جاساندى ينتەللەكت قارقىندى دامىعالى IT سالاسى كەز كەلگەن ادامعا قولجەتىمدى, اكادەميالىق ءبىلىمدى ۋنيۆەرسيتەتكە بارماي-اق مەڭگەرۋگە بولاتىن سالاعا اينالدى. از ۋاقىت ىشىندە وسى باعىتقا قىزىعۋشىلىق ارتا ءتۇستى. الايدا كوبى نەدەن باستايمىن, يدەيانى قالاي جۇزەگە اسىرامىن, ستارتاپ قۇرۋعا نە قاجەت دەگەن سۇراقتىڭ اينالاسىندا قالىپ قويادى. وسى تۇستا ەلىمىزدە قالىپتاسىپ كەلە جاتقان ستارتاپ ەكوجۇيەسى, سونىڭ ىشىندە «Astana Hub»-تىڭ «AI Preneurs» اكسەلەراتسيالىق باعدارلامالارى تاپتىرماس كومەك.
«Astana Hub» باس ديرەكتورى ماعجان ماديەۆتىڭ ايتۋىنشا, جي-ستارتاپ يدەيادان ەمەس, فاۋندەردەن باستالادى.
– كلاسسيكالىق اكسەلەراتورلار ستارتاپتى MVP, العاشقى تۇتىنۋشى نەمەسە نارىقتىق ءوسىم ساتىسىندا قابىلدايدى. ال جاساندى ينتەللەكت باعىتىنداعى جاڭا فورماتتاعى باعدارلامالاردا قاتىسۋشىلار جوباسىز, ءتىپتى دايىن يدەياسىز دا كەلەدى. سەبەبى جاساندى ينتەللەكت داۋىرىندە يدەيا تەز ەسكىرەدى, ال وزەكتى ماسەلەگە شەشىم ۇسىنۋ ومىرشەڭ قاعيدا. جوبانىڭ «Ideation» كەزەڭىندە قاتىسۋشىلار ناقتى پروبلەمانى انىقتاپ, ونى بىرنەشە قىرىنان تالداپ, تەز ارادا سىناقتان وتكىزۋدى ۇيرەنەدى. بۇل كەزەڭدە «ۇنايدى» دەگەن سۋبەكتيۆتى باعادان گورى «جۇمىس ىستەي مە؟» دەگەن پراگماتيكالىق سۇراق الدىڭعى ورىنعا شىعادى. جي-ستارتاپ قۇرۋداعى ەڭ ۇلكەن قاتەلىكتىڭ ءبىرى – نارىقتى ءۇستىرت باعالاۋ. مىسالى, بەلگىلى ءبىر سالادا جۇزدەگەن مىڭ الەۋەتتى پايدالانۋشى بار ەكەنىن ايتۋ نارىقتىڭ بار ەكەنىن دالەلدەمەيدى. نارىق دەگەنىمىز – سۇرانىس پەن تولەم قابىلەتى. سوندىقتان تاجىريبەلى مەنتورلار ستارتاپ يەلەرىنە ۇنەمى ءبىر سۇراق قويادى: بۇل ءونىمدى بۇگىن كىم, قانداي ماسەلەنى شەشۋ ءۇشىن ساتىپ الۋعا دايىن؟ سۇراقتارعا جاۋاپ بەرە الماعان جوبا, قانشالىقتى كەرەمەت بولسا دا, ۇزاققا بارمايدى, – دەيدى ول.
سونىمەن قاتار ستارتاپ قۇرۋداعى كەلەسى ماڭىزدى فاكتور – كوماندا. جاساندى ينتەللەكتىگە نەگىزدەلگەن ستارتاپتى ءبىر عانا ماماندىق يەسى قۇرا المايدى. مۇندا تەحنولوگيانى تەرەڭ تۇسىنەتىن ينجەنەر, نارىقتى جاقسى بىلەتىن مامان ءارى شەشىم قابىلداي الاتىن فاۋندەر قاجەت. سوندىقتان اكسەلەراتسيالىق باعدارلامادا قاتىسۋشىلار يدەيا ىزدەۋدەن بۇرىن, وزىنە سەرىكتەس, پىكىرلەس, جاۋاپكەرشىلىگى جوعارى كوماندا مۇشەلەرىن تابۋعا باسىمدىق بەرەدى ەكەن.
فينتەح جانە بلوكچەين سالاسىندا تاجىريبەسى بار كاسىپكەر ازات بەكماعامبەتوۆتىڭ ايتۋىنشا, جاساندى ينتەللەكتىگە نەگىزدەلگەن ءونىم جاساۋ جەتكىلىكسىز. ماڭىزدىسى نارىققا قاجەت, تابىس اكەلەتىن سەرۆيس قۇرۋ. كوپتەگەن جوبا ءدال وسى جەردە قاتەلەسەدى.
