ونەركاسىپكە ەنگىزىلگەن جاساندى ينتەللەكت

اكسەلەراتسيا دەگەنىمىز – ستارتاپتاردى جەدەل دامىتۋعا ارنالعان ارنايى باعدارلاما. مۇندا جاس كاسىپكەرلەر بيزنەس-مودەلىن پىسىقتاپ, ءونىمىن نارىققا شىعارۋدىڭ جولدارىن ناقتى­لايدى ءارى ينۆەستورلارمەن بايلانىس ورناتادى. ادەتتە قاتىسۋشىلار تاجىري­بەلى مەنتورلارمەن بىرگە جۇمىس ىستەپ, مار­كەتينگ, قارجىلاندىرۋ جانە تەحنو­لوگيالىق دامۋ بويىنشا پراكتيكالىق ءبىلىم الادى. سونىڭ ناتيجەسىندە ستارتاپتار از ۋاقىتتا قارقىن الىپ, جوباسىن ناقتى ونىمگە اينالدىرىپ, ينۆەستيتسيا تارتۋعا ءبىر قادام جاقىندايدى.

«Industrial AI Acceleration» باعدارلاماسى ەلىمىزدىڭ تۇكپىر-تۇكپىرىن­دەگى ونەرتاپقىشتار مەن ءىرى ونەركاسىپ وكىل­دەرىن ءبىر الاڭدا توعىستىردى. بار­لىعى 90 ءوتىنىم تۇسكەن. ىرىكتەۋ قورى­تىن­دىسى بويىنشا 43 كوماندا قابىل­دانىپ, ولاردىڭ 38-ءى ناقتى وندىرىس­تىك سۇرانىستارمەن جۇمىس ىستەۋگە كىرىستى.

«باعدارلامانىڭ ماقساتى – تەك اكسەلەراتسيا وتكىزۋ ەمەس, ستارتاپتار مەن ونەركاسىپ اراسىندا تۇراقتى ءارى ۇزاقمەرزىم­دى ىنتىماقتاستىق جۇيەسىن قالىپ­تاستىرۋ. بۇگىندە جاساندى ينتەللەكت جانە IT-شەشىمدەر تانىستىرىلىم دەڭگەيىنەن ءوتىپ, وندىرىستە جۇمىس ىستەي باستاعانىن كورىپ وتىرمىز», دەدى «Astana Hub» يندۋستريا 4.0 ءوفيسىنىڭ ديرەكتورى اناربەك وتەعۇلوۆ.

قورىتىندى Demo Day اياسىندا 33 كوماندا ءوز ناتيجەلە­رىن كوپشىلىك نازارىنا ۇسىن­دى. باعدارلاما اياسىندا ءساتتى ەنگىزىلگەن جوبالاردىڭ ءبىرى – «SafeSight AI». ستارتاپ وندىرىستىك قاۋىپسىزدىكتى باقىلاۋ ءۇشىن كومپيۋتەرلىك كورۋ تەحنو­لو­گياسىن قولدانادى. مۇنداعى بەينە­باقىلاۋ كامەرالارى ارقىلى جۇيە تەحنيكا قاۋىپسىزدىگى ەرەجەلەرىنىڭ بۇزىلۋىن, سونداي-اق قاۋىپتى ارەكەتتەردى اۆتوماتتى تۇردە انىقتايدى. «SafeSight AI» شەشىمى مۇناي-گاز, تاۋ-كەن جانە اۋىر ونەركاسىپ سالالارىندا قولدانىلىپ, وندىرىستىك جاراقاتتاردى 20-40 پايىزعا دەيىن ازايتىپ وتىر. سونىمەن قاتار ەڭبەك قاۋىپسىزدىگىنە قاتىستى تەكسەرۋلەر مەن تەرگەۋلەرگە كەتەتىن شىعىندار 30 پايىزعا دەيىن قىسقارادى. بۇل – جاساندى ينتەللەكتىنىڭ وندىرىستەگى قاۋىپسىزدىكتى تەك باقىلاۋ ەمەس, الدىن الۋ دەڭگەيىنە كوتەرە الاتىنىن كورسەتەتىن ناقتى مىسال.

