شىعارماشىلىق كەشتىڭ شىمىلدىعى گۇلزەينەپ سادىرقىزىنىڭ قالامىنان تۋعان «نالەت», ء«ايبيبى», «ايەل جانى», «قاتال ۇكىم» اتتى وتباسىلىق ءومىردىڭ شىنايى بەت-بەينەسىن باياندايتىن اڭگىمەلەر مەن پوۆەستەر جەلىسىنە قۇرىلعان قىسقاشا قويىلىمدارمەن ءتۇرىلدى. ءار تاقىرىپقا ارقاۋ بولعان قازاق ايەلىنىڭ كونبىستىگى, مەيىرىمدىلىگى مەن قاتال تاعدىرعا توزىمدىلىگىن ء«سۇيىنباي» حالىق تەاترى ارتىستەرىنىڭ جاندى بەينەلەۋى, جانارعا جاس ءۇيىردى. جۋرناليستىك جولدا قيىن دا كۇردەلى تاعدىر يەلەرىمەن جۇزدەسىپ, ولاردىڭ تۇرمىس-تىرشىلىگىن جۇرەك سۇزگىسىنەن وتكىزگەن قالامگەردىڭ بۇل تۋىندىلارى ەش بوياماسىز شىنايى كەستەلەنىپ, وقىرمان جۇرەگىنە جەتكەنى اقيقات.
كورەرمەنگە تەاتر تاماشالاعانداي ادەمى اسەر قالدىرعان سالتاناتتى شارانىڭ ەكىنشى ءبولىمى مەرەيتوي يەسىنە ارنالعان اقجارما تىلەكتەرگە جالعاستى. جەتىسۋ وبلىستىق «جەتىسۋ» راديوسىنىڭ باسشىسى, «التىن توبىلعى» جانە «التىن قالام» جۇلدەسىنىڭ يەگەرى, جازۋشى ەسبولات ايدابوسىن تىزگىندەگەن ادەبي-سازدى كەشتىڭ العاشقى ءسوز تيەگىن پارلامەنت سەناتىنىڭ دەپۋتاتى, مەملەكەت جانە قوعام قايراتكەرى دارحان قىدىرالى اعىتتى. جۇرەكجاردى لەبىزىندە قالامى جۇردەك ءجۋرناليستىڭ وتاندىق بۇقارالىق اقپارات قۇرالدارىن دامىتۋعا قوسقان ۇلەسىن ايرىقشا اتاي كەلە, گۇلزەينەپ سادىرقىزىنا پارلامەنت سەناتىنىڭ قۇرمەت گراموتاسىن تاپسىردى. سونىمەن قاتار پرەزيدەنت كەڭەسشىسى مالىك وتارباەۆتىڭ جىلى لەبىزىن جەتكىزدى.
«گۇلزەينەپ اپكەمىز «Egemen Qazaqstan» گازەتىنە العاش ستەنوگرافيست بولىپ جۇمىسقا قابىلدانعان. سويتە ءجۇرىپ ءوزىنىڭ جازۋ ءستيلىن قالىپتاستىردى. قالامىنان تۋىنداعان الەۋمەت, ساياساتقا قاتىستى وتكىر دە وزەكتى تاقىرىپتارى پارلامەنت مىنبەرىنەن دەپۋتاتتىق ساۋال رەتىندە جولدانىپ, ەلدىك ماسەلەلەردىڭ شەشىم تابۋىنا ءۇن قوستى. جالپى, قازاق ايەلى دەگەندە – اسەمدىكتىڭ, سۇلۋلىقتىڭ, ادالدىقتىڭ, بەينەتكەشتىكتىڭ, توزىمدىلىكتىڭ, مەيىرباندىقتىڭ كەلبەتى كەلەدى. گۇلزەينەپ سادىرقىزى – ءوزى دە, ءسوزى دە كوركەم, جانى دا, جازۋى دا سۇلۋ جۋرناليست-جازۋشى. كۇرمەۋى قيىن كۇردەلى ماسەلەنى دە گازەت بەتىندە قىزدىڭ جيعان جۇگىندەي ەتىپ كورسەتە ءبىلدى. ەكىنشىدەن, وتباسىنا, كاسىبىنە, ءوزى 45 جىلعا جۋىق جۇمىس ىستەگەن «ەگەمەن قازاقستان» گازەتىنە ادالدىعىن اتار ەدىم. قازاقتىڭ قابىرعالى قالامگەرلەرىنىڭ ءتالىمىن الدى, تاجىريبەسىن ۇشتادى», دەگەن دارحان قىدىرالى جۋرناليست گۇلزەينەپ سادىرقىزى ۇلكەن جۇرەكتى, قازاقتىڭ قايسار قىزى ەكەنىن ايرىقشا اتادى. جانى نازىك ءجۋرناليستىڭ ءوزى شەكپەنىنەن شىققان حالىق جازۋشىسى شەرحان مۇرتازاعا جاساعان قامقورلىعىن مىسال ەتتى.
