مەرەكەلىك باعدارلاما اياسىندا قوناقتارعا فاريزا كابينەتىندەگى «Neo 77» جاساندى ينتەللەكت بوتىنىڭ مۇمكىندىگى كورسەتىلىپ, جاڭادان جابدىقتالعان ينفورماتيكا كابينەتى تانىستىرىلدى.
ءىس-شارا بارىسىندا قوناقتار پانورامالىق اشىق ساباقتارعا قاتىستى. اتاپ ايتقاندا, «ادال ازامات – وتان تىرەگى!» تاقىرىبىنداعى تاربيە ساعاتى, اعىلشىن ءتىلى مەن ينفورماتيكا پاندەرى بويىنشا اشىق ساباقتار وتكىزىلدى. ساباقتاردا وقۋشىلاردىڭ ازاماتتىق جاۋاپكەرشىلىگى, فۋنكتسيونالدىق ساۋاتتىلىعى مەن زاماناۋي داعدىلارىن قالىپتاستىرۋ ماسەلەلەرى كەڭىنەن قامتىلدى. سونىمەن قاتار مەكتەپ جەتىستىكتەرى مەن وقۋشىلار شىعارماشىلىعىن تانىتقان كورمە كوپشىلىك نازارىنا ۇسىنىلدى.
مەرەيتويدىڭ شىمىلدىعىن تۇرگەن ەڭ باستى سالتاناتتى ءسات – «جۇرەك سەنسىڭ, وتانىم!» اتتى دوڭگەلەك ۇستەل فورماتىنداعى مازمۇندى كەزدەسۋ بولدى. ءىس-شارا وقۋشىلار حورىنىڭ ورىنداۋىنداعى مەكتەپ انۇرانىمەن اشىلدى. جاس داۋىستارداعى شىنايى لەپ پەن جۇرەكتەن شىققان ءۇن زالعا ەرەكشە رۋح بەرىپ, مەرەكەلىك كوڭىل كۇيدى اسقاقتاتا ءتۇستى. اننەن كەيىن كوپشىلىك نازارىنا ون جىلدىق تاريحتى قامتىعان بەينەفيلم ۇسىنىلدى. كورەرمەندى ءبىر ساتكە وتكەنگە جەتەلەگەن بۇل تۋىندىدا ءبىلىم ورداسىنىڭ قالىپتاسۋ كەزەڭدەرى, قول جەتكىزگەن جەتىستىكتەرى, شاكىرتتەر مەن ۇستازدار ەڭبەگىنىڭ ناتيجەسى, سونداي-اق الداعى دامۋ باعىتتارى جۇيەلى ءارى جان-جاقتى كورسەتىلدى. ەكراننان سىر شەرتكەن ءار كادر بولاشاققا دەگەن سەنىمدى كۇيشەيتە ءتۇستى. بۇل ءبولىم مەرەيتويدىڭ مازمۇنىن تەرەڭدەتىپ, مەكتەپتىڭ تەك ءبىلىم بەرەتىن ورىن ەمەس, ۇرپاق تاربيەلەيتىن ۇلكەن رۋحاني ورتا ەكەنىن تاعى ءبىر مارتە ايقىندادى.
سونىمەن قاتار دوڭگەلەك ۇستەلدە وقۋ-اعارتۋ مينيسترلىگى تاربيە جۇمىسى جانە قوسىمشا ءبىلىم بەرۋ دەپارتامەنتىنىڭ ديرەكتورى ەرلان قالماقوۆ, استانا قالالىق ءبىلىم باسقارماسى باسشىسىنىڭ ورىنباسارى اسىل امانگەلدىقىزى, №77 مەكتەپ-گيمنازياسىنىڭ العاشقى ديرەكتورى, قازىرگى تاڭدا تەمىربەك جۇرگەنوۆ اتىنداعى №70 مەكتەپ-ليتسەي ديرەكتورى گۇلجامال بايمەنوۆا, پرەزيدەنت جانىنداعى ۇلتتىق قۇرىلتاي مۇشەسى, اكادەميك كارىمبەك قۇرماناليەۆ, پرەزيدەنت جانىنداعى ۇلتتىق قۇرىلتاي مۇشەسى, اكادەميك ديحان قامزابەك ۇلى, قازاقستاننىڭ ەڭبەك سىڭىرگەن زاڭگەرى يراك قاسىم ۇلى, فاريزاتانۋشى, فيلولوگيا عىلىمىنىڭ كانديداتى گۇلسىم ەڭسەپوۆا ءسوز سويلەپ, ۇلتتىق قۇندىلىقتاردى ۇلىقتاۋ تۋراسىندا ويلارىن ورتاعا سالدى.
مەرەكەلىك كەش پوەزيا مەن ونەرگە ۇلاسىپ, ۇستازدار ولەڭ وقىپ, ونەرلى وقۋشىلار بي بيلەپ, ءان ايتتى. رەسپۋبليكا دەڭگەيىندەگى بايقاۋلاردا توپ جارعان جاس تالانتتار كورەرمەندەردىڭ ىستىق ىقىلاسىنا بولەندى.