ونەركاسىپتەگى تاعى ءبىر ماڭىزدى باعىت – جابدىقتاردىڭ جاي-كۇيىن ۇزدىكسىز باقىلاۋ. بۇل باعىتتا «RRLean» ستارتابى ەرەكشە كوزگە ءتۇستى. «RRLean» ازىرلەگەن پلاتفورما «IIoT» جانە «Edge AI» تەحنولوگيالارىنا سۇيەنىپ, وندىرىستىك اك­تيۆ­تەردى ءدال سول ساتىندە باقى­لايدى. جۇيە جابدىقتىڭ ىستەن شىعۋ قاۋپىن الدىن الا بولجاپ وتىرادى. نا­­تيجەسىندە, دەرەكتەردى راسىمدەۋگە كەتە­تىن ۋاقىت بىرنەشە ەسە قىسقارىپ, قىزمەتكەردىڭ جۇمىس تيىمدىلىگى ارتادى. بۇل شەشىم ءىرى وندىرىستەر ءۇشىن ۋاقىت پەن شىعىندى قاتار ۇنەمدەۋدىڭ ءتيىمدى جولىنا اينالىپ وتىر.

وندىرىستەگى تسيفرلاندىرۋ تەك جابدىقپەن شەكتەلمەيدى. جۇمىسشىنىڭ ءوزى دە وسى جۇيەنىڭ ماڭىزدى بولىگى. سوندىقتان «Tems.ai» ستارتابى ۇسىنعان «connected worker» پلاتفورماسى دا ەرەكشە كوزگە ءتۇستى. «Tems.ai» وندىرىستىك نۇسقاۋلىقتى, چەك-پاراقتى, بەينەماتە­ريالداردى ءبىر تسيفرلىق ورتاعا جيناقتايدى. قىزمەتكەر قاجەتتى اقپاراتتى ءدال سول ساتتە, ناقتى جۇمىس ورنىن­دا الا الادى. گەنەراتيۆتى جي مەن NLP تەحنولوگيالارى ارقىلى جۇيە اقپاراتتى قۇرىلىمداپ, ونى جاڭار­تىپ وتىرادى. سونىڭ ناتيجەسىندە نۇسقاۋلىق ازىر­لەۋ ۋاقىتى 90 پايىزعا دەيىن قىسقارىپ, جابدىقتاردىڭ بوس تۇرۋى ايتارلىقتاي ازايادى.

باعدارلامادا اۋىر ونەر­كاسىپكە باعىتتالعان تەرەڭ تەحنولوگيالىق شەشىمدەر دە ۇسى­نىلدى. سونىڭ ءبىرى – «METACODE» ازىرلەگەن SKD جۇيە­سى. بۇل شەشىم بايىتۋ فابريكالارى مەن مەتاللۋرگيالىق كاسىپورىندارعا ارنالعان. قا­راپايىم تىلمەن ايتساق, اتالعان جۇيە كاسىپورىنداعى فلوتاتسيا ۇدەرىسىنىڭ قالاي ءجۇرىپ جاتقانىن ۇنەمى قاداعالاپ, قانداي وزگەرىس بولۋى مۇمكىن ەكەنىن الدىن الا كورسەتەدى. سونىڭ ارقاسىندا رەاگەنتتەردى ارتىق تا ەمەس, كەم دە ەمەس, ءدال مولشەرلەۋگە مۇمكىندىك تۋادى. ناتيجەسىندە, ءوندىرىس تۇراقتانىپ, مىس پەن التىن الۋ كولەمى 0,5–1 پايىزعا دەيىن وسەدى. ال بۇل ءىرى زاۋىتتار ءۇشىن جىلىنا ونداعان ملن دوللار قوسىمشا تابىس اكەلۋى مۇمكىن.