سالتاناتتى شارادا پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆانىڭ مەرەيتوي يەسىنە جولداعان قۇتتىقتاۋ حاتىن «قازاق گازەتتەرى» جشس الماتى فيليالىنىڭ باسشىسى باعاشار تۇرسىنباي ۇلى وقىپ بەردى. قۇتتىقتاۋ حاتتا: ء«وزىڭىزدى ۇلتتىق جۋرناليستيكادا ءوز قولتاڭباسىن قالىپتاستىرىپ, قازاق ءباسپاسوزىنىڭ مازمۇنىن بايىتقان قالامگەر رەتىندە قۇرمەتتەيمىز. كوپ جىل عاسىرلىق تاريحى بار «Egemen Qazaqstan» گازەتىندە الەۋمەت, رۋحانيات, مادەنيەت سالالارىنداعى وزەكتى ماسەلەلەرگە قالام تەربەپ, وتاندىق اقپارات كەڭىستىگىنىڭ دامۋىنا ەلەۋلى ۇلەس قوستىڭىز. قالامىڭىزدان تۋعان پروزالىق شىعارمالارىڭىز وقىرمان ولجاسىنا اينالىپ, ادەبيەتسۇيەر قاۋىمنىڭ شىنايى قۇرمەتى مەن ىقىلاسىنا بولەنىپ كەلەسىز. مەرەيلى جاسىڭىزبەن قۇتتىقتاي وتىرىپ, سىزگە زور دەنساۋلىق, شىعارماشىلىعىڭىزعا تولايىم تابىس, اۋلەتىڭىزگە اماندىق پەن باياندى باق تىلەيمىن!», دەلىنگەن.
ءوز كەزەگىندە ءوڭىر باسشىسىنىڭ ىستىق ىقىلاسىن جەتكىزگەن وبلىس اكىمىنىڭ ورىنباسارى عاني مايلىباەۆ تا جۋرناليست گ.سادىرقىزىنىڭ قالامىنا ادالدىعى مەن ەڭبەكقورلىعىن ەرەكشە اتاپ ءوتتى. ال اقىندار مەن باتىرلار ەلى اتانعان جامبىل اۋدانىنىڭ اكىمى نۇرلان ەرتاس ۇلى ساحنا تورىندە گۇلزەينەپ سادىرقىزىنا قازاقى داستۇرمەن سىي-قۇرمەت كورسەتتى.
مىنبەدە ءسوز العاندار قاتارىندا بەلگىلى اقىن, ايگىلى «كوك تۋدىڭ جەلبىرەگەنى» اتتى ءاننىڭ ءسوزىن جازعان الماس احمەتبەك ۇلى قانداستار اتىنان ءسوز الىپ, گۇلزەينەپ سادىرقىزىنىڭ كوشى-قون ساياساتىن سىنعا العان «كوش-كەرۋەن كەرى بۇرىلىپ كەتپەسە ەكەن...» اتتى ماقالاسىن دۇنيەجۇزى قازاقتارى قالاي جىلى قابىلداعانىن, جۋرناليستىك پايىمى مەن قالامىنىڭ قارىمى سىرتتان كەلەتىن قانداستار تۋرالى زاڭ قابىلداۋعا قالاي اسەر ەتكەنىن مىسال ەتتى. ءسويتىپ, گۇلزەينەپ سادىرقىزىن «مەملەكەتتىك ساياساتقا وزگەرىس اكەلگەن جۋرناليست» دەپ باعالاپ, قانداستار اتىنان ات مىنگىزدى.
شىعارماشىلىق كەشكە ەسىمدەرى ەلگە تانىمال «ەگەمەندىك» جۇماگۇل سولتى, سۇلەيمەن مامەت, كۇمىسجان بايجان, قورعانبەك امانجول, تالعات ءسۇيىنباي, ساياسات بەيىسباي, سەرىك ءپىرنازار سىندى ارداگەر-جۋرناليستەر مەن قازىرگى قىزمەتكەرلەردىڭ ءبىر توبى قاتىستى. ارىپتەستەر اتىنان ءسوز العان «Egemen Qazaqstan» گازەتىنىڭ باس رەداكتورى عابيت مۇسىرەپ الدىمەن «قازاق گازەتتەرى» جشس ديرەكتورى ديحان قامزابەك ۇلىنىڭ ارنايى قۇتتىقتاۋىن تاپسىردى. وندا گۇلزەينەپ سادىرقىزىن كاسىبي تۇرعىدا ەلەۋلى ۇلەس قوسقان قالامگەر رەتىندە ەرەكشە باعالايتىنى, «پەرزەنتحانا پەردەسى... تالاي سىردى بۇركەپ تۇر» اتتى سەريالىق ماقالالارىنان باستاپ, «ايدالادا اق وتاۋ», «اتى عانا ارداقتى ما؟», «اكەسى ولگەن قانداي-دى», باسقا دا كولەمدى پروبلەمالىق ماقالالارىنىڭ قوعامعا قوزعاۋ سالعانىن اتادى.