– جاساندى ينتەللەكتىنىڭ ءوزى ءونىم ەمەس, ول – قۇرال. ءونىم دەگەنىمىز – ادامنىڭ ناقتى ماسەلەسىن شەشەتىن ناتيجە. كوپتەگەن ستارتاپ «بىزدە جي بار» دەگەن تۇجىرىممەن شەكتەلىپ قالادى. ال تابىستى جوبالار كەرىسىنشە, الدىمەن شەشىلمەي جۇرگەن ماسەلەنى انىقتاپ, كەيىن عانا نەگە ءدال وسى جەردە جاساندى ينتەللەكت ءتيىمدى ەكەنىن دالەلدەيدى. بۇل ءتاسىل تەحنولوگيانى ماقسات ەمەس, قۇرال رەتىندە قولدانۋعا مۇمكىندىك بەرەدى. جي-ستارتاپ ەكوجۇيەسىندەگى تاعى ءبىر ەرەكشەلىك – جىلدام تەستىلەۋ مادەنيەتى. يدەيانى ۇزاق ۋاقىت بويى جەتىلدىرەمىن دەپ ۇستاپ وتىرۋ بۇل سالادا ءتيىمسىز. نارىققا تەز شىعۋ, كەرى بايلانىس الۋ جانە قاجەت بولسا, باعىتتى وزگەرتۋ – دامۋدىڭ باستى شارتى. بۇندا ەڭ قاۋىپتى نارسە ساتسىزدىك ەمەس, ءوز-ءوزىڭدى الداۋ. جاساندى ينتەللەكتىگە نەگىزدەلگەن كاسىپكەرلىك جولىن تاڭداعان ادام جەڭىل تابىسقا ەمەس, ۇزاق ءارى كۇردەلى جولعا دايىن بولۋعا ءتيىس. بۇل جولدا تۇراقسىزدىق, بەلگىسىزدىك از بولمايدى. دەگەنمەن دۇرىس ورتا, كاسىبي مەنتورلار مەن جۇيەلى جۇمىس بار جەردە ناتيجە دە بولادى, – دەيدى ول.
جاساندى ينتەللەكت باعىتىنداعى ستارتاپتار ءۇشىن ينفراقۇرىلىم مەن ساپالى دەرەككە قول جەتكىزۋ شەشۋشى فاكتورلاردىڭ ءبىرى سانالادى. سەبەبى جي-گە نەگىزدەلگەن ءونىم الگوريتمگە عانا ەمەس, ەسەپتەۋ قۋاتىنا, دەرەكتەردى وڭدەۋ مۇمكىندىگىنە جانە تۇراقتى تەحنولوگيالىق ورتاعا تاۋەلدى. ماعجان ماديەۆتىڭ سوزىنشە, اكسەلەراتسيالىق باعدارلامالاردىڭ ءرولى تەك ءبىلىم بەرۋمەن شەكتەلمەيدى, ولار ستارتاپ يەلەرىنىڭ تەحنولوگيالىق ويلاۋ جۇيەسىن وزگەرتەدى. «مۇنداي اكسەلەراتسيالىق باعدارلامالار قاتىسۋشىلارعا تەك تەوريا ۇيرەتىپ قويمايدى. ولار تەحنولوگيالىق رەسۋرستاردى قالاي پايدالانۋ كەرەك ەكەنىن, ينفراقۇرىلىمعا ستراتەگيالىق تۇرعىدان قاراۋدى ۇيرەتەدى. بۇل – ءبىر عانا جوبانى ىسكە قوسۋ ەمەس, ۇزاقمەرزىمدى, تۇراقتى ەكوجۇيە قالىپتاستىرۋعا باعىتتالعان قادام», دەيدى.
«AI Preneurs» باعدارلاماسىنا جينالعان قاتىسۋشىلاردى بىرىكتىرەتىن ورتاق سەبەپ تە وسى ەكوجۇيەنىڭ ءبىر بولىگى بولۋعا ۇمتىلىس. ءبىرى مۇندا جاڭا يدەيا ىزدەپ كەلەدى, ەكىنشىسى سەنىمدى كوماندا قۇرۋدى ماقسات ەتەدى, ال ءۇشىنشىسى كاسىبي ورتا مەن پىكىرلەس ادامداردى تابۋدى كوزدەيدى.
– مەن بۇل باعدارلاماعا جۇزەگە اسىرعىم كەلەتىن يدەياممەن كەلدىم. ول – فاۋندەرلەر مەن كومپانيالارعا جىلدام ماسشتابتالۋعا, B2B تۇتىنۋشىلار مەن سەرىكتەستەر تابۋعا كومەكتەسەتىن جاساندى ينتەللەكت پلاتفورماسى. ستارتاپ اشۋعا دەگەن نيەتىم بۇرىننان بار ەدى, الايدا قاجەتتى رەسۋرس پەن نەدەن باستاۋ كەرەكتىگىن بىلمەدىم. وسى باعدارلاما تۋرالى ەستىگەن ساتتە-اق: «مىنە, ءدال وسى – ىزدەگەنىم», دەگەن وي كەلدى. باعدارلاماعا كەلۋدەگى باستى ماقساتىم – پىكىرلەس ادامداردى تابۋ, سەنىمدى كوماندا قۇرۋ جانە بىرلەسىپ ناقتى ستارتاپ جاساۋ. «AI Preneurs» الاڭىنا مەن ەڭ الدىمەن كوماندا جيناۋ ءۇشىن كەلدىم. ويتكەنى يدەيانى ىسكە اسىرۋ ءۇشىن جالعىز ادامنىڭ كۇشى جەتكىلىكسىز. «باعدارلاماعا دايىن يدەيامەن دە, يدەياسىز دا كەلۋگە بولادى. مۇندا ەڭ باستىسى – نيەت پەن جۇيەلى ەڭبەك. جۇمىس بارىسىندا سەن جالعىز ەمەس ەكەنىڭدى, قاسىڭدا ءدال سەن سەكىلدى ىزدەنىپ جۇرگەن ادامدار بار ەكەنىن سەزىنەسىڭ. بۇل سەنىم ستارتاپ جولىنداعى ەڭ ماڭىزدى تىرەكتەردىڭ بىرىنە اينالادى, – دەيدى ول.
وسىلايشا, «AI Preneurs» جاساندى ينتەللەكتىگە نەگىزدەلگەن ستارتاپتاردى ورتاق ماقساتقا جۇمىس ىستەيتىن كاسىبي قاۋىمداستىققا اينالدىرۋعا ىقپال ەتىپ وتىر.
