۇرگىزدى. ءىس-شارا بارىسىندا وداقتىڭ ءبىر جىل ىشىندە اتقارعان جۇمىستارى تۋرالى بەينەروليك كورسەتىلدى. سونداي-اق پارلامەنت سەناتىنىڭ دەپۋتاتى رۋسلان رۇستەموۆ سەنات توراعاسى ماۋلەن اشىمباەۆتىڭ, مادەنيەت جانە اقپارات ءمينيسترىنىڭ ورىنباسارى ايبەك سىدىقوۆ, پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆانىڭ قۇتتىقتاۋ حاتىن وقىپ بەردى. ال قىرعىز رەسپۋبليكاسىنىڭ مەملەكەتتىك حاتشىسى, قىرعىزستاننىڭ ەل جازۋشىسى ارسلان كويشيەۆ, قازاقستاننىڭ حالىق جازۋشىسى تولەن ابدىك, جازۋشى, مەملەكەتتىك سىيلىقتىڭ لاۋرەاتى روزا مۇقانوۆا, جازۋشى, فيلولوگ-عالىم نۇرداۋلەت اقىش, «جاڭا قازاقستاننىڭ ادەبي-تانىمدىق پانوراماسى» جوباسىنىڭ قاتىسۋشىلارى – جازۋشى جاقسىلىق مۇراتبەك پەن اقىن ازامات ابىلقايىر ءسوز سويلەپ, ءوز وي-پىكىرلەرىن ايتتى.
سونىمەن قاتار ازەربايجاننىڭ حالىق جازۋشىسى, ازەربايجان جازۋشىلار وداعىنىڭ توراعاسى انار رزاەۆتىڭ, وزبەكستان پرەزيدەنتىنىڭ كەڭەسشىسى, جازۋشى حايريددين سۇلتاننىڭ, تۇركسوي حالىقارالىق ۇيىمىنىڭ باس حاتشىسى سۇلتان راەۆتىڭ قۇتتىقتاۋلارى بەينەبايلانىس ارقىلى تىڭدالدى.
جيىن اياسىندا «تۇركى الەمىنىڭ ادەبيەتى» جوباسى اياسىندا شىققان 4 جاڭا كىتاپتىڭ, سونداي-اق «جاڭا قازاقستاننىڭ ادەبي-تانىمدىق پانوراماسى» جوباسىنىڭ اياسىندا جارىق كورگەن جاس قالامگەرلەردىڭ 20 كىتابىنىڭ تۇساۋى كەسىلدى. بۇدان بولەك, «قوعامدىق ماڭىزى بار ادەبيەتتەردى باسىپ شىعارۋ جانە تاراتۋ» مەملەكەتتىك باعدارلاماسى شەڭبەرىندە باسىلعان قادىر مىرزا ءالى مەن تۇمانباي مولداعاليەۆتىڭ كىتاپتارى تانىستىرىلدى.
جازۋشى تولەن ابدىك ەلوردادا العاش رەت ۇيىمداستىرىلعان مۇنداي جىلدىق قورىتىندى جيىننىڭ ماڭىزىن اتاپ ءوتىپ, جازۋشىلار وداعىنىڭ بىرجىلدىق جۇمىسىنا جوعارى باعا بەردى. ال قىرعىز جازۋشىسى ارسلان كويشيەۆ ءىس-شارانى ۇيىمداستىرعان قازاقستان جازۋشىلار وداعىنا العىس ايتىپ, قازاقستاندىق قالامگەرلەردى كەلەر جىلى وتەتىن ىستىقكول حالىقارالىق فورۋمىنا قاتىسۋعا شاقىردى.
ءوز كەزەگىندە جازۋشىلار وداعىنىڭ توراعاسى مەرەكە قۇلكەنوۆ بيىل اتقارىلعان جۇمىستاردى قورىتىندىلاي كەلە, كلاسسيك جازۋشى تولەن ابدىك پەن قالامگەر قانات ابىلقايىردىڭ كىتاپتارىن حالىقارالىق بۋكەر سىيلىعىنا ۇسىنۋ باعىتىندا ءتيىستى جۇمىستار جۇرگىزىلەتىنىن اتاپ ءوتتى. سونداي-اق وداق باسشىسى بيىل 75 جاسقا تولعان استانالىق بەلگىلى قالامگەر, جۋرناليست نەسىپ جۇنىسباەۆتى مەرەيتويىمەن قۇتتىقتاپ, يىعىنا شاپان جاپتى.
ازامات قۇسايىن