«بۇل اتالعان گازەتتىڭ سول كەزدەگى ءتىلشىسىنىڭ قالامىنان تۋعان ماقالالارىنىڭ وزەكتىلىگىن كورسەتەدى. وسىنداي تالانتتى پەرزەنتتەرىن ارداقتاپ وتىرعان اقىندار مەن باتىرلار ەلىنىڭ جۇرتشىلىعىنا مىڭ العىس», دەدى باس رەداكتور.
پروزا جانرىنداعى شىعارماشىلىعى مەن ەرەكشەلىگى دە كەڭىنەن ءسوز بولدى. بۇل ورايدا جازۋشىلار وداعىنىڭ حاتشىسى, ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى قانسەيىت ابدەز ۇلى, كورنەكتى سىنشى, جازۋشى ءامىرحان مەڭدەكە ورالىمدى وي-پىكىرلەرىن ورتاعا سالدى. مەرەيتوي يەسىنە جازۋشىلار وداعىنىڭ مۇشەلىگىنە قابىلدانعانى تۋرالى كۋالىك پەن توسبەلگىسىن تاپسىردى.
«جامبىل ەلىنىڭ قولىنا قالام ۇستاعان پەرزەنتتەرى تاعى جيىلىپ, قازاقتىڭ تالانتتى جۋرناليسىنە, قالامگەرىنە قۇرمەت كورسەتىپ وتىرسىزدار. وتە ريزامىن. بۇل – ەلدىڭ تويى. مىنە, وسى قاسيەتتى توپىراقتان تۇلەپ ۇشقان گۇلزەينەپ سادىرقىزىنىڭ دا قۋاتتى قالامى قازاق رۋحانياتىنىڭ قورجىنىن قۇندى شىعارمالارمەن بايىتىپ وتىر», دەدى ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى قانسەيىت ابدەز ۇلى.
ادەبي-سازدى كەشتە «ولكە تىنىسى» جشس ديرەكتورى, بەلگىلى اقىن كادىربەك قۇنىپيا ۇلى جىردان شاشۋ شاشسا, جۋرناليستەر وداعىنىڭ وبلىستىق فيليالىنىڭ باسشىسى, «الاتاۋ ارايى» گازەتىنىڭ باس رەداكتورى قۋانىش تۇڭعاتار دا ىزگى تىلەگىن جەتكىزدى.
اۋەزدى انمەن ورىلگەن سالتاناتتى شارا سوڭىندا قالامگەر گۇلزەينەپ سادىرقىزىنىڭ «ايەل جانى» اتتى پروزالىق جيناعى مەن «قانەكەي, قالام, سويلەشى» كىتاپتارىنىڭ تۇساۋى كەسىلدى. كىتاپ وبلىس اكىمدىگىنىڭ قولداۋىمەن جارىق كوردى.
بۇگىندە قالامگەر شىعارمالارىنا وزەك بولعان اقتەرەك اۋىلى كوركەيىپ كەلەدى. وعان ءتول پەرزەنتىنىڭ قوسقان ۇلەسى از ەمەستىگىن جەرلەستەرى اتىنان ءسوز العان «اقتەرەك» شارۋا قوجالىعىنىڭ توراعاسى, اۋداننىڭ قۇرمەتتى ازاماتى تەمىرلان ءشاينۇسىپوۆ اتاپ ايتتى. ءسويتىپ, ايەل جانىنىڭ مىڭ قاتپار تەرەڭ يىرىمدەرىنە بويلاپ, قۇندى شىعارمالار جازعان جۋرناليست-جازۋشى, «اققۋ عۇمىرلى تاعدىر», «ماحابباتىم جۇرەگىمدە», «تاۋ تۇلعا», «القا» باسپاسى مۇرىندىق بولعان ادەبي بايقاۋدىڭ باس جۇلدەسىن قانجىعالاعان ء«ايبيبى» اڭگىمەلەر مەن پوۆەستەر جيناعىنىڭ اۆتورى, جۋرناليستەر, جازۋشىلار وداعىنىڭ مۇشەسى گۇلزەينەپ سادىرقىزىنىڭ مەرەيتويىن ونەر مايتالماندارى باعدات سامەدينوۆا, ۇلجان ايناقۇلوۆا باستاعان ساحنا ساڭلاقتارى اسەم انمەن ارلەدى, جۇرەكتەردى تەربەدى.
الماتى وبلىسى,
جامبىل اۋدانى
