مادەنيەت جانە اقپارات مينيسترلىگىنىڭ ايتۋىنشا, يۋنەسكو بۇكىلالەمدىك مۇرا ورتالىعىنا قازاقستان تاراپىنان ەكى اتالىمعا قۇجاتتار جولدانعان. اتاپ ايتساق, «ماڭعىستاۋداعى جەراستى مەشىتتەرى» جانە « ۇلى جىبەك جولى: فەرعانا-سىرداريا ءدالىزى» ترانسۇلتتىق جوباسى.
سونداي-اق تۇركىستان قالاسىندا وتكەن «زامان مەن مادەنيەت ديالوگىندەگى ياساۋي مۇراسى» اتتى حالىقارالىق سيمپوزيۋمىنا 15 ەلدەن جۇزگە جۋىق عالىم قاتىسقان ەدى. مەملەكەت باسشىسىنىڭ باستاماسىمەن ۇيىمداستىرىلعان فورۋم قالا مارتەبەسىن تۇركى الەمىنىڭ عىلىمي ورتالىعى رەتىندە نىعايتتى. ايتا كەتەيىك, قازىرگى تاڭدا قوجا احمەت ياساۋي كەسەنەسىن عىلىمي قالپىنا كەلتىرۋ جۇمىستارى جۇرگىزىلىپ جاتىر.
مينيسترلىكتىڭ حابارلاۋىنشا, ەلىمىزدە العاش رەت قاراحان, ايشا ءبيبى, ارىستانباب, قوجا احمەت ياساۋي كەسەنەلەرىنە, كونە وتىرار قالاشىعىندا زاماناۋي تسيفرلىق جۇيەلەر ورناتىلادى. ياعني تسيفرلاندىرۋ اياسىندا ەلەكتروندىق بيلەت ساتۋ جۇيەلەرى, وزدىگىنەن قىزمەت كورسەتۋ تەرمينالدارى, تۋرنيكەتتەر, جاساندى ينتەللەكتىمەن جابدىقتالعان بەينەكامەرالار جانە باسقا دا زاماناۋي قۇرالدار قويىلادى.
تاريحي-مادەني مۇرانى ساقتاۋ اياسىندا بيىلعى جاڭالىقتىڭ ءبىرى ءارى بىرەگەيى «E-museum» پورتالى بولىپ وتىر. جوبا ەلىمىزدەگى 285 مۋزەي قورىن بىرىكتىرىپ, 66 مىڭنان استام ەكسپونات قولجەتىمدى بولادى. پورتالدا ءۇش ولشەمدى مودەلدەر مەن ۆيرتۋالدى تۋرلار بار. سونىمەن قاتار باستاما تاريحي مۇرانى ساقتاۋ مەن ونى حالىقارالىق مادەني كەڭىستىكتە كەڭىنەن تانىتۋدى ماقسات ەتەدى.
جىلدىڭ تاعى ءبىر ماڭىزدى جوباسى – «E-كينو» جۇيەسى. مۇندا كينوتەاترلارداعى كورسەتىلىمدەر ءبىرتۇتاس تسيفرلىق ەسەپكە الىنادى. پلاتفورماعا 68 كينوتەاتر قوسىلعان. جۇيە ارقىلى 20 310 بيلەت ساتىلدى. جوبا نارىقتاعى اشىقتىقتى ارتتىرىپ, ۇلتتىق كينو جۇمىسىن تالداۋعا مۇمكىندىك بەرەدى.
مادەنيەت ۇيىمدارى دا ەلەكتروندىق بيلەتتەردى, وزدىگىنەن قىزمەت كورسەتۋ تەرمينالدارىن جانە زاماناۋي باقىلاۋ جۇيەلەرىن ەنگىزىپ جاتىر. بۇل وزگەرىستەر قىزمەت كورسەتۋ ساپاسىن ارتتىرىپ, كەلۋشىلەر ستاتيستيكاسىن ەسەپتەۋگە سەپ بولادى.