ونەركاسىپتەگى تيىمدىلىك تەك تسەحتاعى ستانوكتىڭ جۇمىسىمەن ولشەنبەيدى. كاسىپورىننىڭ ىشكى باسقارۋى دا جۇيەلى بولسا عانا ۋاقىت ۇنەمدەلىپ, شىعىن ازايادى. وسى باعىتتا «ZIZ INC» ستارتابى ۇسىنعان شەشىم نازار اۋدارارلىق. كومپانيا كاسىپورىنداعى نەگىزگى ءۇش جۇيەنى – تۇتىنۋشىلارمەن جۇمىس (CRM), كادرلىق باسقارۋ (HRM) جانە قارجى-ەسەپ, جوسپارلاۋ (ERP) پلاتفورمالارىن ءبىر ورتاعا بىرىكتىرەدى. قاراپايىم تىلمەن ايتقاندا, ءار ءبولىمنىڭ اقپاراتى بىتىراڭقى بولماي, ءبىر جەردە كورىنەدى, سونىڭ ارقاسىندا كوپتەگەن جۇمىس اۆتوماتتى تۇردە ورىندالادى. سونىڭ ناتيجەسىندە بۇرىن قولمەن جاسالاتىن وپەراتسيالار قىسقارادى, قۇجات كەلىسۋ, تاپسىرما بەرۋ, باقىلاۋ سياقتى جۇمىستار 2–3 ەسە جىلدام جۇرەدى. بۇعان قوسا, ستارتاپ AR جانە VR تەحنولوگيا­لارىن پايدالانىپ, قىزمەتكەرلەردى وقىتۋدى دا جاڭاشا ۇيىمداستىرادى, ياعني مامان وندىرىستەگى جاعدايدى ۆيرتۋالدى ورتادا «كورىپ», قاۋىپسىز تۇردە تاجىريبە جيناي الادى. بۇل تسيفرلاندىرۋدىڭ تەك تەحنيكاعا ەمەس, ەڭ باستىسى – ادام رەسۋرسىنا, مامانداردىڭ بىلىكتىلىگىنە تىكەلەي اسەر ەتەتىنىن كورسەتەدى.

ال «shai.pro» ستارتابى كومپانيا ىشىندەگى جۇمىسقا بەيىم­دەل­گەن جي-اگەنتتەر پلاتفورما­سىن تانىستىردى. بۇل – كاسىپ­ورىن­نىڭ كۇندەلىكتى «قاعازبا­ستى» شارۋاسىن جەڭىلدەتىپ, تاۋە­كەلدى ازايتۋعا كومەكتە­سە­تىن تسيفرلىق قۇرال. پلات­فور­ما تاۋەكەلدەردى باسقارۋ, تالاپ­تارعا سايكەستىك, قۇجات اينالىمى جانە دەرەكتەردى دۇرىس وڭ­دەۋ سياقتى باعىتتارعا ارنال­عان. بىلايشا ايتقاندا, جۇيە كوم­پانيانىڭ ىشكى قۇجاتتا­­رىن, كەلىسىمشارتتارىن, ەسەپتەرىن «وقىپ», كەرەك اقپاراتتى تەز تابادى, سالىس­تىرادى جانە ناقتى ۇسىنىس بەرەدى. سونىڭ ارقاسىندا پلاتفورما ينتەرنەتتەن جينالعان جالپى جاۋاپقا ەمەس, كاسىپورىننىڭ ناقتى قۇ­جاتتارىنا نەگىزدەلگەن شەشىم ۇسىنادى. ياعني جاساندى ينتەللەكت مۇندا جاي عانا كومەكشى ەمەس, باسقارۋشىلىق شەشىم قابىلداۋعا ىقپال ەتەتىن دەڭگەيگە كوتەرىلەدى.

وسىلايشا, Industrial AI Acceleration 2025 باعدارلاماسى جاساندى ينتەللەكتى­نىڭ وندىرىستە جاي «تاجىريبە» ەمەس, ناقتى نا­تيجە بەرەتىن قۇرالعا اينال­عانىن ايقىن كورسەتتى. ەندىگى مىندەت – مۇنداي شەشىمدەردى جەكەلەگەن جوبالار دەڭگەيىندە قالدىرماي, كاسىپورىنداردىڭ كۇندەلىكتى جۇمىسىنا كەڭىنەن ەنگىزىپ, ستارتاپ پەن يندۋستريا اراسىنداعى بايلانىستى تۇراقتى جۇيەگە اينالدىرۋ.